ئەو دۆخە نەخوازراوەی کەلەئێستادا خەڵکی کوردستانی تێکەوتوە جگە لەسزادانێکی بەکۆمەڵ کەزۆرینەی چین و توێژەکان ، پێکهاتە و ناوچە جیاوازەکانی هەرێمی کوردستانی گرتوەتەوە هیچ پێناسیەک و هیچ فۆرمێکی دیکە ناگرێتەوە.
ئەم سزادنە جەماعیە کە ڕیشەکانی لەناو ئەزموونی ٣٢ ساڵ حوکمڕانی شکستخواردووی خۆماڵیەوە ڕەگی داکوتاوە ، دواجار درێژبوەتەوە بۆ سێکتەری دیکە و بەشێوەی ناراستەوخۆ بونەتە هۆکاری زیاتری ئاریشەی دەروونی ، خێزانی ، کۆمەڵایەتی لەکۆمەڵگەی ئێمەدا و هێندەی تر ناخی مرۆڤیان لەم هەرێمەدا بیمارتر و تێکشاوتر و هەنجن هەنجتر کردوە.
بەمانایەکی تر، رەهەندەکانی سزادان لەناو کۆمەڵگەی کوردیدا هەر بەتەنها فۆرمە سیاسی و دەسەڵاتداریەکە ناگرێتەوە، بەڵکو رۆژانە دنیایەک لەمەکینەی ئیعلامی و هەواڵی هەڵبەستراوی بەپەلە و موژدەی پر لەچەواشەکاری ، بوونەتە بارگرانیەکی تر بەسەر شانی هاوڵاتی بێدەرەتان و بێ نان و بێ موچە لەم هەرێمەدا.
لەولایشەوە بریارەکانی بەغداد ، چ لەئاستی حکومەت ، چ لەئاستی دادگا ، چ لەئاستی پەرلەمان نەیانتوانیوە بەرهەمێکی بەرجەستەکراوی دڵخۆشکەر بۆ خەڵک بهێننە بوون. نەک هەر ئەمە بەڵکو لەهەندێک رەهەندەوە ئەم بریارانە ئەوەندەی تر باری لاری خەڵکی کوردستانیان خوارتر کردوە و جگەلەوەی کە لەهەندێک چرکەساتدا دابەشبوونی زیاتری کۆمەڵگەکەیان دروست کردوە ، هیچیان لێ شین نەبوە. وەک بەڵێنی قەبەو و بڕیاری بێکردار ماونەتەوە.
هەر لەکوررستانەوە بۆ بەغداد، لەئاستی سیاسی ، ئیداری ، ئیعلامی ، هەمویان خۆیان بەفریاد رەس دەزانن بۆ خەڵک و خۆیان لێکردوینەتە فریشتە ، کەسیش نازانێ بەم مانگی رەمەزانە شەیتان کێ یە و لەکوێ یە.
حیزبە بەشدارەکانی دەسەڵات ، نەک خۆیان بەبەرپرسیاری ئەم دۆخە خراپەی هاوڵاتیان نازانن ، بەڵکو کەهەندێکجار گوێت لەوتەبێژ و دەمراستەکانیان دەبێت ، وەختە خەڵک قەرزار بار دەبن. رێک وەکو بەسەرهاتی دایکی هاوڕێکەمی لێهاتوە. ( لەکۆتایی نەوەدەکان ، دایکی هاوڕێیەکم لەحەوشەی ماڵەوەیان نان دەکات، لەوکاتەدا دەرۆزەکەرێک ( سواڵکەر ) تەقەی دەرگا دەدات و دەرگاکە دەکرێتەوە. دایکی هاوڕێکەیشم کەدەزانێ سواڵکەرەکە داوای پارەی لێدەکات ، هەر لەشوێنی خۆیەوە و لەسەر نانەکە هەڵناسێ و بەتیرۆکەکەی دەستی ئیشارەت دەکات و دەڵێ بەخوا دایکەکەم ئەوە کچەکەمە سەیری بکە دەمێکە بۆ پارە دەگری و دەپارێتەوە منیش هیچم پێ نیە بیدەمێ. سواڵکەریش نایکاتە نامەردی و دەڵێ ئەوە بەراستە ئەو منداڵە جوانە بۆ پارە دەگری؟ وەڵا من ئێستا پارەی دەدەمێ ، هەر لەدوورەوە یەک دیناری ئاسنی بۆ هەڵدەدات و ماڵئاوایی دەکات ) جا ئێستا دۆخی نێوان دەسەڵات و خەڵک ، خەریکە وەک دەرۆزەکەرەکەو دایکی هاوڕێکەمی لێدێت. هەر ئەوەی ماوە خەڵک پارە بداتە حکومەت( هەرچەند خەڵک ئەو پارەیەیشی پێ نەماوە )
پێشتر هەر ئەم دەسەڵاتەی لای خۆمان بوو ، بەڵام ئێستا بۆ نەگبەتی ئەوانەی بەغدایشی هاتوەتە سەر و رۆژێک بە مەسەلەی ناردنی لیست، یان توگینی موچە ، یان هەر شتێکی تر قورەکەیان خەست کردوەتەوە و دواجار تەنها هاوڵاتی نەک کاربەدەستان باجەکەیان داوە ، هەر بۆیە لەسەرەتای مانگی چوار ، خەریکە موچەی مانگی دوو بەموچە خۆران بدەن.
سزادانی بەکۆمەڵی خەڵک، کەلەدەسەڵاتدارانەوە دەستیپێکردوە ئەمێستا میدیایش بزانێ یان نەزانێ بوەتە بەشێک لەوپرۆسەیە.
نەک لەرۆژێکدا، بەڵکو لەسەری هەموو کاتژمێرێکدا ، دەیان مدیایی زۆڵ یا فەرمی ، میدیای سێبەر یا بەرخۆر ، سەدان هەواڵ لەسەر موچە بڵاودەکەنەوە ، بەبێ ئەوەی کەخەڵک لچی بەر یەک دیناری کەوتبێت.
( سەرەتای هەفتە پارەکەی بەغداد دەگات، دادگای فیدراڵی دەڵێ بەهەر شێوەیەک بێت موچە دابین بکرێت، هەژماری من پرۆژەیەکە لەخزمەتی موچە خۆراندایە، هەژماری من ژەهری مارە، سودانی دڵنیایی بەموچەخۆرانی هەرێم دەدات، ئەم هەفتەیە موچەی ئاسایش و پێشمەرگە دەنێررێت، لیستی پلە بەرزکردنەوەمان بۆ بنێرن ، خاتوو تەیف موچەی مانگی دوو دەنێرێ بەڵام سوێندی خوارد موچەی مانگی سێ نانێرێ ، سەرۆکی دادگای فیدراڵی دەڵێ موچەخۆرانی هەرێم وەک باقی پارێزگاکان موچەی خۆیان وەردەگرن، بانکی رافیدەین و رەشید لق لەشارەکانی هەرێم دەکەنەوە، بەدڵنیایی ناوەراستی هەفتە دابەشکردنی موچە دەست پێدەکات) ئەمانە و دەیان بەپەلە و نها و گەیشت و شتی تر بوونەتە تایتڵی سەرەکی راگەیاندنی ئێمە کە دواجار بەناڕاستی سەرچاوە و خودی هەواڵەکانیان هێندەی تر تاکی کوردیان نیگەران و تێکشکاو و بێهوا کردوە.
سزادانەکەی خەڵک لێرەدا ناوەستێ، بەڵکو هەندێک لەنوێنەرەکانی کوردیش لەبەغداد لەم پرۆسە دەوری نێگەتیڤیان هەیە و تێوەگلاون. رۆژێک نیە گوێبیستی لێدوانی پەرلەمانتارێک یان فراکسیۆنێک نەبین لەسەر موچە بەبێ هەبوونی موچەکەیش لەواقعدا.
ماوەتەوە بڵێم: خەڵک خەباتی کرد و خوێنیدا، ئەنفال و کیمیابارانکرا ، شەهیدیدا و زیندانی کرا، ماڵی وێرانکرا و گوندی داگیرا ، تەنها بۆئەوە بوو وەک مرۆڤ بەشەهامەتەوە بژی نەک بۆ ئەوەی بەشەش مانگ یەک موچەی بدەیتێ و لەولایشەوە لەڕێگەی چەندین کەناڵی بارکراو بەپارەی میللەت ئازاری دەروونی بدەیت و لەملایشەوە لەرێگەی چەندین سەرچاوەی جیاجیای وەک باج و رسومات و پارەی ئاو و کارەبا و کامیرا و خۆڵڕشتن و پارەی دەرمانی گرانبەهای ئیکسپایەر و شتی دیکەوە سزای دەستەجەمعی بدەیت.
ئەم وتارە دەربڕی بۆچونی نووسەر خۆیەتی