بەریتانیەکان لە کۆنگرەی قاهیرەدا ساڵی ١٩٢١، بڕیاری دامەزراندنی دەوڵەتی عێراقیاندا . سەدەیەکە ئەو دەوڵەتە لەسەر پێشنیار و ڕاوێژی ( خاتوون) مس
بیڵ ، لە سێ ولایەتی موسڵ و بەغدا و بەسرە پێکهێنراوە . لەپاش سەد ساڵ ، ژنێکی تر (
خاتوو جینین پلاخارست) ڕۆڵی دامەزراندنەوەی دەوڵەتی عێراق دەگێڕێت .
مس بێڵ :
گیترۆید بێڵ ١٨٦٨ – ١٩٢٦ لە مێژوودا بە دروستکەری پادشاکان ناسراوە
، هەر کە بەشی مێژووی لە زانکۆی ئۆکسفۆرد تەواو دەکات ، دەچێت بۆ ئێران بۆلای خاڵی ، کە لەو سەردەمەدا ١٨٩٢، کونسوڵی بەریتانی بوو لە تاران . سەرەتای
رۆژهەڵاتناسیەکەی لەوێوە دەستپێدەکات . دواتر
لەسنووری دەوڵەتی عوسمانیدا وەک شوێنەوارناسێکی گەڕیدە ، لە تورکیا و سوریا و میسر
و عێراق دەمێنێتەوە . فێری زمانەکانی فارسی ، عەرەبی و تورکی دەبێت . پەیوەندی کۆمەڵاتی
و سیاسی لەگەڵ سەرۆک هۆز و کەسایەتیە دیارەکانیاندا دروست دەکات .
لەدەستپێکی جەنگی جیهانی یەکەمدا ، کاتێک بەریتانیەکان
ئۆفیسی قاهیرە دەکەنەوە ، میس بێڵ وەک شارەزا
لە کاروباری عەرەبی ڕادەسپێرن ببێتە ڕاوێژکاری پیرسی کۆکس و جۆن فیلپی لە عێراق . دواتر
دەیکەنە یاریدەدەری حاکمی بەریتانی لە عێراق و تا ڕۆژی مردنەکەی لە بەغدا دەمێنێتەوە
و هەر لەوێش دەنێژرێت .
سیانەی میس بێڵ و لۆرانس و هۆفارت ، پێکەوە سیاسەتی
بەریتانی لە رۆژهەڵاتی ناوەڕاستدا دادەڕێژن . بێڵ دەبێتە ئەندازیاری دامەزراندنی دەوڵەتی
پادشایی عێراق . لەسەر پێشنیاری ئەو ، یەکەم حکومەتی عێراق بە سەرۆکایەتی عەبدوڵرەحمان
نەقیب ١٩٢١ ، ڕادەگەیەنن . دواتر داوا لە ئۆفیسی قاهیرە دەکات ، فەیسەڵی کوڕی شەریفی
مەککە لە حیجازە بهێنن ، بیکەنە پادشای عێراق .
سەرباری بۆچوونە جیاوازەکانی مێژوو سەبارەت بە
خاتوو بێڵ کە هەندێک پێیان وایە جاسوسێکی بەریتانی بووە ، بۆ نزیکردنەوەی سەرۆک هۆز
و سەرکردە دیارەکانی ئەو سەردەمە لە بەریتانیەکان ، هاندانیان بۆ بەگژدا چوونەوەی دەستەڵاتی
عوسمانیەکان ، یاخود تاوانبارکردنی بە دابەشکردنی ناوچەکە لە سایکس -پیکۆدا ، هەموو
لایەک کۆکن لەسەر ئەوەی بەبێ ئەو خاتوونە ، دەوڵەتی عێراقی دروست نەدەبوو .
جینین پلاسخارت :
خاتوو پلاسخارتی هۆڵەندی ، ژیانی سیاسی وەک ئەندامی
پارلەمانی یەکێتی ئەوروپا دەستپێدەکات ، ماوەیەک
وەزیری بەرگری وڵاتەکەی و دواتر نوێنەری هۆڵەندا بووە لە نەتەوە یەکگرتووەکان
. لە ساڵی٢٠١٨ دا ، دەکرێتە نوێنەری تایبەتی
نەتەوە یەکگرتووەکان لە عێراق ( یونامی ) تا
ئێستا لە ئەرکەکەیدا بەردەوامە .
لێکچوونی ئەرک و ڕۆڵی ئەم دوو خاتوونە بەجیاوازی
سەدەیەک لە نێوانیاندا، وایکردووە لای هەندێک
لە چاودێرانی سیاسی عێراقی بە مەندوبی سامی بشوبهێنن. لە ڕۆژی دەست بەکاربوونیەوە
لە عێراقدا ( وەک میس بێڵ ) پەیوەندیەکی سیاسی تایبەتی بە سەرکردە جیاوازەکانی عێراقەوە
هەیە . تەنیا کەسایەتی سیاسیە کەبتوانێت سەردانی مەرجەعی باڵای شیعەکان ( سیستانی
) بکات ، لەناو خۆپیشاندەرانی تشرینی دەبینرا و سەردانی ماڵی بریندارەکانی دەکرد ،
پشتیوانی تەواوی خۆی نەشاردۆتەوە بۆیان . لە سەرۆکایەتی کۆمارەوە بۆ پارلەمان ، لە
بارەگای حیزبەکانەوە بۆ کۆمسیۆنی هەڵبژاردنەکان بەردەوام لە هاتووچۆدایە . بە عەڕابی
هەڵبژاردنی پێشوەختەی عێراق ١٠ ی ١٠ ی ٢٠٢١ دادەنرێت . ئەویش وەک میس بێڵ توشی بەریەککەوتن
و ناکۆکی کردووە لەناو فیرقە جیاوازەکانی گۆڕەپانی سیاسی عێراقدا . بەتایبەتی لەناو
باڵە جیاوازەکانی شیعەدا . بەتایبەتی لەپاش ڕاگەیاندنی ئەنجامی هەڵبژاردنەکان و دروستبونی ناکۆکی لەنێوان
ڕەوتی سەدر و باڵی چوارچێوەی هەمئاهەنگی ( الاطار تنسیق ) دا .
هەردوو خاتوون ، مس بێڵ و میس پلاخارست ، لە هەردوو سەردەمەکەدا لەناو شیعەکاندا تۆمەتبارن
بەوەی جگەلەوەی پشتیوانی سوننەکان دەکەن تا دەوڵەتیان بەدەستەوەبێت ، پشتیوانی باڵێکیش
لە شیعەدەکەن کە مەیلی بەلای خۆرئاوادابێت
. میس بێڵ لەو سەردەمەدا پشتیوانی ئایەتوڵا سەید محەمەدکازم یەزدی بووە ، لەناو مەرجەعەکانی
شیعەدا یەزدی بە لایەنگری بەریتانیەکان ناسراوە . ئێستاش باڵی چوارچێوەی تەنسیق کە
خۆیان بە محوەری مقاوەمەت دەناسێنن ، پێیان وایە پلاخارست پشتیوانی سەدریەکان دەکات
، چونکە سەید موقتەدا سەدر بە لایەنگری سیاسەتی ئەمریکا لە عێراق و نزیک لە سعودیە
پێناس دەکەن .
ڕاستی و دروستی هەرکام لەو ڕەخنانەی ڕووبەڕووی
ئەو دوو خاتوونە دەکرێتەوە ، لە مێژووی سەد ساڵەی عێراقدا ، ناکاتە ئەوەی کە هەریەکەیان
ڕۆڵێکی باڵا و کاریگەری هەیە لە دامەزراندنی دەوڵەتی عێراقدا . میس بێڵ دەوڵەتی یەکەمی
لە ١٩٢١ دا دامەزراند و میس پلاخارستیش هەوڵی
دامەزراندی دەوڵەتی دووەمی عێراق دەدات لە
٢٠٢١ دا .
ئەم وتارە دەربڕی بۆچونی نووسەر خۆیەتی