(سیڤی)، پێشمەرجی دەوڵەتمەداریی نیییە!

(سیڤی)، پێشمەرجی دەوڵەتمەداریی نیییە!

ڕێبوار سیوەیلی


791 جار خوێندراوه‌ته‌وه


بەڕێز مەسروور بارزانی،
وێڕای سڵاو،

1. ئەزموونی خەباتی گەلان و هەوڵدانیان بۆ پێكێهنانی دەسەڵاتی سەربەخۆ، یان حكومەت، ئەوەمان پیشاندەدات، كە سیڤی، یان كارنامەی نووسراوی كەسەكان، پێشمەرجێكی گرنگ نییە. پێشمەرجی گرنگ توانایی و لێهاتوویی و ئەزموونی كەسەكانە، لەو بوارەدا كە ئەركەكەیان پێدەسپێردرێت.

2. مەسەلەی سیڤی، بۆ بەشداربوون لە حكومدا مەرجێكی سەرمایەدارانەی نوێیە تاكو هەڵبژاردەی سیاسی بەهۆی سیڤییەكەیەوە خۆی لە ئەوانیتر جیا بكاتەوە، لە سیڤییشدا، ئەوەی گرنگە بڕوانامەیە، كە زۆرجاریش دەركەوتووە ساختەیە.

3. دەمەوێت ئەوەشت بەبیر بهێنمەوە، كە لەوڵاتی ئێمەدا و دوای ئەزموونێكی زۆرم لە بواری زانكۆییدا، بۆم دەركەوتووە، كە بەدەستهێنانی بڕوانامە لەم زانكۆیانەی ئێمەدا، زۆر ئاسانە و زۆربەی كات بۆتە سێبەرێك بۆ ئەوانەی كەشخەیی بەسەر كۆمەڵگاوە دەكەن.

4. قەرار نییە حكومەتی نوێی ئیمە لەسەر بنەمایەكی بزنسزمانی دامەزرێت، تا مەرجی سیڤی ببێتە پێشمەرجێكی بنەمایی. ئەم حكومەت لیژنەیەكی باڵای زانستییش نییە، تا ئەوانەی تێیدا بەشداریی دەكەن، پڕۆفیسۆر بن. پێویستە حزبەكان باشترین و لێهاتووترین كەسەكان بنێرنە كابینەكەی جەنابتەوە، كە زیاتر بە خزمەتگوزار و دڵسۆزی میللەت ناسراون، نەك گوێڕایەڵ و خۆبەرەپێشەوەی حزبیی. پێویستە مەرجی بنەمایی ئەوەبێت، ئەوانەی دێنە كابینەكەتەوە، پیاوی دەوڵەتداریی بن، نەك دڵسۆزی حزبەكانیان، ئەمەش بۆ ئەوەی دیسانەوە، حكومەت لە ناو حكومەتدا دروستنەبێتەوە.

5. ئەگەر سیڤی بكرێتە پێشمەرج، حزبەكەی خۆت، پارتی دیموكراتی كوردستان، زۆرترین كێشەی بۆ پێش دێت، نەك لەبەر ئەوەی سیڤیدار لە پارتیدا نییە، یان سیڤییەكان جێی گومانن، بەڵكو ئەوەندە سیڤیدار زۆرن، كە هەڵبژاردنیان بۆ ئێوە و پەرلەمان زۆر زەحمەت دەبێت. ئەمە جگە لەوەی دەمانخاتە بەردەم شەڕێكی ناوخۆیی خاوەن سیڤییەكان!

6. نەدەبوو سیڤی، بەو تێگەیشتنەی باسمكرد، پێشمەرجی هاتنە ناو حكومەت بێت، چونكە زۆریشن ئەو كەسانەی، كە تا ئێستا لە حكومەتدا بوون و خزمەتی زۆریشیان كردووە و سیڤیشیان نەبووە. زۆریشن ئەوانەی سیڤیی زۆر تۆكمەیان هەبووە و بەدرێژایی ساڵان، كەس ئاوڕیی لێنەداونەتەوە.زۆریش بوون ئەوانەی پسپۆڕیی و دكتۆرا و كەشخەیی زانستییان لێدەباریی و لە هەزاربەهەزارەكانی گەندەڵیییەوە سەریان دەرهێنا!. سیڤی باش و خراپ، پێشمەرجی دەوڵەتداری باش و دڵسۆز و خزمەتگوزاری خەڵك نییە. هەروەك چۆن بێ سیڤی بوونیش نیشانە و بەڵگەی سەرنەكەوتوویی و نادڵسۆزیی و بێئەزموونیی پیاوی دەوڵەت نییە.

7. تازە كار لەكار ترازا و چاوەڕێبە لێشاوێك سیڤیدارت بۆ بنێرن، كە ڕەنگە ئێوە هیچ پێوەرێكیشتان نە بێت بۆ ڕەتكردنەوەیان. بەڵام نەچووە بچێت: بەڕێزت لە حزبەكەی خۆتدا، پەیڕەوی لەم داواكارییە مەكە. بەڵكو من پێشنیازت پێدەكەم سێ شت بكە.

یەكەم: دڵسۆزەكان، بە ئەزموونەكان و خۆشەویستەكانی ناو میللەت، لە حزبەكەی خۆت ببەرە ناو حكومەتەوە. ئەوانە ببەرە ناو كابینەكەتەوە كە دۆستی خەڵكن و دەروێشی حزب نین. ئەوانەی كە خۆیان هەوڵیان نەداوە بۆ ئەوەی ببنە وەزیر و پلەدار. لە هەر فەرمانگەیەك، كەسانی ئەوتۆ هەن، كە دڵیان بە داهاتووی ئەم وڵاتە دەسووتێت. دۆستی نوێ بدۆزەوە، وڵات تووشی موفاجەئە بكە، خۆت لە دەمووچاوی بێزراو، لوتبەرز، نەخوێندەوار و خاوەن بڕوانامەی بەرز و (دكتۆر گیان، دكتۆرگیان)، بەدوور بگرە. بۆ هەر وەزارەتێك، كەسێك بدۆزەرەوە، كە خۆی لە مەیدانەكەدایە ودەیناسێت. دەسەڵاتی تەواویشی بدەرێ با كاری خۆی بكات. خەڵك كردنە وەزیر، بەبێ ئەوەی بتوانێت لە قەڵەمڕەوی وەزارەتەكەیدا و بە پانتایی هەموو هەرێمی كوردستان، دەسەڵاتەكەی بەكار بهێنێت، هیچ مانایەكی نییە.

دووەم: بەڕێزتان دەتوانن ئەوە نەكەن، كە حزبەكانی دیكە دەیكەن: خەڵك مەهێنە بۆ پۆست و پایە و وەزیری، بیهێنە بۆ كار و هاوتیمی و ئامانجی هاوبەش و دروستكەری ئاساییشی حكومڕانی. ئێوە پێویستتان بە كەسانێكە، هەمان ئامانجی لە كابینەكەدا هەبێت، كە حكومەت لە پێشچاوی گرتووە. حكومەت جێی ململانێی حزبی و سیاسی نییە، بەڵكو دەزگایەكە پلانەكانی خۆی دەباتە پێش بۆ ئەوەی بە ئامانجەكەی بگات. هێنانی كەسانێك، كە هەریەكەیان لە ئاوازێك بخوێنێت، وەك ماڵێكی فرەژنی لێدێت، كە ململانێ نێوخۆییەكانیان دەكەنە، ململانێی هاوبەش و ئەوەش سەرگەورەی ماڵەكە دەهرییی و سەقاڵ دەكات.

سێیەم: دیسانەوە بەڕێزت شتێكی نوێ بكە، قوربانیی بدە و لەو ڕیتمە حزبایەتییە وەرە دەرەوە و كەسانێكی شارەزا و كارامە و دڵسۆز، لە دەرەوەی حزبەكەی خۆت، لە شاران و ناوچەی جیاواز، ئەوانەی ساڵەهایە لێرەن وسەلماندوویانە لێهاتوون، ئەوانەی لە هەندەرانن و پێویستە بێنەوە، ئەوانەی هاتوونەتەوە و لێرە نیشتەجێن، تەنانەت ئەوانەی لە هەرێم لە داییك نەبوون و كوردی دڵسۆزن، بهێنە و ئەركیان پێ بسپێرە. بوێرانە و چاونەترسانە هەلی فەرمانڕەواییەكی ناتەقلیدی بۆ كەسانێك، لە ژن و پیاو، لە گەنجان و خەڵكانی كامڵ، بڕەخسێنە كە پێویستە فەرمانڕوا بن..

بەهیوای ئەوەی، سەركەوتوو بیت..



ads

زۆرترین خوێندراوە

  • ڕۆژ
  • هەفتە
  • مانگ
ads
ads

ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved