بەغداد دەكوڵێت و هەولێر خامۆشە

08/11/2019

عەلی عبدالصمد

 

 بێ گومان خۆپیشاندان و ناڕەزایەتیە بەفراوان و بەردەوامەکانی بەغداد، بەرئەنجامی ستەم و نادادی زیاتر لە پانزە ساڵی دەسەڵاتدارانی عێراق و دروست بوونی دەیان بنەماڵەی سیاسی و ئاینیە، کە لەسایەی داهاتی پڕ لە خێری عێراقەوە، بوونەتە خاوەنی سەدان ملیۆن دۆلار و خاوەنی ژیانێکی شاهانەی بۆ خۆیان و نەوەکانیان، لەگەڵ ئەوەشدا خراپ بوونی بەردەوامی ڕەوشی ژیان و بارو دۆخی دانیشتوانەکەی، کە ڕۆژ لە دوای ڕۆژ گرفت و قەیرانەکان زیاتر و کەڵەکە تر دەبن لەسەریان. بێ گومان خەڵکی بەغداد و شارەکانی دیکەی عێراق تەواو ماندوون لەدەست ئەو گەندەڵی و نادادیانەی کە دەسەڵاتدارانی عێراق دەیکەن، تەواو ماندوون لەنەبوونی خزمەتگوزاری سادەی ژیانیان.

لەنێو خۆپیشاندانەکانی بەغداد دا، یەکێك لە خۆپیشاندەرەکان دەیگوت، بۆ ئێمە وەک وڵاتانی دیکەی کەنداو ناژین، مەگەر ئێمە نەوتمان نیە و نایفرۆشین؟چەندین ساڵە خێر و بێر و نەوتی عێراق، بۆ کۆمەڵێک سیاسی و بنەمالەی سیاسیە لەعێراقدا. ئەوەی کە لێرەدا خاڵی هاوبەشی نێوان هاوڵاتیەکی بەغداد و هەرێمە، بوونی هەمان ئەو گرفت و قەیران و کێشانەیە کە هەردووکیان بەهۆی سیاسیەکانیانەوە بەدەستیانەوە دەناڵێنن، بەڵام ئەوەی جێگەی سەرنجە هەڵوێست و ناڕەزایەتیەکانی بەغداد و شارەکانی دیکەی عێراقە و لەگەڵ ئەوەشدا بێ دەنگی و خامۆشی هاوڵاتیانی هەرێمە، کە هەمان گرفت و کێشەی شارەکانی عێراق و بەغداد یان هەیە، کە ئەم بێدەنگی و بێ هەڵوێستیەش بۆتە هۆی ئەوەی کە ڕۆژ لە دوای ڕۆژ بڕیاری سەیر و سەمەرە بەسەر دانیشتوانی ئەم هەرێمەدا بسەپێندرێت و لەبەرانبەریشدا خەڵکەکەی بێ دەنگی و ڕازیبوون هەڵبژێرن، وەك لە دوا بڕیاری سەیر و سەمەرەی دەسەڵاتدارانی دا، بڕیار دراوە بە وەرگرتنی بڕی پێنج هەزار دیناری مانگانە لەبەرانبەر فڕێدانی زبڵ و خاشاکی هاوڵاتیاندا.

 

هەمیشە پایتەختەکان داینەمۆی گۆڕانکاری و چاکسازی بوون، داینەمۆی شۆڕش و ناڕەزایەتیەکان بوون، ئێمە لەماوەکانی ڕابردوودا دەیان خۆپیشاندانمان لە شاری سلێمانیدا بینی، بەڵام ئەو ڕاستیەمان بۆ دەرکەوت کە کاریگەری ئەو تۆ دروست ناکات، بەڵکو کاریگەری ڕاستەقینە ئەو خۆپیشاندان و ناڕەزایتیانەیە کە لە پایتەختەکانەوە دروست دەبن، چونکە پایتەختەکان دڵی ئەو نیشتیمان و وڵاتەن و هەر جوڵانەوە و دەنگێکی ناڕەزای، ڕاستەوخۆ کاریگەری بۆ سەر تەواوی ناو چەکانی دیکە دروست دەکات. ئەوەی جێگەی سەرنجە، خراپبوونی ڕۆژ لەدوای ڕۆژی ڕەوش و بارودۆخی دانیشتوانی هەرێم و بێدەنگبوونیانە، لەئاست دەیان گرفت و قەیرانی دروستکراودا کە خەڵکی پێیانەوە دەناڵێنێت.

دەسەڵاتدارەکانی ئەم هەرێمە، لەسایەی دەسەڵاتدارێتیەکی نادادپەروەرەوە، کارێکیان کردوە، گەورەترین خەونی گەنجێك تێیدا، ئەوەبێت ڕۆژێك دابمەزرێت و کارێکی هەبێت، گەورەترین خەونی ئەوەبێت، ڕۆژێك شوێنێکی نیشتەجێبوونی هەبێت و تێیدا بژی، لەگەڵ ئەوەشدا بەهەشتێکیان بۆ خۆیان و نەوە و دارو دەستەیان دروست کردووە. لەسایەی دەسەڵاتدارێتی کوردیەوە، بێ حورمەتیەک نەماوەتەوە بە چوێژێکی ئەم هەرێمە نەکرێت، شەهیدکردنی ڕۆژنامەنوس کە تەنها چەکی دەستی قەڵەمەکەیەتی، سوتاندنی ڕیشی و شەهیدکردنی مامۆستای ئاینی، کە تەنها هێزی ئەو، مینبەری مزگەوتێكە، شەق هەڵدان و بێ ڕێزیکردن بەرانبەر مامۆستا، کە ساڵانێكە بێ جیاوازی منداڵی هەموومان فێر دەکات.

ئێمە لە نیشتیمانێکدا دەژین، لەسایەی شکستی دەسەلات و حوکومەتی کوردییەوە، ژیانی خەڵکەکەی لە سەرنشینی کەشتیەکی ونبووی نێو دەریا دەچێت، کە لەسایەی کۆمەڵێك کەشتیوانی ناشارەزاو بەرژوەندی خوازەوە، چارەنوسی هەموویان نادیار و ڕوونە. لەگەڵ ئەوەشدا ئەوەی جێگەی سەرنجە ئەو بێ دەنگییە سامناکەیە کە سیخناخی کۆمەلگای ئێمە بۆتەوە، کە ئەوە جگە لەوەی جیگەی نیگەرانیشە،بەڵام لە هەر چرکە ساتێکدا دەکرێت بزوێنەر و داینەمۆی کاردانەوەیەکی بەفراوان بێت ئەگەر بێت و ژیانی هاوڵاتیانی ئەم هەرێمە لە ژیر سایەی دەسەڵاتی کوردیدا بەو جۆرە بەردەوام بێت.