مەریوان عەبدوڵا

ھەرچی یاساو رێسای گەردونی و زەمینی ھەیە بگەڕێیت و ئەم سەرو ئەوسەری بکەیت ، ئەوانەی دەستکردی یەزدان و ئەوانەش کە دەستکردی مرۆڤی ھۆشمەندن، ھەموویان بونەوەر و مرۆڤایەتی ھان دەدەن رێچکە و رێبازی زوڵم و ستەم و نادادی بەرەو رێگای دادپەورەری و یەکسانی و ئازادی و خۆشویستن بگرنەبەر و سەکۆی کەرامەت و شکۆمەندی کۆیان بکاتەوە ، ئەو سەکۆیەی لوتکەی جیاوازی مرۆڤی بیرمەندە لەگەڵ ئەوانی تر .

بەڵام لەم نیشتیمانەی خۆمان کە ھیچ شتێک لە شوێنی خۆیدا نەماوە و ھەموو بەھاکان کەوتونەتە بەردەم بەرداش و تەم و لێڵی خۆرسکی خۆمان  ، وادیارە ھاوکێشەکە پێچەوانە بووەتەوە ھەتا بێت سەکۆ و پەتی زۆڵم و ستەم و کۆیلایەتی فراوانتر و ئەستورتر دەبێت و خەڵکانێک کەتەنیا گیرفان و بەرژەوەندی خۆیان بەم خاکەیانەوە دەبەستێتەوە سەنگەری دادگەری و ئیرادە بەرەو زوڵم و  ستەم و چەوساندنەوە بەجێ دەھێڵن !

لێگەڕێن با ئەو سەنگەرە قوڵتر و قەبەتر و ئەستورتر بێت ، ئەی پێشینان نەیان ووتووە ھەموو شتێک لە باریکیدا ئەبچڕێت تەنیا زووڵم و ستەم نەبێت لە ئەستوریدا ، کەوابێت لێگەڕێن با ئەو سەنگەرە تا بێت ئەستورتر و بازنەی زوڵم و ستەمی فراوانتر بێت ، دڵنیابن ئەوە سەنگەری ئیرادەو  تواناو بەرەی راستەقینەی ویژدانی خەڵک بەھێزتر دەکات و رقەکان بۆ رەتکردنەوەی چەوساندنەوە و نادادی تۆختر  دەکاتەوە ، رۆژێک دێت ئەو زوڵمە لە ئەستوریدا ھەر دەبچڕێت .

لە ئێستاو رابردووشدا ئەوانەی ھێشتا ھیوایەکیان بە باشبونی ئەم دۆخە ھەبووە و ھەیە، چاویان لەوەیە بەرەی گەل و داکۆکی لە مافی خەڵک و بەدیھێنانی یەکسانی و دادگەری قایم و فراوانتر بێت ، بەڵام سەیرە رۆژگارەکە بەجۆرێک قڵپ بووەتەوە دەبینین لە چاوتروکاندنێکدا دژەکان دەبنە دۆست و نەیارەکان دەبنە یار و دووژمنەکان دەبنە پشت و پەناو دەست لەملانی یەک !

بەم کار و کردەوانە مرۆڤ واسەری لێ دەشێوێت ھەق وایە بڵێیت ئێمە ھەر لەسەرەتاوە تۆوی دوو رووی و دووبەرەکی و فرۆشتنی ھەست و ھەڵوێست لەناخماندا چەکەرەی کردووە و بووە بەبەشێک لە کلتورمان، کاتێک مرۆڤ  دووکاری لەم چەشنە دەبینێت گومانەکانی تۆختر دەبێت، رەنگە زیادەڕۆیی نەبێت ئەگەر بڵێیت ئێمە مرۆڤ گەلێکین لەگەڵ ناخ و رووی راستەقینەی خۆمان ھەر لە سەرەتاوە راستگۆ نەبوین، ھەرکات بەرژەوەندییەکانمان بکەونە بەردەم مەترسی یان چاومان بچێتە سەر گەنجینەی پڕ  لە زێڕ و دراو،  رێک سەدو ھەشتا پلە دەگۆڕێین و لەبەرامبەر مافی گشتی و دەنگ دلێری و رەتکردنەوەی چەوساندنەوە، سەنگەری بەرژەوەندی و گیرفان پڕی ھەڵدەبژێرین ! ئەوکات بەدڵنیاییەوە ھیچ بەھایەک بۆ رابرووشمان نامێنێتەوە.

ئەم وتارە دەربڕی بۆچونی نووسەر خۆیەتی