شارپرێس
لە میانەى دیدارێکیدا
لەگەڵ باڵیۆزی فینلەندا، سەرۆکی یەکێتی ڕایگەیاند، پابەندین بە سەقامگیریی وڵات و
دەستەبەركردنی ژیانێكی شایستەوە بۆ خەڵكەكەمان و هەردولا هاوڕابوون هەڵبژاردنێكی بێگەرد
لە وادەی دیاریكراوی خۆیدا ئەنجامبدرێت.
بافڵ تاڵەبانی، سەرۆکى
یەکێتى لەگەڵ ئانو سارێلا، باڵیۆزی فینلەندا لە عێراق کۆبویەوە و دوایین گۆڕانكارییە
سیاسی، ئابووری و ئەمنییەكان گفتوگۆیان لەبارەوەكرا، جەخت لە بەردەوامیی گفتوگۆكان
و هەماهەنگیی نێوان هێز و لایەنە سیاسییەكان كرایەوە لەپێناو چارەسەركردنی كێشەكان
و ئاڕاستەكردنی وڵات بەرەو سەقامگیری.
هەروەها سەرۆکى یەکێتى
هەڵوێستی یەكێتی لەبارەی كۆی هاوكێشەكان روونكردەوە و رایگەیاند، ئێمە پابەندین بە
سەقامگیریی وڵات و دەستەبەركردنی ژیانێكی شایستەوە بۆ خەڵكەكەمان، هەموو هەوڵەكانیشمان
لەپێناو كۆتاییهێنان بە ناكۆكییەكان و گەیشتن بە ئەنجامێكە كە ئاشتی و ئاوەدانی بەدوای
خۆیدا بهێنێت.
لەبارەی بەڕێوەچوونی هەڵبژاردن
لە هەرێمی كوردستان، هەردوولا هاوڕابوون هەڵبژاردنێكی بێگەرد لە وادەی دیاریكراوی
خۆیدا ئەنجامبدرێت و ببێتە مایەی ئارامیی سیاسی، بەرەوپێشچوون و بەهێزتركردنی پایەكانی
دیموكراسی لە هەرێمەكەمان.