ئاسۆ عەبدولەتیف

لە ڕۆژانی ٥-٧ـی ئایاری ٢٠٢٥ لە هەرێمەکانی پاراستنی میدیاو ناوچەیەکی تری نادیار، پارتی کرێکارانی کوردستان کۆنگرەی دوانزەهەمینی خۆی گرێدا هەر ئەو نادیارییە لە تەوقیت و لەجێگای کۆنگرە، دەرخەری ئەوەیە هێشتا زەمینەسازیی ئەوتۆ بۆ ئاشتی دروست نەبوەو لەبارنییە، بەڵام وەک دەردەکەوێ ئەمە کۆنگرەیەکی نائاسایی و ناچاریی بوو بەناوی کۆنگرەی دوانزەوە، نەک کۆنگرەی خۆهەڵوەشاندنەوەو چەک دانانی پە*کە*کە، لەبەیاننامەکەیاندا، دەڵێن بڕیاری مێژوویی دراو یادی ٥٢ ساڵەی شەهیدەکانمان کردەوە، بڕیاری مێژوویی و یادی شەهیدان مانای جیاواز لەخۆدەگرێ، کەچی هەندێک  بەشاگەشکەوە باسی کۆتایی ئەم چیرۆکە دەکەن.

بەکورتی کۆنگرەی پە*کە*کە، لەم قۆناغەدا دوای زنجیرە دیدارەکانی شاندی دەمپارتی بۆ ئیمڕاڵی و ئەنکەرەو هەولێرو دوا پەیامی ئۆج ئالان بۆ ئاشتی و چەکدانان لە ٢٧/٢/٢٠٢٥ ئەم خوێندنەوانە هەڵدەگرێت؛

• کۆنگرەکە کۆنگرەی سیاسی پارتێکی سیاسی بوو بۆ موجامەلەی دەوڵەتی تورکیا و جۆرێک بوو لە مانۆڕی سیاسی و ئایدۆلۆژیی بۆ درێژەدان بە دانوستانەکان.

• کۆنگرەی دوانزە کۆنگرەی هێشتنەوەی دۆخی نەشەڕ نە ئاشتیی بوو کە پە*کە*کە، رای وایە بەم جۆرەو ئاوا لەقازانجیەتی تا ئەوکاتەی دەوڵەت دەچێتەژێر باری گرەنتی دیموکراسی و زەمینەسازیی بۆ ئاشتی و ئازادکردنی زیندانیە سیاسیەکان لەسەروو هەموویانەوە ڕێبەر ئاپۆ.

• هەمان کات کۆنگرەی ڕێزگرتن و وەڵامدانەوەی تەکنیکیانە بوو لەپەیام و بانگەوازە ناچاریی و تەمومژاوییەکەی بەڕێز ئۆج ئالان کە دەبوو بەم جۆرە یاساییەو لەچوارچێوەی راسپاردەکانی کۆنگرەوە وەڵام بدەنەوە، کۆنگرەش بێگومان واتە بەرزترین دەسەڵاتی سیاسی حیزبی و ئایدۆلۆژیی و رەنگە بەم میکانیزمە  پە*کە*کە، نەیەوێت بچێتە ژێرباری بڕیاری سیاسی جەبری و داسەپاو.

ماوەتەوە بڵێین پرۆسەی چەکدانان ئەوەندەش ئاسان نییە و هەر دەستی بۆ ببرێ دەساڵی دەوێ، چونکە زیهنیەتی چەک دانان و مۆدێلەکانی چارەسەریی هێشتا تەم و مژاوییە لەبەردەم تەڤگەری چەکدارییدا، لەگەڵ ئەوەی زەماناتی پێکەوەژیان و ئاشتەوایی و دیموکراسیی هێشتا لەدایک نەبوە لەتورکیا هەر بۆیە تفەنگەکانیش ئاسان ناخرێنە ژێرگڵ و تاشەبەردی قەندیلەوە.

ئەم وتارە دەربڕی بۆچونی نووسەر خۆیەتی