رۆژنامەنوسێکی تیرۆرکراو، لەکونجی زینداندا دەژی

رۆژنامەنوسێکی تیرۆرکراو، لەکونجی زینداندا دەژی

زمناكۆ ئیسماعیل


1358 جار خوێندراوه‌ته‌وه


   تیرۆرکردنی رۆژنامەنوسان لەهەرێمی کوردستان، یەکێکە لەو چەمکە قێزەون و بێزراوەی، کە چەندین ساڵە ئێمەی هاوڵاتیانی ئەم هەرێمە، پێی ئاشنابوین، لەڕابردودا چەندین هەوڵی زۆر دراوە کە تیرۆری رۆژنامەنوسان رابگیرێت، چەندین رۆژ و کات و سات خراوەتە سەریەک، بۆ ئەوەی کە تیرۆری رۆژنامەنوسان رابگیرێت، بەڵام هەتادێت ئەم تیرۆرکردنە، لەشێوازو فۆڕمی دیکە زیاترو بەرفراوانتر دەبێت، لەتازەترین تیرۆرکردنی رۆژنامەنوسانی هەرێمی کوردستاندا، زیاتر لە بیست رۆژە رۆژنامەنوسێکی تیرۆرکراو، لە کونجی زیندانەکانی پارتیدا دەژی، بەڵام بێدەنگییەکی کوشندە، باڵی بەسەر رێکخراوەکانی مافی مرۆڤ و کۆی گشتی میدیاو رۆژنامەنوسان و خاوەن قەڵەمە ئازادەکاندا کێشاوە، بێدەنگییەکی شێوە خنکێنەر، کە بۆ داهاتوی کاری رۆژنامەگەری و ئازادی رادەربڕین، رێگرییەکان زیاتر دەبن و نەفەسی ئازادی کارکردن، بەتەسکتر دێتە پێشچاو، بە جۆرێک، رۆژنامەنوسان چاو ترسێن دەبێت، لەلایەک شەقام و رۆژنامەنوسان لەیەک دەترازێنێت، لەلایەکی دیکە، گروپ و رێکخراوو چالاکوانان لەیەکتر دور دەخاتەوە، بەو ئامانجەی کەبەرگریکاری کاری یەکتر و پاڵپشتی کاری یەکتری نەبن لە کارکردندا.
   لەمڕۆژدا بەڕونی ئەوە بەراوبەر بە رۆژنامەنوسی تیرۆرکراو، (زوبێر برادۆستی)، دەبینین، ئەو رۆژنامەنوسەی کە ماوەی بیست رۆژە، بەهۆی تۆمارکردنی دیمەنی بۆردومانی ناوچەی برادۆست، لەلایەن سوپای تورکیا و گواستنەوەی ئەو هەواڵە بۆ (ئاژانسی رۆژنیوز)، لەلایەن هێزێکی پارتی دەستگیرکراوەو تا ئێستا چارەنوسی نادیارە، ئەوەش تیرۆرکردنێکی دیارو بەرچاوە، کە دەیبینین بەراوبەر بەرۆژنامەنوسێک، لەو جۆرە تیرۆرکردنەیە، کە خوێنی نەڕژاوەو لەژیاندا ماوە، بەڵام لەکونجی زیندانەکاندا دەیهێڵنەوەو بە گوتەی خۆیان "دەیکەن بە عیبرەت بۆ چاوترسێنکردنی رۆژنامەنوسانی دیکە"، بۆ بەرچاو ڕونی دەبێت ئەوە بزنین، کە تیرۆرکردن چەمکێکی قوڵی فکری و فەلسەفییە، لە دێر زەمانەوە هەتا ئەمڕۆ، قسەو باسی زۆری هەڵگرتوە، لە نەوەدەکانی رابردودا مایکڵ لیمەن کە باسی تیرۆریزم دەکات و دەڵێت " لەبنەڕەتدا تیرۆریزم بریتییە لە کەڵک وەرگرتن لە توندوتیژی، یان هەڕەشەی بەکارهێنانی توندوتیژی، بەجۆرێک گروپ و هێزو کەسانێک، بەمەبەستی بەرەو پێشبردنی ئامانجێکی دیاریکراو لەبەرژەوەندی خۆیان، چاوترسێنی هاونیشتیمانی و هاوڵاتیان دەکەن، ئەوەش لەڕێگای نایاسایی وەک ( کوشتن، گرتن، هەڵکوتانە سەر کەسایەتی و ڤڕاندن و وونکردن و بەبارمتەگرتن)".
   لەڕوانگەی ئەو پێناسەیەی مایكڵ لیمەن، دەستگیرکردنی رۆژنامەنوسی ئاژانسی رۆژنیوز، (زوبێر برادۆستی)، تیرۆرکردنە، لەو جۆرە تیرۆرکردنەیە کە خوێنی نەڕژاوە، بەڵام بۆ چاوترساندنی رۆژنامەنوسانی دیکە، لە کونجی زینداندایە، ئەم جۆرە تیرۆردکردنە مەرگی رانەگەیەندراوە، بەڵام لەو ڕوانگەیەوە مەرگی ئازادی رۆژنامەنوسی  راگەیەنراوە، چونکە ئەو بێدەنگییەی بەراوبەر بەدەستگیرکردنی رۆژنامەنوس زوبێر برادۆستی دەیبینین، عەیبەیەکی گەورەیە لەسەر قەڵەم و کیبۆردو کامێرای رۆژنامەنوسان و میدیاکاران، عەیبەیەکی گەورەیە لەگەردنی یەکەبەیەکەی پەڕڵەمانتارانی هەرێمی کوردستان و پەڕڵەمانتارانی کورد لەئەنجومەنی نوێنەرانی عێراق، عەیبەیەکی گەورەیە بەناوچاوی رێکخراوو میدیاو رۆژنامەو سەنتەرو ئاژانس و هەموو گروپ و تاقم و کەسیک کەکاری رۆژنامەنوسی دەکات، بە میدیایی حیزبی و حکومی و ئەهلی و ئازاد و تاکەکەسی و بازرگانی، عەیبەیەکی گەورەیە بە تەوێڵی ئەو رێکخراوانەی کە بۆ بەرگری ئازادی رادەربڕین و دروستبون.
   ئەمڕۆ زوبێر دەستگیرکراوەو تیرۆری کەسی کراوەو لە سوچی زینداندایە، سبەی من و تۆش هەمان چارەنوسمان دەبێت، دوێنێ سۆران و سەردەش و کاوەو وویدات و دەیان رۆژنامەنوسی دیکە، تیرۆرکران و خوێنیان بەناهەق ڕژێندرا، کەیسی خوێن ڕژانیان بەلاڕێدا برا، بەڵام ئەو کەیسانە بەتەنها لەگەردنی دەسەڵاتدارانە، رۆژی خۆی دێت، بکەرانی ئەو تیرۆرکردنە لەبەردەم دادگای دادپەروەرانەی خەڵک، ریز بکرێن و بەسزای خۆیان دەگەیەندرێن، بەڵام کەیسی رۆژنامەنوسێکی دەستگیرکراو، لە گەردنی هەر یەکەماندایە تا ئازاد دەکرێت، لەوڕوانگەیەوە زوبێر برادۆستی، لەگەردنی ئێمەدایە و دەبێت رێگای ئازادبونی بۆ بدۆزینەوە، دەبێت بەر لەهەموو کەس من و تۆ دەنگ هەڵبڕین، داواکارییەکانمان بگەیەنینە بەشوێنی مەبەست، هەتا گوشار بخەنە سەر حکومەتی هەرێم و حکومەتی عێراقی و چارەنوسی ئەو رۆژنامەنوسە، دیاری بکەن، بە بێدەنگی من و تۆ بەراوبەر بەو تیرۆرکردنە، بەشێکین لە کردەی فڕاندن و تۆقاندن و گرتنی رۆژنامەنوسان، وەک گاری پۆتەر دەڵێت "تیرۆرکردن نانەوەی کەشێکی ترسناکە بۆ چاوترساندن و تۆقاندن"، خوێنی زوبێر برادۆستی، بەرلەوەی لە ئەستۆی دەستگیرکارانی بێت، لە ئەستۆی ئەو کەسانەشدایە کە بێدەنگن بەراوبەر بەو تیرۆرکردنە، لەپاش تیرۆرکردنی لاشەو تیابردن و لێسەندنەوەی ژیانی، نە شەقام گرتن و خۆپیشاندان، نە گوتارو پیاهەڵدانی تۆڕەکۆمەڵایەتییەکان و فەیسبوک، نە پەیککار بۆ کردن و بەستنی نەمەراسیم و بەخشینەوەی خەڵات، ژیان بەبەژنی ئەو رۆژنامەنوسەدا ناکەنەوە، بەڵام بێدەنگینەکردنی ئەمڕۆی من و تۆ، دەتوانین ژیانی بۆ بگێڕینەوە، با من و تۆ بەشدار نەبین لەم تیرۆرکردنە و دەنگ هەڵبڕین بۆ ئازاد کردنی.




ads
ads
Developed by Avesta Group and powered by Microsoft Azure

Copyright © 2015 Shar Press. all rights reserved