دوو دیمەن

دوو دیمەن

حەمە ڕەشید


322 جار خوێندراوه‌ته‌وه

دیمەنی یەكەم؛ كوڕەكانی ئەوان‌و كوڕو براكانی ئێمە
كوڕ‌و براكانی ئێمە بۆ كوێلایەتی‌و پاسەوانی‌و ملكەچی‌و گوێرایەڵی لە دایك دەبن، كوڕەكانی ئەوانیش بۆ سەروەریی‌و پاسەوانی لێكردن‌و حوكمڕانی‌و گوێرایەڵی كردنیان لە دایك دەبن، كوڕ‌و براكانی ئێمە لە دایك دەبن بۆ ئەوەی تا مردن، بە رۆژ لە پێناو پاروە نانێكدا گەرماو سەرمای رۆژگار بچێژن‌و شەوانیش لەبەر ئازاری جەستە‌و ماندوو بوون تا دەمەو بەیان گینگل بدەن، كوڕەكانی ئەوان بۆ ئەوەی سەرما‌و گەرمای بێتاقەتیان نەكات، گەرمیان‌و كوێستانی ئەمپەری دونیا تا ئەوپەری دەكەن، شەوانیش بە هۆی سەرگەرمی‌و بەدمەستییەوە،چاوبنێنە خەو، لەپشت سەریانەوە دەیان فرسەتی خوێندن وكاری بازرگانیان بۆ برەخسێنرێت و بەبێ خەم ژیان بەسەربەرن.  كورو براكانی ئێمە لە پێناوی وەزیفەیەكی بچوكدا سەر بە هەزار كوندا دەكەن‌و هانا بۆ دەیان كەس دەبەن‌و چەندین كاژێر لە پرسگەكاندا بە كزۆڵی دادەنیشن، بەڵكو خودا دڵی كوڕەكانی ئەوان نەرم بكات‌و ئیمزای رەزامەندی لەسەر مل پێ كەچ كردنیان دەرببڕن. ئەمەو دەیان جیاوازی دی لە نێوان كوڕو براكانی ئێمە‌و كوڕەكانی ئەواندا.

دیمەنی دووەم؛ حەرامكردن‌و قەدەغە كردن
لە وڵاتێكی وێرانە‌و لێوانلێو لە كوشت‌وبڕو ناشیرینیدا، وڵاتێك ئاسۆی ئایندەیەكی گەشی تیا بەدینەكرێ‌‌و ڕوو هەر لە بوارو سوچێكی بكەیت، روبەروی دەیان نائومێدی ببیتەوە، وڵاتێك ناشیرینترین‌و دزێوترین مرۆڤ حوكمڕانی بكات‌و خێرو بێرەكەی بۆ خۆیان‌و كوڕەكانیان بە تاڵان بەرن، هەژاری‌و نەداری‌و دوژمنایەتی‌و دڵڕەقی‌و شەڕی تائیفی‌و ئەتنیش وەك جەژنانە بەسەر خەڵكەكەیدا دابەش بكات، كەچی هەر رۆژەی شتێكیشیان لێ حەرام بكرێ‌، رۆژێك پانتۆڵی سێ چارەك لە گەنجە خێر لە خۆنەدیوەكانیان قەدەغە بكەیت‌و گەر یەكێكیش لەبەری بكات، ئەوا بە ناو پاراستنی دابونەریت‌و بەها بەرزەكانی ئایین‌و كۆمەڵگە سوكایەتی دونیای پێ دەكرێ‌، رۆژێك تەماشاكردنی دراما، یا فیلم یا گەمەیەكی لێ قەدەغە دەكرێ‌، رۆژێك مەیفرۆشی لێ حەرام دەكرێ‌، رۆژێكی دی فلتەر لەسەر كەناڵ و سایتە سێكسییەكان دادەنرێ‌، وەكئەوەی فیلمە سێكسییەكان ئەم وڵاتەیان كردبێت بە وێرانە. 

وڵاتێك هەر لە رۆژی دروستبوونییەوە هاوڵاتییەكانی بە دەردەسەری‌و ماڵوێرانی‌و شەڕوشۆڕ‌و بە سەدان نەخۆشی دەرونییەوە رۆژگاریان بەسەر بەردبێت‌و ئایندەیەكی تارێك‌و تاڵیش چاوەڕوانیان بكات، كەچی رۆژانە داوای ئەوەیان لێبكرێ‌ لە پێناوی پیرۆزی خاك‌و نیشتماندا گیانی خۆیان بە قوربان بكەن‌و سەرو ماڵیان بۆ فیدا بكەن، ئایا هەر بە راستی نیشتمانێك كەرامەت‌و خۆشنودی هاونیشتمانییەكانی پارێزراو نەبێت، شایستەی ئەوەیە قوربانی بۆ بدرێت؟ 

حەمە رەشید



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved