كەس نیە نەزانێت ئەم دەسەڵاتە بەسەرجەم حزبەكانیەوە لەسرەجەم بوارەكاندا گەندەل و ماڵوێرانكەر و بێ ستراتیج و بێ پلانە، كەس نیە نەزانێت ئەم زلحزبانە دەیانتوانی زۆر شت بكەن بەڵام لەپێناو بەرژەوەندی تەسك و بە پاڵنانی رق و كینەی كۆن تەنها ركابەریان لەسەر لەناوبردنی یەكدی دەكرد و تەنها میلەت باجەكەی داوە، كەسیش نیە نەزانێت گەر وابڕوات وەزعی گشتی كوردستان روو لەداڕمان و ئاشبەتاڵی لەسەرخۆ و بەهیواشیە و حەتمیە، كەسیش نیە نەزانێت هۆكارەكەی چیە و كێ بەرپرسی یەكەمە لەم كێشە و ئاریشە و ئالینگاریانەدا. بەڵێ ئەم حزبانە لە حاڵەتێكدان كە یان شەرم دەكەن پەشیمانی دەربڕن و داوای ڵێبوردن بكەن یان عەقڵیەتی عەشایەری و بنەماڵەیی و لوتبەرزی ریگەیان پێ نادات بیرێكی واقیعی وسەردەمیانە بكەنەوە و بەخۆیاندا بچنەوە و بە هەمووان هەست بە ترسناكی وەزعەكە بكەن و هانا بۆ هەر پوشێك بەرن بۆ ئەوەی لەم خنكانە قوتار بن بۆ رزگار بوون تولە رێگەیەكی رووناكیی لە دونیای تاریك و زەڵاماتی كوردستان بدۆزنەوە.
بەدبەختیەكە لەوەدایە ملكەچی غەریب و نەتەوەی سەردەت و دەسەلاتە داگیركەرەكان بەهەموو شێوەیەك دەبن كەچی لە ئاست برایەتی خۆمان خۆیان لێ دەكەن بە خاوەنی عەرشی مەعسوم و فەرعەون ئاسا حوكم دەكەن.
باشە تۆ لە بیرتە كە عیراق بەسەر زارەكی و روكەشانە هەندێك لە سوپاكەی لە بەرەی شەری فەلەستین –ئیسرائیل بەشدار بوو، تۆ خۆتێك بە شۆڕش لەقەڵەم دابوو بێ هیچ مەرجێك شەڕت لەگەڵ دایگركەر راگرت و دوور لە پراگماتیەت تەنانەت شوڕشت دواخست، چەندین هەڵوێست لەم جۆرە لەبەرامبەر داگیركەران لە هەر چوار پارچەكە روویداوە. لە دوای راپەرینیش بێ هیچ بیركردنەوەیەك شەری براكوژیت بەرپاكردو، لەم دواییەش بارێكی زیاتر لە حەدی خۆی لە قورساییی شەری داعشت خستە سەر ئەستۆی هەرێم و نزیكەی دووهەزار شەهیدت بەخشی و پێشوازیت لە ئاوارە كرد كە دەتتوانی دوور لە سۆزی كەسیی و بیری تەسكی حزبی وەبەرهێنانی سیاسی گەورەی تێدا بكەیت و نەتكرد، ئەگەر لەو بارەوە هاوشێوەی نێوخۆ بوایە هەزار ویەك حسابت بۆدەكرت بەڵام لەئا ست داگیركەران جگە لە پابەندبوون بە ئیمزاكردنی تەنازولی گەورە بە خاك و نەوتەكەشەوە بۆ دوای شەری داعش لەبەر بڕێك پارە هیچی ترت لەبەر چاو نەبوو، كەچی لەم كاتە سەختەدا خەریكی ملاملانێ و منجەمنج و خۆخواردنەوەیت و عەقڵت پێشبینی تەنها رووداوێكی سبەی ناكات نەك هی دوارۆژ.
ئێستاش لەم قورسایی و بێ متمانییەی خەڵك و نەبونی هیچ ئاسۆیەكی روون، كەس حساب نەك بۆ زۆر بەڵكو دوو مانگگی دوای ئێستا ناكات و، بۆ بەدبەختی هەرزەكاری سیاسی و خەڵكی هەڵتۆقیوی رێكەوت و دروستكراوی ئەم و ئەو بێ هیچ حسابیك بۆ خەڵك بەگشتی بە هەمان رەفتاری تازە وكۆنی ئەم زلحزبانە مامەڵە لەگەڵ قۆناغەكە دەكەن. وەرە تۆیەك كە جارێك قەرزاری خەڵكی بیت و لەسەر ناحەقی و فریودان وهەڵخەڵەتاندنی خەڵك تا ئیستاش بە ملیارەها دیناری خەڵكت لا بێت و ئێستا و لەم كاتەدا بتەوێت سواری سەری شەپۆلی وەزعی نالەباری خەڵك بیت و بتەوێت كۆمەڵیك خەڵكی دیكە بەدەست ئەم دەسەلاتە زاڵمەوە بەكوشت بدەیت.
ئەوەی جێگەی دڵخۆشیە كە خەڵكی كوردستان ئاگادارە و شوكر هۆشیارە و بە قسەی لوس لەخشتەنابرێت، بۆیە دەبێت خەڵك بە وریاییەوە وەزعەكە بخوێنێتەوە و بەڵی لەعنەت لەم دەەسەلاتە گەندەڵە بكەن بەڵام بێ ئەڵتەرناتیڤی نێوخۆیی و باوەر پیكراو دوای هیچ هاشوهوشی بازرگانی سیاسی لە كوردستان نەكەون، ئەوەی لەسەر ناحەقی بنیاتنرابێت سەرئەنجامی هەر فشەڵ دەرەدەچێت وحەق لەسەر زەمینەی ناحەقی بنیات نانرێت و ناحەقی هیچی لێ سەوز نابێت.
بۆیە لەم قۆناغە سیاسی و ئابووریە ترسناك و تاریك و سەختەدا، لە جیاتی دووجار دەبێت بۆ هەر هەڵوێستێك خەڵك هەزار جار بیر بكاتەوە، لەگەڵ ئەوەش كەس ناڵێت بێدەنگ بین لەمافی رەوای خۆمان و جوڵانی كاریگەر لە كات و شوێنی گونجاو دەبێت.
ئەوەی جێگەی داخە ئێستا لەسەر ئەم زەمینە ئاڵۆز و لەقە هەندێك لایەنی لە ریزبەدەری بێ مۆڕاڵ و بەهەمان فكر وبیری ترامپانە خەریكی ئیستغلال كردنی وەزعەكەی كوردستانن و، ئەوەی جێگەی گاڵتەجاڕیە خۆیان بەئەڵتەرناتیڤی ئەم گەندەڵانە دەزانن وەك ئەوەی كەس نەزانێت چۆن دروست بوون و كێ دەستیان دەگرێت و بۆچی هەڵتوقیون وكی هانیان دەدات و بۆ چیە.
عیماد عەلی
ئەم وتارە دەربڕی بۆچونی نووسەر خۆیەتی