هەژار سدیق

بەدرێژایی مێژوو،کۆمەڵانی خەڵکی عیراق هەورازو نشێوی زۆر کارەساتباریان بینووە.
عیراقیەکان زۆربەی جار،لەم هەورازو نشێوانەدا،شکاون و ڕوخێنراون،بەڵام خەڵکەکەی بنیاتیان ناوەتەوە.
عیراق،دووجار ڕوخان و تێکشکاندنەکەی لەبەرژەوەندی خەڵکەکەی بووە،یەکەمجار لە14-11-1918 کە سوپای ئینگلیز سوپای داگیرکەری تورکە عوسمانیەکان لەعیراق ڕاماڵی و دەریکردن.
دووەم جاریش لە9-4-2003 سوپای هاوپەیمانان بەسەرۆکایەتی ئەمریکا،ڕژێمی خۆسەپێنی بەعسی عەرەبی ئیشتراکی ڕوخاند،ئەگەر بەچاوێکی لۆژیکیانەو عاقڵانە.
لەهەردوو پرۆسەکە بڕوانین و پێداچوونەوەیەك بەدەستکەوتە میللیەکانی هەردوو سەردەمەکە بکەین،بەبەراورد بەسەردەمی دەسەڵاتە قەومچی و مەزهەبچیە بکوژو تاڵانچیەکانی بەناو دژە ئیمپریالیزم،نێوانیان ئاسمان و ڕێسمانە.
ئەمجارەشیان،بۆ جاری سێیەم دەسەڵاتی عیراق دەڕوخێ،بەڵام بەسەر سەری کێ دەڕوخێ؟
ڕوخانی سێیەم،کۆتا جارو ئومێد بەخشە،چونکە،ئەمجارەیان بەسەر سەری میرو خەلیفە خۆسەپێن و گەندەڵەکانی ئێستای دەسەڵاتدا دەڕوخێت.
نەك هەر گاڵتە،بەڵکو دڵم بەهەندێ سیاسی دەسوتێ،کە هەوڵ دەدات سواری سەر شەپۆلی توڕەیی خەڵك بێت،بەڵام بۆی نالوێ ،یان نیگەرانە لەخۆپیشاندانەکانی ئێستاو،ترسی لێ نیشتووە لەهەموارکردنەوەی دەستوری هەمیشەیی عیراق.
دەستوری ئێستای هەمیشەیی عیراق،کە نایابترین دەستورە لە ڕۆژهەڵاتی ناوەڕاست،کە لەساڵی 2006ەوە کەوتە واری کارپێکردن،بۆ ئەوکاتە،نەتانگوت با لەبەر خاتری ئەم دەستورە کەدایکی هەموو قانونەکانەو خەڵکی عیراقیش زۆریان چەشتووە،با هەموو هەوڵ و تێکۆشانەکانمان بۆ بنیاتنانەوەی شکۆی خەڵکی عیراق و وڵاتەکەمان بێت.
عیراقیەکان بەکوردو عەرەب و ئەمریکاو ئەوروپاش زۆر باش ئەزانن کڕوزانەوەو بەرەنگاری سیاسیە گەندەڵەکان لەبەرامبەر توڕەیی کۆمەڵانی خەڵك،بۆ ئەو سامانە زۆرەیە کە لەدوای پرۆسەی ئازادی عیراق،تاڵانیان کردووە.
بێگومانم بەگوێرەی پرۆسەی کۆتایی پێهێنانی جەنگە درێژخایەنەکان،کە ئەمریکا سەرکردایەتی دەکا،خەڵك و خاکی عیراق،لەدەستێکی ئەمین دایە،ئەوەی بێ داهاتوو و ئایندەیەو خۆری بەختیشیان لەئاوابوونە،سیاسیە گەندەڵەکانن و کۆتا جاریشە عیراق لەبەرژەوەندی خەڵکەکەی دەڕوخێت و بێگومان جوانتر بنیات دەنرێتەوە.

ئەم وتارە دەربڕی بۆچونی نووسەر خۆیەتی