هەرێمی کوردستان لە سیساڵی
تەمەنیدا ، نەک هەرخاوەنی ستراتیژ نەبووە
، بەڵکو نەیتوانیوە وەک زانست لەسیاسەت بڕوانێ ۰
یەکەم / سیاسەت لەسادەترین
پێناسەیدا بریتییە لە هونەری مومکینات ، هەرێم
لەهەندێ قۆناغدا دەستی بردووە بۆ هەندێ ریسک و سەرکێشیی کە ئاییندە و لێکەوتە فرەڕەهەندەکانی
ئەو کەیسانەی لەرووی سیاسیی و یاسایی لێکنەداوەتەوە ، بەنمونە ئابووری سەربەخۆ و
پاشانیش ریفراندۆم ۰
بێگومان گەر دیراسەیەکی
وردی بۆسیاسەت وەک زانست بکردایە ، بەمانایەکی دیکە ؛ ئەگەر هەبوونی هەرێمی لەنێو
ستراژییەتی ئەمریکا وەگیرکەوتبا ، هەرگیز بەم دەردەی ئێستا نەدەچوو ۰
دووەم / سیاسەت بریتییە
لە ؛ هونەری بەڕێوەبردن :
بەڕێوەبردنی دەسەڵاتەکان
( یاسادانان و جێبەجێکردن و دادوەری ) ، بەدیاریکراویش پرسی ئابووری و ژیانی
ئابووری ، پرسی عەدالەت و بەهاکان و چاکەی گشتی ۰
ئەو دوو خاڵەی سەرەوە
پێماندەڵێ کە ؛ سیاسەتکردن میزاج و کەللەڕەقی نییە ۰ ئەکتی سیاسی ، بڕیاری سیاسی ، دیراسەی فرەڕەهەند
و زانستیانەی گەرەکە ، کە بارگراوی بێت بەتوخمی
ئەخلاق ۰
لەسایەی بڕیاری ئابووری
سەربەخۆدا ، هەرێم و خەڵکەکەی دەساڵە باجی ئەو هەڵە سیاسییە دەدات "لەشوباتی ۲۰۱٤ بودجە لەبەغداوە قوت کرا " ، لەو کاتەوە و لەو ۱۲۰ مانگەدا ، تاکە مانگێک نەبووە کە موچەخۆر دڵنیابێت لەموچەی مانگی داهاتوی !
لەکاتێکدا تاکی کورد
گومانی لەوە نەبووە کەدەسهاتی نەوتیی و نانەوتی بەزیادەوە بەشی موچە و خزمەتگوزاریش
دەکات ! حکومەتیش شەرمنانە و لەژێر لێوەوە دانی دەنا بەهەبوونی گەندەڵی ( پرۆژەی
چاکسازی ) ۰
لەئێستادا ، حکومەتی فیدراڵ
و دادگەی فیدڕالی :
۱ - بەئاشکرا فرۆشتنی نەوتی لێقەدەغە کردووییت ۰
۲ - بودجەت لە بەغدایە ۰
۳ - پەرلەمان و ئەنجومەنی پارێزگاکانی لێهەڵوەشاندویتەوە
و حکومەتۆکەش بووەتە کاربەڕێکەر ۰
٤ - کۆمیسیۆنت هەڵوەشاوەتەوە و بەغدا سەرپەرشتی
هەڵبژاردنەکانت دەکات ۰
ئیدی تاکەی سیاسەت وەک
هونەری مومکینات تەماشا ناکەیت ؟
بۆچی موچەخۆران بەبارمتە
دەگریت و داتا و زانیاری موچەخۆران نادەیت بەبەغدا و ٫ موچەی موچەخۆران هاوشێوەی عێراق
جێگیر ( توطین ) نەکرێ و ، پلەبەرزکردنەوە و ماف و ئیمتیازاتی خانەنشینان هاوشێوە
نەکرێ ؟
ئەقڵ لۆژیکیش ئەوەمان
پێدەڵێ ؛ موچەخۆرە راستەقینەکانی هەرچوار پارێزگاکە ئارەزوی تەوتینی موچەدەکەن ، نەلەبەرئەوەی
دوژمنی خۆیان و کیانەکەیانن ، بەڵکو لەبەرئەوەی دەساڵی رەبەقە بەناوی کوردایەتیەکی
موزەیەف ، ستەمیان لێدەکرێ و لەبەرانبەریشدا ڤیگۆری سیاسی دەسەڵاتدار بوونەتە خاوەنی
دەیان ملیارد دۆلار ۰
بەبۆچونی من ؛ بەردەوام
بوونی دەسەڵاتدارانی هەرێم لەسەر کەللەڕەقی و دوور وەستان لەبەغدا و ، بەمانایەکی
دیکە بەشدارینەکردن لە سەکۆی بڕیاری سیاسی عێراق ، ئەوە لەقۆناخی یەکەم و لەئێستادا موچەخۆران زەرەرمەندی یەکەم دەبن و ،
لەداهاتوشدا کورد وتەنی ( ئەوبایە لەو کونەوە بێت ) دەسەڵاتدارانی هەرێم زەرەرمەندی
گەورە دەبن و ، رەنگە بەغدا لەرێی دادگا ، دەیان دۆسییەیان بۆ بکاتەوە ۰
ئەم وتارە دەربڕی بۆچونی نووسەر خۆیەتی