ئاسۆ عەبدوللەتیف

کاک قوباد وەک کاراکتەرێکی حکومی، لەکاتی لافاوەکەی چەمچەماڵ بینیمان سادەو خاکیانە، دەرقاچەکەی قوڕاویی بووەو گەشتۆتە ناو دڵی کارەساتەکە، هەم وەک سیاسی و ئیداریەک و هەم وەک خۆبەخاوەنزانی دۆخێکی ئاوا کارەساتبارو دڵدانەوەی ناوچەیەکی برینداری میللی هەژارنشین، دەی ئەوە ئیشە راستەکەیە دەست و دەرقاچی بەرپرس و پیاوە حکومیەکان لەم کارەساتە سروشتیانە قوڕاوی بێ و جزمە لەپێبکەن و بچنە ناو قوڵایی ژان و ئازارەکانی خەڵکی لێقەوماو. گەر ئەوەی نەکردایە تۆی ڕاوێژکارو ڕۆژنامەنوسی قسەکەری مارکەخواز چیت پێدەگوت و چۆن سەرزەنشتت دەکرد بەسەد بەڵگەی ناتەبا.

ئێوە بۆچی ئەم دیوە باشەی کاک قوبادو تیمەکەی و دەیان ڕێکخراوی مرۆڤدۆستی و کۆمەکی دەیان سەرمایەدارو ئەو ئاکارە میللی و تۆلێرانسە جوانە جەماعییە نابینن و هەر خەریکی تەعلیل و تەعلیقین.

بۆ ئەبێ تۆ هەرقسەبکەیت و وەک بەڵگەی پاکبوونەوەو ئەستۆپاکی و بەکەم سەیرکردنی دیمەنەکەو ئاکتینی سیاسی تەفسیری بکەیت، یان وەک ڕێکارێکی ئیداری و بەهاناوە چوونێکی ئینسانی کردەکە نەبینی، یان وەک وەزیفەیەکی چاکەخوازو گیانی هاوکاریی و بەدەمەوەبوونی کۆمەڵایەتیانەی یەکتر تەماشای نەکەی.

ناکرێ ئاوا بەموتڵەقی دژی جوانی و ناشیرینیەکانی کۆمەڵگا بەگشتی قسەو لێدوان بدەن هەر لەبەرئەوەی قسە بکەی، یان چەمکی فریشەو شەیتان، قوربانی و جەللاد، تێکەڵاو بکەن و قەزاوەت و دادوەری سیاسیانە بۆ ئەو پرسانە بکەن، ئەوە شتێکی خراپەو دەردە، جۆرێکە لە نەخۆشی دەرونی و سایکۆپات.

ئەم وتارە دەربڕی بۆچونی نووسەر خۆیەتی