لامەركەزی دەبێت "هەبێت" نەك پێویستە "ببێت".... بەڵام..؟؟؟
- پێش لامەركەزی دەستی بەرپرسان لە راووڕوتی خاڵە سنورییەكان ببڕن... مانگانە دەیان ملیۆن دۆلار دەخەنە تەنكەی باخەڵیانەوە..
- پێش لامەركەزی دەستی حزب و بەرپرسە حزبیەكان بەسەر دامو دەزگا حكومیەكانەوە ببڕن..
- پێش لامەركەزی دەستی كارەكتەرە شۆڕشگێرەكان لە بازاڕی جگەرەو مەشروبو دەرمان و دوگ و كلینێكس و دایبی ببڕن
- پێش لامەركەزی پارەی ژێر زەمینەكان بهێننەوە كە دەیان ساڵە كەڵەكەی دەكەن ...
- پێش لامەركەزی دەستی كارەكتەرە حزبیەكان لە قورگی میدیا بكەنەوە ...خەریكە دەیخنكێنن..
- پێش لامەركەزی پیاوكوژ و گروپە مافیاكان لە دەورەبەری كارەكتەرە سیاسیەكانتان دوورخەنەوە..
- پێش لامەركەزی گرنتی ژیان و گوزەرانی باشتر بۆ هاوڵاتیان مسۆگەر بكەن
- پێش لامەركەزی ئەزمونێكی باشتر و جوانتر لە مەركەزیمان پێشكەش بكەن... ئەوەی لە مەركەزی دوو ئیدارەییدا بینیمان جەهەنەمێك بوو بەتامی بەهەشت...
- پێش لامەركەزی پێمان بڵێن، لامەركەزی بۆ قایمكردنی مەركەزیەتی خۆتانە یان مەركەزیەتی هاوڵاتیان..
- پێش لامەركەزی چاومان رۆشنكەن.. دەتانەوێت غاز و نەوت و خاڵە سنوریەكان لەمەركەز بسەننەوەو لەسەر خۆتانی تاپۆ بكەن.. یان بیخەنە گیرفانی هاولاتیانەوە...
- پێش لامەركەزی پێمان بڵێن مافی یەكسان دەدەن بە سەرمایەدار و بازرگانەكان، یان سەرمایەدارو بارزگانی هەڵتۆقیوی خۆتان درووست دەكەن...
- پێش لامەركەزی پێمان بڵێن ئاساییش و ئارامیمان بۆ دەرەخسێنن، یان حوكمی پۆلیسی دەكەن.
- پێش لامەركەزی پێمان بڵێن دەسەڵات دەبەنەوە ناو كۆشك و تەلاری بنەماڵەو كارەكتەرە سیاسەكانتان.. یان دەیسپێرن بە خانووە قوڕەكان....
- بەرلە شەڕی لامەركەزی گرەنتی ژیانێكی باشترمان دەوێت. نەك بۆرەمان بۆ بگۆڕن بە دێزە...
- بەرلەوەی بەهەشتی لامەركەزی ببینین، دوو بەرپرسی ملیۆنێر، دوو سەرمایەداری هەڵتۆقیوی بەسەر شان و ملی حزبەوە، دوو كۆمپانیای ساختە ببەنەبەردەم دادگاو پێیان بڵێن (من این لك هژا)، لە دوو بەڕێوەبەری تەعینكراوی چەسپێنراو بە كورسیەوە، لە دوو فەرماندەی لەیاسا دەرچوو، لە دوو سیاسی قاچاغچی، بپرسنەوە...
- بەرلەوەی پەنجە توتەمان بگەزین، سوچێكی گیرفانی (ئابوری، سیاسی، ئەمنی) لامەركەزیمان بۆ داهاتوو پیشانبدەن، چونكە رابردوومان چەشت.
• ئەم گومان و پرسیارانە بۆ هەردوو ئیدارەكە (سەوزو زەرد) راستەو وەك یەكە...
محەمەد رەئوف
ئەم وتارە دەربڕی بۆچونی نووسەر خۆیەتی