سەرکەوتی جیهازو بەختیار نامیق
پێش ئەوەی ڕاستەوخۆ باسی هاتنی سوپای تورکیا بکەین و بچینە ناو داتای سەربازییەوە تا بزانین چەند سەرباز و چەند درۆن و چەند زرێپۆش سنوریان بڕیوە ، دەبێت بچینە پشتی ڕوداوەکانەوە بزانین هۆکارە سیاسی و سەربازی و ئابوری و جوگرافییەکانی چین و بۆچییە ..؟
ئەگەر جیهان لەبەردەم گەڕێکی تری جەمسەربەندیدا بێت ، هێزی وڵاتان بە جۆرێ لە جۆرەکان بەرەو دابەش بون بچن بەسەر دوو هێزی باڵادا ، ئەوا شوێنێک ، ڕوداوێک ، قوشبنێک نادۆزینەوە لە دەرەوەی کاریگەری ئەم دابەش بونەدا بێت، وڵاتان بۆ ئەم دابەشکاریە کار دەکەن تا ژمارە بن لە ناو بازنەی دابەشکاریەکەدا و نەکەونە دەرەوەی ئەم بازنەیە ، تورکیا هەم وەک جیوپۆلەتیک هەم وەک هێز و مێژوو دەوڵەت بە هەمو پێشێلکارییەکانیەوە ڕۆڵێکی گرنگی هەیە ، هەر ئەم ڕۆڵەش وای کردوە چەندین ساڵە دەوڵەتێکی فاشیستی ڕەگەزپەرستی فراوانخواز بتوانێ زۆرترین پێشێلکاریی بکات و دەوڵەتەکانی دنیا چاوپۆشی لێبکەن ، لەم چوارچێوەیەدا ئۆپراسیۆنەکانی تورک نە تازەیە و نە ڕوداوێکی خێرایە، بەڵکو مێژوی تورک لەدەوڵەتی عوسمانیەوە تائێستا پڕە لەم سەرکێشیە نایاساییانەو بگرە لەناوخۆی تورکیاشدا هەمان پێشێلکردن‌و سەرکێشی هەیەو دنیاش جگە لەسەر شاشە درۆزنەکان نەک هیچ هەڵوێستێکیان نییە بگرە لەبەر بەرژەوەندی گرێدراویان بەتورکیاوە لەدۆخێکی تەواو بێدەنگی و بێویژدانیدایە، دواجار تورکیا کاتێک ئۆپراسیۆن بۆ ناو هەرێمی کوردستان دەکات نە تازەیەو نە جێی سەرسوڕمانە، بگرە کاری خۆیەتی ناوبەناو بەهەر چواردەوەری خۆیدا ئەم داگیرکاریە ئەنجامدەداو بگرە بەسەدان میل دور لەسنوری خۆی فراوانخوازی دەکات هەر لەهەرێمی قەرەباغەوە تا دەگاتە لیبیا.
ئەو وڵاتانەی کە دەتوانن ڕوبەڕوی ئەم داگیرکارییە ببنەوە تەنها سەیرکەرێکی درۆزنن و هیچی تر ، بینیمان لە داگیرکاری عەفریندا بە دۆستەکانی کوردەوە ( لە سیاسەتدا دۆست نیە بەرژەوەندی هەیە ) هیچ هەڵوێستێکیان نەبو ، تورک بە بیانوی پاراستنی سنوری ( ئاسمانی و ئاوی و وشکانی) ەوە بەردەوام ئەم ئۆپراسیۆنانە لە ژێرناوی جیاواز جیاوازدا ئەنجام دەدا، بگرە لەوەش خراپتر دەکات کە گروپی ئیسلامی تیرۆریزمی جیهانی دروستدەکات و هەڕەشەش بوە بۆ سەر جیهان و کەسیش بەکوردییەکەی خۆمان پێیان نەوتوە بەری چاوت کلی پێوەیە، جگە لەکۆمەڵێک سزاو فشەی بەیاننامە، تورکیا بۆ پاراستنی یەکێتی ناوەکی خۆی پێویستی بەدوژمنێکی دەرەکی هەیە تا وێنەی شەیتانی بداتێ لەبەرامبەردا خۆی بەڕەحمان‌و قوربانی پیشانبدات.
تورکیا لەهەموو لایەنێک زیاتر پێویستی بە پ.ک.ک هەیە تا بیکاتە ئەو دوژمنەی خۆی ، لە کاتێکدا کورد نەتەوەیەکی ڕەسەنی مێژویی ئەم ناوچەیەیە و تورک خێڵێکی داگیرکار بوە و کورد مافی خۆیەتی بەرگری لە خۆی بکات لە ڕێگەی شۆڕشەوە ، وڵاتانی زلهێزی جیهانی و ناوچەیی دانەنیشتون تەنها سەیرکەر بن بە تایبەت ئێران ، ئێران و تورکیا دوو وڵاتن خاوەنی کاریگەرترین هەژمونن بەسەر ڕۆژهەڵاتی ناوەڕاستەوە هەم ململانێیان هەیە و هەم بەرژەوەندی هاوبەش ، بۆیە بێ ( کارت بە کارت ) و گڵوپی سەوزی ئێرانی نە ئەوەی عەفرینی کردوە نە ئەم ئۆپەراسیۆنەش دەکات، ئەم هێرشە بێ گڵۆپی سەوزی عێراقیش نەبوە ، ئەوە ڕونە کە گڵۆپی سەوز لە تارانەوە بۆ هەر جوڵەیەک دابگیرسێ ئۆتۆماتیکی دوای ئەو گڵۆپی سەوزی بەغدادیش هەڵدەبێ.
کورد لە باشور نە یەکگرتوە نە ژمارەیە لە هاوکێشەکاندا نە دەتوانێ بەر بەم داگیرکاریە بگرێ تاکە کارتێک بەدەست کوردەوە ناوەند و عێراقە ئەویش دەبێت لە تارانەوە کاری لەسەر بکرێ یان لە بەغداد گوشار دروست بکرێ ، کە نەکرا و ناشکرێ ، دواجار بەرژەوەندی نێوان بەغداد و ئەنقەرە لە ڕوی سیاسی و سەربازی و ئابوری و بە تایبەت ئاو زۆر گەورەترە لە بەرژەوەندی بەغداد بە هەرێمی کوردستانەوە ، ئیتر چەند گوندێک خاپور دەکرێ یان چەند سەربازێکی تورک دەکوژرێ یان چەند گەریلایەک شەهید دەبن لە ناو ئەو ڕێککەوتن و سیاریۆیانەدا هیچ ناکات و بۆیان گرنگ نییە.
دواجار ئەوە کوردە دوبارە دەبێت بە چەک بەدەست سیناریۆ سەربازییەکانەوە و گێمێکی تری سیناریۆیی هەرێمایەتی و دەبێتە کارت بۆ فرۆشتن لەسەر مێزی دانوستانەکان.
ئەم وتارە دەربڕی بۆچونی نووسەر خۆیەتی