بەهاری عەرەبی بۆ کۆماری تورکیا یەکێک لە ئاڵۆزترین رووداوە سیاسییەکان بوو! ئاڵۆز بەمانای ئەوەی سوریا بوو بە پانتاییەکی پڕ لە قەیران، پڕ لە ئەکتەری جیاواز، پڕ لە هێز و ناسنامەی تازە! دۆخێکی لە سوریا هاتەکایەوە (هۆبس) ناوی ناوە دۆخی بەر لە قۆناغی سروشتی! دۆخی بێ دەوڵەتیی، بێ هێزی باڵا و دەسەڵاتی سەروەر. دۆخێک کە هێشتا دەوڵەت وەک دەزگایەکی مۆدێرن ئامادەیی نییە تاوەکوو کۆمەڵ و گڕووپەکان دیسپلین بکات! لەڕاستیدا ئەم ئەدەبیاتە لەبارەی دەوڵەت و بەدەزگابوونی دەوڵەتەوە لە سوریا بەتەواوی تێکشکێنرا.
خەمی سەرەکی تورکیا لە سوریا ئامادەبوون، گەشەکردن و بەرهەمهێنانی مۆدێلی کوردبوون و ناسنامەی کوردبوونە! تورکیا بەهیچ شێوەیەک نایەوێت کوردانی سوریا وەک یەکەیەکی رێکخراو، خاوەن هێز و دیسپلین، خاوەن ئەدەبیاتی رووبەڕووبوونەوە و بەڕێوەبردن، خاوەن سیستمی پەیوەندییەکان، سیمبوڵ و سەرمایەی نەتەوەیی، ئاسایش و خۆ رێکخستنەوە دەربکەون و جوڵە بکەن!
دیارە سیاسەتی دەرەوەی تورکیا لەدوای بەهاری عەرەبییەوە بەشێوازێکی میکانیکی کاربۆ ئەوە دەکات کوردبوون لە ناسنامە و بیرکردنەوەی ئیتنیکی بگۆڕێت و بیکات بەکێشەی "ئاسایش" جوڵەکانی ئەردۆگان، لێدوان و بڕیار و تێڕامانەکانی هەمووی نوێنەرایەتی ئەوە دەکەن کە چۆن کێشەی کورد لە سوریا بەقوڵی گرێبدەن بە کێشەی ئاسایش و مانەوە و سنوور! پێدەچێت بە ئاسایشکردنی پەیکەری کوردبوون لە سوریاوە پەیوەندی بە کڵێشەی دەوڵەتی تورکیا، پێگەی جیۆپۆلەتیکی و کێشە بونیادییەکانی سیستمی سیاسی تورکیاوە هەبێت. دیارە تورکیا وەک سیستم و دەوڵەت بەردەوام ترسی لەوە هەیە کوردانی سوریا هێڵێکی درێژی جیۆستڕاتیژی و جیۆ-ئیتنی لەنێوان باکووری کوردستان و قەندیل و باکووری سوریا دروستبکەن و پایە و رەگەزەکانی دەوڵەتی تورکیای پێ لاوازبکەن و لەکاری بخەن! ئەم ئەڕگیۆمێنتە دەیەها ساڵە باڵادەستە لای ئینتێڵیجێنیسای تورک، شەقمای تورکی و گەورە و بچووکی تورک!
لەڕووی ستڕاتیژییەوە تورکیا ناتوانێت بەردەوامی بە ململانێکانی بدات لەبەرامبەر ئەمەریکادا؛ چونکە ئەمەریکا هێزی زاڵە و ڕەگەزە بونیادییەکانی زاڵترە (هێزی سەربازی، دبلۆماسی، ئابووری، جیۆپۆلەتیک و پێگەی لەنێو سیستمی سیاسی نێودەوڵەتی)! تورکیا دەیەوێت سنوورەکانی لەگەڵ باکووری سوریا پانتاییەکی پڕ لە ئاسایش بێت! ئاسایش بەمانای ئەوەی هێزێکی کۆمەڵایەتی و سیاسی نزیک لەخۆی و نزیک لە جوڵە و ئایدۆلۆیا و سیستمی بیرکردنەوەی خۆی تێدا ئامادەبێت تاوەکوو فشارە دەرەکی و ناوەکییەکانی لەسەر بونیادە ناوەکییەکەی خۆی کەمتربکاتەوە! دیارە تورکیا وەک دەوڵەت و ستڕاکتۆر تاوەکوو ئێستاش کوردبوون وەک ناسنامە بە ترسناکترین کردە، وێنە، ئەکتەر، فشار و جوڵە دەبینێت. تورکیا دەیەوێت لەرێگەی "ناوچەی ئارام" ەوە دابڕانێکی قوڵ و جیۆپۆلەتیکی لەنێوان کوردانی باکوور و سوریا و ئەوانیتر بەرهەمبێنێت، وەک هێزێکی زاڵ دەربکەوێت لەدژی ئەوانیتر[ئەمەریکا و هێزە کوردییەکان].
پەیرەو ئەنوەر
ئەم وتارە دەربڕی بۆچونی نووسەر خۆیەتی