مامۆستا جەعفەر

ماوەیەكە كەسانێك، لە سەنگەری دژایەتی یەكێتیەوە، لە پەنا و پەسێری تۆڕەكۆمەڵایەتییە نابەرپرسیارەكانەوە ژەهراوی خەست دەڕێژن. كەسوكاری شەهید شیهاب و شەهید ئارام، گەورەییان نواند و پەیوەندیان پێوەكردم. بە هەمانشێوە چەند بەرپرسێكی یەكێتیش پەیوەندیان پێوەكردم. جەختیان لەسەر ئەوە كردەوە: (دەستێكی گومانلێكراوی هەواڵگری دژ بە هەموو مێژووی یەكێتی كەوتووتە جوڵە، بە حیسابی خۆی  دەیەوێت: شكۆ، شانازی، رەمز و سمبۆلە جوانەكانی ئەم گەلە بشێوێنێت).
ئەوەی پەیوەندی بە یەكێتیەوە هەیە، ئەوە لە دەرەوەی بازنەی بەرپرسیارێتی منە: یەكێتی مەكتەبی راگەیاندن و گوتەبێژی خۆی هەیە و دەتوانێت لە رێگەی قانونەوە داكۆكی لە مێژووی خۆی بكات، ئەگەر هەر بە راست ئەم مێژووە بە مێژووی خۆی دەزانێت!
من وەكو كەسێكی ئەكادیمی، دوور و نزیك كاك شیهاب و كاك ئارامم دەناسی، ئەو كاتە ئەندامی كۆمەڵەش بووم. لە سۆنگەی نزیكایەتیمەوە لە گەڵ ئەندامانی ئەم دوو بنەماڵەیە، دەمەوێت ئەم روونكردنەوە كورتە پێشكەش بكەم:
یەكەم: لەڕووی خزمایەتیەوە; شەهید شیهاب و شەهید ئارام ئامۆزای یەكتری بوون. پێكەوە لە یەك  رێكخراودا كاریانكردووە. كاك شاسوار، كاك شیهابی بە برا گەورە داناوە. لەوانەشە لە قۆناخێكی گەنجایەتیدا پەیوەندی لێوەفێربوون: پەیوەندی مامۆستا و قوتابی لە نێوانیاندا هەبووبێت. من لە كاك ئارامم بیستووە، ساڵی 1974 هەردووكیان پێكەوە ویستوویانە سەردانی رەوانشاد ئیدریس بارزانی بكەن. كاك ئارام پلەی جێگری وەزیر بوو (ئەمانەی عەدل و ئەوقاف). جارێكیش لە رێگەی رەوانشاد هادیە سوور و فازیل سۆرانیەوە هەوڵی دیدارێك دراوە. بارزانی نەیویستووە بیانبینێت. لەوە دەچێت ئەم هەوڵی یەكتری بینینە، پاش راگەیاندنی رێكەوتننامەی جەزائیر بووبێت: بۆ رێكخستنی بەرەنگاری و درێژەپێدانی شۆڕش. پرسیارەكەی من ئەوەیە: ئەگەر ئەم  دوو كەسایەتیە ئەوەندە ناكۆك و دڕدۆنگ بووبن: ئەدی بۆ پێكەوە دەیانەوێت سەری بارزانی بدەن؟
چەند كەسێكی تر لە سەركردایەتی هەبوون، لە ناو كۆمەڵەدا، بەرپرسیارێتیان لە كاك ئارام باڵاتر بووە و زۆربەی كاتیش لەگەڵ كاك شیهابدا  پێكەوەبوون; بۆ ئەم دووانە پێكەوە دەیانەوێت ئەم دیدارە بكەن؟
شتێكی سروشتیە لە نێوان ئەم دوو كەسایەتیە گەورەیەدا، تێگەیشتن و دنیابینی و تێڕوانینی جیاواز هەبووبێت. ئەوە راستە لە هەندێ قۆناخدا رەخنەیان لە یەكتری گرتبێت; سەبارەت بە: تەكنیكی كاركردن و رێكارەكانی رێكخستن، هەر یەكەیان لە گۆشەنیگایەكەوە هێشوەكانی رێكخستنی بینیوە. لەڕووی ئایدیۆلۆجیایوە: دەربارەی چەمكی (ئەندێشەی ماوتسیتۆنگ) لای كاك شیهاب زۆر خەستوخۆڵ بووە. لە كتێبی(بە خەونی گەورەوە كەوتینە رێ) باسی لایەنی ترم كردووە. لە گەڵ ئەوەشدا، ئامۆزا و هاوڕێ بوون و رێزی یەكتریان زۆر گرتووە.
دووەم: كاك شیهاب و مامۆستا جەعفەر و هاوڕێكانی تری گروپی زیندان،  بیستوویانە (كۆمیتەی هەرێمەكان) دروستبووە، كاك ئارام رۆڵی رابەرایەتی لە ناو كۆمەڵەدا  دەگێڕێت. زۆریان پێباشبووە و داوایان لەو هاوڕێیانە كردووە، كە سەردانیان دەكەن پشتیوانی كاك ئارام و (كۆمیتەی هەرێمەكان) بكەن.
كاك ئارام چەند جارێك برای بەڕێز حاجی مەمۆ (مامۆستا عەباس محەمەد) دەبینێت. حاجی مەمۆ ساڵی 1974 لێپرسراوی كاك شاسوار جەلال بووە. هەردووكیان هاوڕێی گیانی بەگیانی یەكتری بوون. ئەو نامەیەك بۆ كاك شیهاب و مامۆستا جەعفەر دەنووسێت، كە ئەو كاتە لە زیندان بوون. نامەكە بە كورتی لە سەر (راپۆرتی شوبات) بووە. كاك شیهاب و مامۆستا جەعفەر بە دڵ و بەگیان پشتیوانی خۆیان بۆ (كۆمیتەی هەرێمەكان) و كاك ئارام دەردەبڕن. ناوەڕۆكی (راپۆرتی شوبات)یش بە ئەرێنی دەبینن.
كەواتە: شەهید شیهاب و  تەواوی گروپی زیندان، لەو قۆناخەدا دروستبوونی (كۆمیتەی هەرێمەكان)یان  پەسەند كردووە. بە هیوای دواڕۆژێكی باشتر بەدیبێت و فریادڕەسی گەلێك بن، لەو رۆژگارە رەش و تاریكە گەلی كورد دەرباز بێت.
سێیەم: ئەگەر هەر بە راست لە سەر لاپەڕەكانی (راپۆرتی شوبات) هێرشی توند كرابێتە سەر سەركردایەتی پێشووی كۆمەڵە، گوایە: بە (لادەر) ناوبرابن، دەبوایە كاك شیهاب و مامۆستا جەعفەر هەڵوێستتێكی نەرێنی و نێگەتیڤیان بەرامبەر كاك ئارام هەبوایە. كەچی دەنگوباسی تەم و مژی گرژی پەیوەندیەكان بەر گوێی كادرە دێرینەكان نەكەوتووە. ئەو كاتە لە ئەدەبیاتی كۆمەڵە دا چەمكی (لادەر و مادەر) هەر بەكارنەدەهات.
هەركەسێك ئیدیعای ئەوە بكات: گوایە نوسخەیەكی (راپۆرتی شوبات)ی لایە و بڵاویدەكاتەوە. ئەو ئیدیعایە لووتكەی ناڕاستگۆیی و چەواشەكاریە.
ئەوە كەسێكە، بە حیسابی خۆی، دەیەوێت بە ئەقڵی خوێنەری ئازیز پێبكەنێت.
دە دوانزە ساڵ لەمەوپێش برایانی (بنكەی ژین) گوتیان: (راپۆرتی شوبات)مان دۆزیوەتەوە. سەیرمكرد بڕوام نەكرد! بۆ دڵنیابوون  پیشانی چەند هاوڕێیەكی شەهید ئاراممدا. هەموویان لە سەر ئەوە كۆك و هاوڕابوون. ئەو چەند لاپەڕەیەی دەست ئەوان كەوتووە (راپۆرتی شوبات) نییە. مامۆستا حاجی مەمۆ كاتی خۆی، نوسخەیەكی تایپكراوی لابووە. ئەو پێش ئەوەی رووبكاتە شاخ، لە ناو چاڵێكدا قایمی كردووە. پاش راپەڕین; راپۆرت و نامەو كاغەزەكان دەردەكات، بەڵام مەخابن بەشێوەیەك رزیو بووە. تەنانەت لە سویدیش نەتوانراوە چارەسەر بكرێن و لێكیان جیا بكەنەوە.

چوارەم: هیچ بەڵگەیەك بەدەستەوە نییە، گوایە: (راپۆرتی شوبات) دەست دەزگایەكی هەواڵگری رژێمی عێراق كەوتبێت. هەزاران “مەلەف” دۆزراوەتەوە. یەك مەلەف ئاماژەی تێدا نییە، ئەم بەڵگەنامەیە دەست دەزگای هەواڵگری رژێم كەوتبێت. قسەی فڵان و فیسار لە قسەكانی مەلای مەزبوورە دەچێت! با یەك زیندانی كۆمەڵە بڵێت: لە كاتی لێپێچینەوەدا باسی (راپۆرتی شوبات)یان لە گەڵ كردووم؟

من گوێم بۆ زۆربەی ئەوانە رادێراوە، كە چاویان بەو پۆستانە كەوتووە، كە لە تۆڕە كۆمەڵایەتیەكاندا بڵاوكراونەتەوە. لای هەموویان كارەكە جێگای گومان و نەفرەتە. خەڵكی دڵسۆز و راستگۆ و رەوشت بەرز ، دەست بۆ یاریەكی وا قێزەوەن نابات....
*ئەندامی دێرینی ناوەندی كۆمەڵەی رەنجدەرانی كوردستان

ئەم وتارە دەربڕی بۆچونی نووسەر خۆیەتی