ئەوەی ئێستا لە هەرێم دەگوزەرێ بەرەنجامە. سیاسەتی حوكمڕانی و ئیدارەدانی كاروباری خەڵك لەماوەی كابینەكانی پێشودا ، پڕ لە كەموكوڕی و گەندەڵی بووە.
شەفاف نەبووە، سامانی گشتی بەهەدەر دراوە، حكومەت پلانی نەبووە، پلانیشی هەبووبێت، جێبەجێی نەكردووە. دەستێوەردانی حیزب لەكاروباری حكومەتدا لە هەموو بوارەكاندا لە ئاستێكی ترسناكدا بووە. پەرلەمان و پەرلەمانتاڕان ئەرك و ڕۆڵی خۆیان فەرامۆش كردووە. شارەزاو پسپۆڕانی سەكتەرو بوارە جیاوازەكان فەرامۆش كرابوون..!
لەبری پسپۆڕان كەسانی ماستاوچی و جاهیل و خۆپەرست بووبونە چاوساغ و ڕاوێژكاری حیزب و حكومەت و پەرلەمان..!
بەشێك لە میدیاكاری نەزان و نەخوێندەوار، پەلەمانتاری موهەڕیج، مامۆستای هیچەزان، دادوەری بەرتیلخۆر، دەستیان لەگەڵ سیاسەتمەداری چاوچنۆك و دوژمن بە وڵات و گەلی خۆ تێكەڵ كردوو،ئەم جەمعە پێكەوە وەك تیمێكی ڤایرۆسی كوشندە كەوتنە گیانی هیلاك و ماندوی ئەم گەل و نیشتیمانە..
سیاسەتی ڕۆژانەی حكومەت(بەهەموو كەبینەكانەوە) بێ هیچ پلانێكی دوورمەودا ، لەگەڵ كێشەو قەیرانی سیاسی نێوان حیزبەكان و، لەگەڵ كێشەو ئاستەنگە پارادۆكسیەكانی حكومەتەكانی ئیقلیم، جۆرێك لە مۆدێلی حوكمڕانی بۆ بەڕهەمهێناوین، كە بریتییە لە؛ "هەرێمێكی چوارپێنج شاری نزیك بە شەش ملیۆن دانیشتوان. "
هەرێمێك بچوكترین و سەرەتایترین ئامار و ئەرشیفی لەبەر دەستا نییە. هەرێمێك زیاتر لەملیۆنێك لە دانیشتوانەكەی موچەخۆری حكومەتە، باقیاتی تریش بەهیوای ئەوەیە حكومەت ، ئەرزەو ئیمتیازاتیان بداتێ..!
لەم هەرێمەدا
موچەخۆرانی ھەرێمی كوردستان نزیكەی
ژمارەی فەرمانبەرانی مەدەنی ٤٣٠،٢٣١
پۆلیس و ئاساییش ١٠٤،٦٩٩
سەربازی ٢١٧،٩٧٩
كۆی گشتی فەرمانبەر ٧٥٢،٩٥٩
شەھیدان ٩٦،٩٣٧
خانەنشین ٢٤٦،٢٦٩
كۆمەڵایەتی ١٥٩،١٥٨
واتە كۆی گشتی موچەخۆران نزیكەی ١،٢٥٥،٢٧٣
بە مانایەكی تر و
بە پێی تایبەتمەندی و رێژەی فەرمانبەر لە وەزارەتەكان
پەروەردە ٢٢،٢٪
ناوخۆ ١٩،١٪
پێشمەرگە ١٨،٧٪
تەندروستی ٦،٥٪
لە هەرێمی كوردستاندا سەدان
زانكۆ هەیە، زیاتر لە
١٨٣٠٠٠ مامۆستامان هەیە..
بەدەیان هەزار دكتۆر و پارێزەر و ئەندازیار و ڕۆژنامەوان مان هەیە. بەدەیان و هەزاران سەرمایەدار و ملیاردارمان هەیە.
بۆ دەربازبوون لەم قەیرانی ئابوریە پێوستە :
حكومەت پلانی هەبێ، پلانەكەش واقیعی كۆنكرێتی بێ، كاتی بۆ دیاری بكرێ و قابیلی جێبەجێكردنیش بێ و نەتیجەشی هەبێ.
بەر لەهەر شتێك پێوستە حكومەت بیر لە پەیداكردنی داهات بكاتەوە، لەڕێگای هەموو جۆرەكانی داهاتەوە، پێوستە حكومەت قەرزی گەورە لە سەرمایەداران و كۆمپانیا زەبەلاحەكانی ناوخۆ بكات.(بەشێكی هەرە زۆریان كۆمپانیایی حیزبین..!!)
پێوستە حكومەت پارەی قەرز لە بەڵێندەران و كۆمپانیا و سەرمایەدان بسێنێتەوە
هاوكات دەبێ حكومەت بە جورئەتەوە دەستكاری ڕێژەی موچەخۆران بكات. ڕیفۆرمی بنەڕەتی لە بواری دەرماڵەكاندا بكات.
دڵسۆزی، خەمخۆی، خۆبەخشی ببێتە دروشم و مۆدێلی هەموو لایەك. ئەمەش دەبێ هەموو حیزبەسیاسیەكان پشتگیری بكەن.
مانیفێستی ڕزگاركردنی نیشتمان لە قەیرانەكان بكەینە بەرنامە و كارنامەی حیزب و حكومەت. بەمانایەكی تر هەوڵی جددی بدەن بۆ كەمكردنەوەی موچەخۆرانی هەرێم بۆ نزیك لەو ڕێژە ستاندارتەی لە جیهاندا هەیە.
كەمكردنەوەی دەرماڵە و موچە پلەباڵاكان، كەمكردنەوەی خەرجیەكانی حكومەت.
سیاسەتی تەقەشوف لەهەموو بوار و سەكتەرەكاندا پەیڕەو بكرێ.
پلانی ستراتیژی بۆ ئەڵتەرناتیڤی نەوت دابڕێژرێ.
دەتوانرێ هەرێمی كوردستان لەماوەی چوار ساڵدا بكرێتە خاوەنی ملیاردەها درەختی گوێز.زەیتون، سێو، جۆرەها میوەی دیكە، كەساڵانە هەزاران تەن بەرهەم و موشتەقاتەكانیان ببێتە داهاتێكی زۆر بۆ خەزێنەی حكومەت.
زەیتون و بادەم، شیرەمەنی و گۆشتی پەلەوەڕ، گەشتوگوزار، وەرزش و كەرتی فەرهەنگ و فەرهەنگسازی...هتد دەكرێ ببنە ئەڵتەرناتیڤی نەوت.
حكومەت لە هەموو جیهانی پێشكەوتودا، دەرفەت بۆ هاوڵاتیان ساز دەكات، خزمەتگوزاری و ئاسایش بۆ گشت كۆمەڵگاو دانیشتوانەكەی دابین دەكات.ئەركی حكومەتە كار بۆ گەنجان دابین بكات، ژیانی شایستە بۆ پیرو بەساڵاچوان و خاوەن پێداویستی تایبەت فەراهەم بكات.
حكومەت دەبێ یاساكان جێبەجێ بكات، پارێزگاری لەماڵ و ئاسایشی هاوڵاتیەكانی بكات ، نەك بە پێچەوانەوە. حكومەت نابێ شاگردی حیزب بێت..!
ئەم هێرشانە بۆ سەر گۆڕان و گۆڕانخوزان (كە بەندەش كراومەتە ئامانج) بەشێكن لە سیاسەتێكی ئیقلیمی دژ بە گەشەسەندن و پێشكەوتنی وڵاتەكەمان. بەشێكیشیان بریتین لەو نەخۆشییەی كە بە (دەردە كورد )ناسراوە لە ئەدبیاتی سیاسی و كۆمەڵایەتی كۆمەڵگای كوردستاندا.
ئەوانە گرنگن ئێمە بەهەند وەریان بگرین، بەكۆمەك و هەماهەنگی و هاریكاری هەموان. لەوەش گرنگتر ئەوەیە ئێمە سوربین، پشودرێژ بین، موكوڕبین لەسەر بەرنامە و پڕۆژە بنەڕەتیەكەی خۆمان.. پڕۆژەی گۆڕینی كۆمەڵگای كوردستان لە دۆخێكی چەقبەستوی پڕ لە جەهل و دواكەوتویی و خۆخۆری بۆ دۆخێكی پڕ لە گەشەسەندن و پێشكەوتن و یەكتر قەبوڵكردن و ئازادی .
ئاراس وەلی
ئەم وتارە دەربڕی بۆچونی نووسەر خۆیەتی