1
دێتە گوێم دەنگێ بە ئاهو شیوەن و گریانەوە
ناڵەی دڵمە لە حەسرەت خاكی كوردستانەوە
ئەحەمەد موختار بەگی جاف بەو جۆرە شینی خاكی كوردستان دەكات ، ئەو خاكەی لەت و پەت كراوەو هەر كەس خۆی بە خاوەنی دەزانێت ، تا ئێستا لە باكورو رۆژئاوا دەسەڵاتدارانی تورك و سوریا هەر نایانەوێت بڵێن شتێك هەیە ناوی كوردستانە ، ئەوان بە هیچ جۆرێك ئەو ناوچە كوردستانیانە و خەڵكەكەی وەك كورد ناناسن ، چ نەزانیەكە دەوڵەت نەتناسێت و تۆ لە بری ئەو بڵێی دەوڵەت كێشەی لە گەڵ كوردا نیە ، دەوڵەت نەك كێشەی لە گەڵ كوردا هەیە ، ئەو لە گۆرانی و جل و بەرگی كوردیش دەترسێت و قەدەغەی دەكات ، تۆش چۆنت پێخۆشە داكۆكی لەو ستەمكاریە بكە .
2
كۆماری كوردستانی سور ئەو پارچە دزراوەیە كە كەوتوەتە نێوان ئەرمینیاو ئازەر بایجانەوە ، ناوچەی شاخاوی ناگارنۆ كاراباخ و لاچین و ئەو دەورو بەرە ، كە زۆر بە لایدا ناچین ، لە كاتێكا ئەو ناوچەیە لە ساڵی 1923 تا كۆتای 1929 بە ناوی كۆماری كوردستانی سور نێو بانگی هەبووە و لە سای مافی چارەنووسی گەلانی لینین دا خۆخاوەنی كردووە ، لە دوای 1929 بە شێوەیەكی زۆر تراژیدی تارو مار كراوە ، خەڵكەكەشی داغان و باغان كراون ، ساڵی 1992 وەكیل مستەفایێف جارێكی تر ئەو كۆمارەی بە ناوی كۆماری لاچینی كوردی زندوو كردەوە ، لێ دیسان پەلامار دراو وەكیلی كوردانیش بەرەو ئیتالیا سەری خۆی هەڵگرت ، تا رۆژی 19ی 4ی ئەمساڵ هەر لەوێ سەری نایەوە ، كوردانی لاچین و ئەو ناوچە دڵگیرەش هێشتان بە تەمای تینن.
3
مەلای گەورە بە دەم ئازارو ناڵینەوە دەڵێت :
هەتا دەمرم لە بۆ كوردان دەناڵم
عیلاجیان چۆن بكەم هاوار بە ماڵم
ئەوە مەلای گەورەی كۆیەیە ، بیر لە چارەسەری دەردی كوردان دەكاتەوە ، لێ دوای ئەو هەموو ساڵانە ئێمە هێشتا بەربووینەتە سەرو بەچكی یەكترو لە بری دووژمن خۆمان خۆمان دەكوتین ، كوردایەتیمان لێ بارە و نازانین لەكوێی فڕێ دەین ، ئاخر تا ئێستا چوار كتێب ، نامیلكە ، ڤەكۆڵینی باش بە زمانی سۆرانی لە سەر كوردستانی سور نیە ، كەم كەس لە بارەیەوە دەزانێت ، كەس نازانێ حاڵی كوردانی ئەوێندەر ، ئەوە " براكانی شیمال" هەر باس مەكە .
رۆم و جوو چاكە ئیتیفاقی هەیە
كوردە بێغیرەتی و نیفاقی هەیە
ئەوەش حاجی قادر
لەتیف فاتیح فەرەج
ئەم وتارە دەربڕی بۆچونی نووسەر خۆیەتی