دەنگدانی ئاشکرا یان دەنگدانی نهێنیی؟

09/05/2019

كەمال چۆمانی

 

مادەی چوار، یەکەم خاڵی پێنجەم، لە قانونی کاراکردنەوەی دامەزراوەی سەرۆکایەتیی هەرێمی کوردستان دەڵێت "سەرۆک لە دەنگدانێکی ئاشکرا..." هەڵدەبژێردرێت. هەندێک کەس رەخنە لەو خاڵە دەگرن. من بەپێچەوانەوە، پێموایە، بۆ پێشڤەچونی دیموکراسیی و شەفافییەت، پێویستە ئەندام پارلەمانان بەئاشکرا دەنگبدەن نەک بەنهێنیی بۆ ئەوەی ئەندام پارلەمانەکان زیاتر هەست بە بەرپرسیاریی بکەن لە بەرانبەر دەنگدەرانیان و گەل.

 

دەنگدەران و گەلیش بتوانن باشتر لێیان بپرسنەوە کاتێک دەنگ بە پرسێک دەدەن کە لەگەڵ ویستی ئەوان و بانگەشەکانی ئەندام پارلەمانەکە لە رابردودا ناگونجێت. بۆ نمونە، لە هەڵبژاردنی سەرۆکی هەرێمدا، هیچ ئەندام پارلەمانێک ناتوانێت خەڵک لە خشتە ببات و بڵێت دەنگی بە سەرۆک نەداوە، بێگومان بۆ ئەو دەنگدەرانەی کە دەنگدان بە سەرۆک بە کارێکی باش نازانن.

 

بەدڵنیاییش دەزانم لە کوردستان پارلەمان و ئەندام پارلەمانان لەلایەن مەکتەب سیاسییەکانەوە قوڕمیش و کۆنترۆڵ کراون، بەڵام لە دەنگدانی ئاشکرادا باشتر ئازایەتیی ئەندام پارلەمانانمان بۆ دەردەکەوێت ئایا گوێ لە ئیرادەی دیموکراسیی و وڵاتییان و دەنگدەران دەگرن یان بەرژەوەندییەکانی مەکتەب سیاسییەکانیان و خانەی راپەڕاندن و ئەنجومەنی باڵا و ئەوانەی لە پشتی مەکتەب سیاسیی و خانەی راپەڕاندن و ئەنجومەنی باڵان.