ئەو دۆخەی بەسەر یەكێتی‌و بەسەر سلێمانیدا هاتووە، دڵنیام تەواوی خەڵكی سلێمانی نیگەرانە، نیگەرانە لەوەی نازانن ئایندەی ئەوشارە بەرەو كوێ دەڕوات؟ نازانن كێشەكان بەئاشتی یان بەرێگای چەك كۆتایی دێت، نازانن هاوكێشە سیاسییەكان چۆنن، كامیان لەكام بەرەیەو كامیان لەكامە بەرەی ترە (هەندێك ئاڵۆزە)، نازانن، ئەم كێشەیە كورتخایەنە، یان سەرهەڵدەگرێت بۆ زۆرگرفتی دیكەو چارەسەركردنی ئاسان نییە، نازانن ئاخۆ ئەم ململانێیەپێویستبوو بكرێت یان دەبوو بەرێگای تر چارەسەربكرابایە؟
ئایا لەتوانادا هەبوو بەرێگای دیكە بكرایە؟ هەر دەبوو ئەمە ڕوویدابایە یان نا، پێویستی نەدەكرد لەماوەی چەند ساڵی رابردوودا خزمەتكردنی خەڵكی سلێمانی بەپێی پێویست بووە؟ یان شتێكی ئەووتۆی بۆنەكراوە شایانی باس بێت؟ ئەی بەهۆی ئەم ململانێیەوە خزمەتكردنەكە باشتر دەبێت یان خراپتر؟
ئەمانەو دەیان پرسیاری دیكەی تەمومژاوی لەبیركردنەوەی هەر هاوڵاتیەكی سلێمانی‌و ئینجا تەواوی خەڵكی هەرێمی كوردستان هەن، بەڵام وەڵامی هەر تاكێكی ئەم كوردستانە رەنگە بەجۆرێكی جیاوازتر لەوانی دیكەبێت، وەك چۆن ڕوخساری هەریەكێكمان لەوی دیكە جیاوازترە، ئاوەها وەڵامەكانیش جیاوازترن، ئەمە تائێرە ئاساییە، ئەوەی بەلای منەوە ئاسایی نییە، ئەوە نزیكەی هەفتەیەكە ئەم گرفتە ئاڵۆزە دروستبوە كە چی نوخبەی ڕوناكبیری ئەمشارە تائێستا یەك ورتەیان لێنەهاتۆتەدەر، بەحیساب سلێمانی شاری ڕۆشنبیرانە!!، كەچی یەكهەڵوێستیان نییە نە بەباش نە بەخراپ.
كورد دەڵێت: كردەی پەشیمانی باشترە لەنەكردەی پەشیمانی، دەبوو ئەوانەی بەڕۆشنبیر دادەنرێن با لەپەنجەی دەستیش تێپەڕنەبن(چونكە مەبەستم ڕاگەیاندنكارو نوسەر نییە) خۆ دەبوو ئەو چەند كەسە هەڵوێستێكی ڕونیان لەسەر ئەو دۆخە سیاسییە هەبوایە كەپەیوەندی بەچارەنوسی ئێستاو داهاتووی سلێمانییەوەیە. ڕۆشنبیر لەكات‌و ساتی قەیران‌و تەنگانەكاندا پێویستە دەربكەوێت، نەك لەكاتی ئاسایی‌و شێنەییدا.
ڕیمۆن ئارۆن كاتێك وازی لەحزبی كۆمۆنیست هێنا، دیگۆل ساڵی ١٩٤٧ پارتی (دیگۆل)ی دامەزراندو (ریمۆن ئارۆن)یش لەژێر كاریگەری هاوڕێ دیگۆلییە بەناوبانگەكەیدا (ئەندرێمارلۆ) پەیوەندی بەڕیزەكانی ئەو حزبەوە كرد، ئیتر بووە هاوڕێ‌و دۆستی دی گۆل، ئیتر پەیوەندی ڕیمۆن ئارۆن‌و سارتەر بەتوندی تێكچوو، هەریەكەشیان لەبەرەیەكی دژ بەیەكتری خۆیان بینیەوە، سارتەر لەگەڵ كۆمۆنیزم‌و ڕیمۆن ئارۆنیش لەگەڵ كاپیتاڵیزم.
ئەم ناكۆكییە گەیشتە سەرشەقامی پاریسیش، ئەلبێر كامۆش، ساڵی ١٩٤٨ پەیوەندی بەحیزبی كۆمۆنیستەوە نەما، ئیتر كامۆش پەیوەندی لەگەڵ سارتەر تێكچوو، بەتایبەتی دوای چاپكردنی مرۆڤی یاخی، سارتەر بەتوندی وەڵامی ئەو كتێبەی دایەوە، ئیتر نێوانیان بەتەواوی تێكچوو، هەموو ئەمانەپەیوەندی بەڕوداوە سیاسییەكانی ناو فەرەنساوە هەبوو، ئەگینا ریمۆن ئارۆن تا لەئەڵمانیاش خوێندنی تەواوكردو گەڕایەوە فەرەنسا، زۆر دۆستی سارتەربوو، هەڵوێستە فیكری‌و سیاسییەكان كردنی بەدوژمنی یەكتری، ئەلبێر كامۆش بەهەمانشێوە.
ئەمانەو دەیان ڕوداوو بەسەرهاتی دیكەی گەورە هەن، وایانكردوە، ڕۆشنبیران هەڵوێستی جیاواز لەسەر ڕوداوەكان وەرگرن‌و قسەی خۆیان بكەن، كەچی ئەوەتا لەم سلێمانیەی كە بەحساب شاری ڕۆشنبیرانە!!، یەك كەس یەك هەڵوێستی ڕون نا، بەڵكو تاریكیشی نییە!. نازانین ئەمانە لەكوێن؟، ئەی بۆچی لەكاتی شێنەییدا دەفەلسەفێنن؟ تەڕو وشك بەیەكەوە دەسوتێنن، ئێستا توانای ئەوەیان نییە یەك هەنگاوی بچوكیش بهاوێن، باسی یەكێتی نوسەران ناكەم، كە بەڕاستی زۆر پووت‌و چروك‌و بودەڵە دەرچوو، هەزار خۆزگەمان بەو یەكێتی نوسەرانەی سەردەمی بەعس كە دكتۆر عیزەدین مستەفا ڕەسوڵ‌و محەمەدی مەلا كەریم سەرۆكایەتیان دەكرد، هەزار خۆزگەمان بەو كۆری زانیارییەی لەسەردەمی بەعس هەبوو كە محەمەدی مەلا كەریم‌و مەلا شوكرو كەمال مەزهەرو مەلا جەمیل ڕۆژبەیانی‌و چەندین قەڵەمی دیكەی بەتوانا كاریان لەسەر وشەو زمانی شیرینی كوردی دەكرد.
ئێستا كەس نازانێت كۆڕی زانیاری هەر هەیە، خەڵكێكی بێ توانا، نەشارەزا لەزمان، بەبڕوانامەی ساختەوە، خۆیان تێدا ئاخنیوە، بەداخەوە، هەموو پێوەرەكان سەراوژێر كراونەتەوە، هەموو بەهاكان، ناشیرینتر كراون، بەرژەوەندییەكان وەك سەگی هاریان لێهاتووە، وەك مۆنتیسكیۆ دەڵێت: ئامادەن لەپێناو لێكردنەوەی سێوێك، هەموو درەختەكە ببڕنەوە. ئەرێ ئەم دۆخە بۆ وای لێهاتووە؟!
ئەم وتارە دەربڕی بۆچونی نووسەر خۆیەتی