ناڕەزایی شەقام بەپێی بەردەوامیەكەی لەچاوەڕوانی بەرفراوانتربونێكی پێشبینكراودایە . دیمەنەكان پێمان دەڵێن خوێنێكی زۆر ڕژا و ئەشێت زیاتریش بڕژێت ، واش پێدەچێت خۆپیشاندەران لەو دڕندەییەی دەزگاداپڵۆسێنەرەكان بێ باكبن و ئەڵتەرناتیڤێكی تریان لەبەردەستدا نەبێت تا شەقامی لەپێناودا چۆڵ بكەن .
ئەمان تەنها داوای گۆڕینی دەموچاوەناشیرینەكانی شازدەساڵی ڕابردووی حكومڕانی ناكەن ، بەڵكو هەڵوەشاندنەوەی پەرلەمانیش كە پێیان وایە ئەمانە لەهەقیقەتدا تەنانەت نوێنەرایەتی دەنگدەرانی خۆشیان نەكرد ، هەروەها داوای گۆڕینی سیستێمی سیاسی و هەمواركردنەوەی دەستور دەكرێت ...
مشتومڕێكی گەرم ی فرەڕەهەند بۆ دەستكاریكردنی دەستور لەئارادایە ، لەئێستادا جێبەجێبكرێت ناواقعی و ناشەرعیە ، چونكە شەقام كە كۆی دەسەڵاتداران بە ناشەرعی ، بە گەندەڵ و بخۆر و دز ناوزەد دەكەن ، ئەو مافەشیان لێدەسێنێتەوە بە بڕیاری ئەوان و لەسایەی ئەوان و لەپێناو درێژكردنەوەی تەمەنی خۆیاندا بەو هەوڵە دیماگۆگیە هەڵبسن ..
كەوابو باشترین چارەسەر بۆ حكومەت جێهێشتنی كورسیەكانە و بەپێی دەستوریش پێكهێنانی حكومەتێكی كاربەڕێكەرە ، چون ئەم دەموچاوانەی ئێستا لەو زۆرینە بێدەربەستەی كابینەكە پێكدێن كە هێشتا خوێن و هاواری شەقام هەستی نەجوڵاندون ...
هەروەها چارەسەر هەڵوەشاندنەوەی كۆمیسیۆنی باڵای سەربەخۆی هەڵبژاردنەكانە ، كە بە ئەدای نابەرپرسیارانەی ڕابردویان سەلماندیان هەموو شتێك بون سەربەخۆ نەبون .
پاشان چارەسەر پێكهێنانی كۆمیسیۆنێكی نوێ لەدەستەبژێرێك كەسانی شارەزا و تەكنۆكراتی خاوەن بڕوانامەی دوور لە پشكی نەتەوە و ومەزهەب و حیزب و كەمینەكان ...
ئەو كۆمیسیۆنە بە هاوكاری نەتەوەیەكگرتوەكان ، چاودێرانی دەرەكی بێلایەن سەرپەرشتی پرۆسەی هەڵبژاردنی پێشوەخت بكەن ...
ئەوسا پێداچونەوە بە دەستوردا و هەمواركردنەوەی هەریاسا و بڕگەیەك دەكەوێتە دوای هەڵبژاردنی پەرلەمانی نوێ ، لەكۆتاشدا دەبێت ئەوە هاوڵاتیان بن لەڕێی ڕاپرسیەوە بەبەڵێ یان نەخێر دەنگی لەسەر دەدەن
لەدوای ڕوخانی ڕژێمی بەعسەوە تا ئەمڕۆ ، هیچ خۆپیشاندانێك و گوتارێكی ئۆپۆزسیۆن هێندەی ئەمەی ئێستا كاریگەر نەبوە ، ئەمەی ئێستا دەنگەڕاستەقینەكەی بەشخوراوانە ، با ئێمە لانی كەم دوور بكەوینەوە لەو دەمارگیرییەی هەمیشە بۆ لەبیربردنەوەی كێشەناوخۆییەكان ، پەنا دەبەینە بەر وەهم و ترساندنی خەڵك و دروستكردنی گومان ، كە ئامانجی سەرەكی هەموو ئەمانە تەنها لە خشتەبردنی هاوڵاتین ..
دانا سەعدی
ئەم وتارە دەربڕی بۆچونی نووسەر خۆیەتی