جەعفەر عەلی

ڕەنگە هیچ کاتێک هێندەی ئەم چەند ساڵەی دوایی، پەکەکە لە ژێر فشاری ناوەکی و دەرەکیدا نەبووبێت. ئەمڕۆ لە هەر کاتێک زیاتر ئەم هێزە سیاسییە چەکدارە لەبەردەم هێرش و پەلاماری دونیا، دەوڵەتی تورکیا و هاوکارە کوردەکانی دایە. تورکیا و هاوکارانی، دەزگا هەواڵگری و سیخوڕییەکانیان لە هەموو بستێکی ئەم دونیایەدا بە دوای جوڵەکانی ئەم هێزەدا لە جوڵەدان. کاتی خۆی ئۆجالان، ڕێبەری پەکەکە لە هیچ گۆشەیەکی ئەم دونیایەدا بستێک زەوی، ماڵێکی ئارامی پێڕەوا نەبینرا، تا لە پیلانێکی نێودەوڵەتیدا وەک دیاری پێشکەش بە ئەنکەرە کرایەوە، پێدەچێ پەکەکە لە دۆخێکی وەها نزیک بێت، هەمووان لە ئەمریکاوە تا وڵاتانی یەکێتی ئەوروپا و ڕوسیا ئامادەن لە بازاڕی مامەڵە و سەودای سیاسیییدا، بۆ بەلاداخستنی هاوسەنگی هێز و قورسترکردنی هاوکێشەکە بە قازانجی ڕۆژئاوا، بۆ هەرچی زیاتر بچووککردنەوەی هەژموون و مەترسییەکانی ڕوسیا لەسەر بەرژەوەندییە ستراتیژی و سنورەکانی ناتۆ، قوربانی نە تەنیا بە پەکەکە، بەڵکو بە کوردیش وەک نەتەوەیەک بدەن. پرسی بە ئەندامبوونی سوید و فینلەندە لە ناتۆ و هەڵوێستەکانی ئەم دوو دەوڵەتە و خودی ناتۆش بەرامبەر بە بوونی مەترسی تیرۆر (واتە کورد لە دیدی ئەنکەرە)، لە ئایندەیەکی نزیکدا ئەم بابەتە زیاتر ڕووندەکاتەوە.
   لەم دۆخەدا پەکەکە لە پەیوەندی و جوڵەکانیدا، پێویستی بە بیرکردنەوەی وردتر و قوڵتر هەیە. چیتر پەکەکە نابێ بە پاساوی بوونی هێڵی خیانەت لە باشور، ئەو سەرمایە گرنگە مرۆییەی کە هەیەتی بچووک و بێ بەها ببینێت. هەموو ئەو تیرۆر و ڕووداوانەی لە باشور لە ماوەی ئەم چەند ساڵە کەمەی دواییدا ڕوویانداوە، پێویستی بەوە نەماوە ئێمە بۆ سەلماندنی بوونی هێڵی خیانەت، چ لە دەرەوەی، یان ناوەوەی پەکەکە، یان هاوکارانی فاشیزمی تورکیا، بە دوای بەڵگە و سەلماندندا بگەڕێین. بۆ هەر مرۆڤێکی کەمێ ئاگایی سیاسی و کۆمەڵایەتی هەبێت، ئەم بابەتە لەوە دەرچووە بۆ سەلماندنی کات بە فیڕۆ بدەین.
   ئەمڕۆ پەکەکە، نە تەنیا لە سنورەکانی دەسەڵاتی پارتی دیموکراتی کوردستان، کە پەیوەندی نێوانیان لە ئاستێکی باشدا نییە، بەڵکو لە تەواوی هەرێمی کوردستاندا لەبەردەم هەڕەشە و مەترسیدایە. پەکەکە وەک هێزێک، بە تەنیا لە سنوری دەسەڵاتی زەرددا نەکەوتووەتە بەردەم پەلامار دانەوە، بەڵکو سنوری سەوزیش بۆ ئەوان چیتر رووبەرێکی ئارام و پارێزراو نییە. لە هیچ یەکێک لەم دوو زۆنی زەرد و سەوزەدا، هەرگیز کەسێک، سیخوڕێک بە تۆمەتی گومانکردن، یان ئەنجامدان لە تیرۆری هیچ کادیر و ئەندامێکی پەکەکە، نەخراونەتە بەردەم لێپرسینەوەی یاسایی و ئەخلاقی. واتە پەکەکە دەبێ لەبری گەڕان بە دوای بەڵگە و سەلماندنی بوونی هێڵی خیانەت لە باشور، تەواو لەوە دڵنیا بێت، دوور نییە لە ناو خودی پەکەکە خۆی، لە هەر شارێکی باشور تۆڕێکی سیخوڕی تورکیا، لە هەر گەڕەک و شەقام و گوندێکدا، چاوی تورکیا لە ڕێی ئەم هێڵی خیانەتەوە لەسەر هەر جوڵە و چالاکییەکی سەربازی و سیاسی پەکەکە بێت، بۆیە ئەگەر پەکەکە گەرەکییەتی ڕێز لەو سەرمایە مرۆییە پڕ ئیرادە و گەورەیە بگرێت کە لە بەردەستیدایە، دەبێ بەر لە هەر شتێک پێداچوونەوە بە فۆرمی پەیوەندی و جوڵە و چالاکییەکانیدا بکاتەوە. دەبێ بزانیت لە بەرامبەر دەوڵەتێکی فاشیستدا، کە دونیای لیبراڵ و دیموکرات کۆمەک بە چنگی خوێنینی دەکەن، دەوڵەتێک هێزی ئەوەی هەیە گەرای هێڵی خیانەت لە ناو کورد خۆی بە خودی پەکەکەشەوە دابنێت، دەوڵەتێک پێگە سیاسی و جوگرافی و دیپلۆماسییەکەی دەرفەتی ئەوەی پێدەدات، لە بەرامبەر وڵاتانی گەورەی ناتۆدا کارتەکانی بەرژەوەندییە ستراتیژییەکانی خۆی ڕابکێشێت، ئیدی مامەڵەکردن لەگەڵ هێزێکی لەم جۆرە دەبێ بە عەقڵێکی وردتر، لێکدانەوەی وردتر و دوور لە هەڵچوونی ئایدیۆلۆژی و غروری عەسکەرییەوە بکرێت

ئەم وتارە دەربڕی بۆچونی نووسەر خۆیەتی