دواجار مورسی لە زینداندا كۆچیكردو جیهانی لە نێوان دوو بەرداشی هاوسۆزیو شاگەشكەبوون دابەشكرد، بەشێكی زۆر بە پاساوی ئاینییو هەڵبژاردن وەك قوربانی تەماشای دەكەن، بەو پێیەی مورسی وەك تاكە ئەلتەرناتیڤی دیموكراسی دوای ستەمكاری موبارەك دەبێتە ئایكۆنی قۆناغی دوای بەهاری عەرەبی میسری، بەڵام بەشێكی دیكەش لەبنەڕەتەوە بە پاساوی قۆستنەوەی خەونەكانی ئازادبوونی مرۆڤو كۆمەڵگاو خۆحەشاردان لە پشت ناڕەزاییەكانی شەقامی عەرەبەوە، ئەو پیاوە كۆچكردووە وەك دوژمنو بەڵای ئازادی تەماشا دەكەن، لەنێوان ئەو دوو دنیابینیەدا، كە یەكێك مورسی دەكاتە فریشتەو ئەوی دیكە دەیكاتە شەیتان، راستیەكی دیكە هەیە، حەقیقەتێكی تر هەیە، ئەو راستیو دروستییە بریتییە لە دیدگای میسرییەكان خۆیان.
چیرۆكی هاوڵاتییەكی كوردو لیبی لەكۆتایی نەوەدەكان سەرنجی راكێشام، ئەوكاتەی لە شەقامێكی پاریس پێكەوە دەكەونە گفتوگۆ، كوردەكە ستایشی قەزافی دەكاتو لیبیەكەش ستایشی سەدام، لەكاتێكدا هەردوكیان راكردووی دەستی ئەو دوو زۆردارە بوون، لەراستیشدا بەریەككەوتنی كوردەكە لەگەڵ سیاسەتو سەركێشیو ستەمكاری سەدام لە هاوسۆزی لیبیەكە دروستتر بووەو بە پێچەوانەشەوە چەرمەسەری لیبیە راكردوەكە دەرهەق بە قەزافی لە هاوسۆزییە نەتەوەییەكەی كوردەكە بۆ قەزافی دروستتر بووە، ئەو نموونە بۆ ئەوەیە نیشانی بدەین كە لەبنەڕەتەوە، مافی گەلانە هەڵسەنگاندن بۆ حوكمڕانو دەسەڵاتدارو چەشنی سیستەمی سیاسی خۆیان بكەن، نەك خەڵكانی تر، لەجوگرافیای ترو نەتەوەی ترو پێكهاتەی تر شاباش بەسەر ئەوانی تردا هەڵبدەن.
لەراستیدا كەوتنی مورسی، تەنها كەوتنێكی سەربازی نەبوو، بەڵكو دەركەوتنی سیسی وەك فریادڕەس جا چ بە پاساو و پشتبەستن بە سەربازو هەواڵگریو دامەزراوەو دەولًەتانی جیهان بووبێت، نیشانەی ئەوەش بوو كە حوكمی ئاینیی ئیخوان و مورسی لە كۆمەڵگەی كراوەی میسری شكستی خواردبوو، ئەو هاوسۆزییە ئاینیەی كە ئێستا تۆڕە كۆمەڵایەتییەكانی تەنیووە لە بنەڕەتەوە، خوێندنەوەی سەرچیخو سەرپێی روداوەكانە، ئاخر كاتێك لەدیدی میسرییەكانەوە لە سیاسەتو دەوڵەتداریو سیاسەتی ئابوریو مامەڵەی هەرێمییو نێودەوڵەتیو دابەشبوونی كۆمەڵگا لەسایەی مورسی دەڕوانین دەزانین، كە ئەو سەرۆكە كۆچكردووە هێندەش فریشتە نەبووە، كە ستەمی لێكرابێت، بەڵكو ئەوەی لەپشت ئەو روداوانەیە، دواجار سەركێشیو رادەستكردنی رابردوو و ئێستاو داهاتووی میسرییەكان بوو بە دەوڵەتانی تر، گەر باوەڕیش ناكەن، خەیاڵی مورسی گەیشتبووە ئاستێك خەریك بوو هەرەمەكانیش بەسەر قفڵانە بداتە دەوڵەتانی كەنداوو مێژووش لە میسرییەكان بسەنێتەوه
ئاری عومەر
ئەم وتارە دەربڕی بۆچونی نووسەر خۆیەتی