ئاواتی شێخ جەنگی کە لەناو تەپۆتۆزی یەکەم ڕۆژی کارەساتەکەی
لالەزاردا وەک نموونەی ژنێکی کۆڵنەدەر دەرکەوت، حەفتەیەک دواتر بە دیدارەکەی لەگەڵ
(میدیای درەو) هێندەی تر کەسایەتییەکەی بردە قۆناغکی بەرزتر لەو ژنەی پێشتر هەبوو.
زۆربەی زۆری ئەوانەی گوێیان لە قسەکانی ئاوات خان گرت، سەرسامبوون
بەو ئارامیی و لەسەرخۆییەی کاتێ کارەسات و ئاگربارانێکی سێ ڕۆژ لەمەوپێشی سەر خۆی و
براکانی دەگێڕایەوە. ئەگەر ساڵی داهاتوو ئەم
دیدارەی بڵاوبکرایەتەوە، ئەوەندە نرخی نەدەبوو بەڵام گرنگییەکەی لە تازەییەکەیدا بوو
کە هێشتا بۆنی بارووت لە قژ و جلەکانی خۆی دەهات و چارەنووسی برایەکی دیل و برایەکی برینداری دیار نییە بە تەواوی.
لە ماوەی ۱۳ ساڵی رابردوودا،
ئەوە دووەمجارە خێزانی ئاواتی شێخ جەنگی دەبنە مانشێتی ڕووداوی گەورە و شۆکهێنەر لە
سلێمانی و کوردستان. مانگی سێی ۲۰۱۲ تاقە کوڕەکەی ئاوات
خان کە ناوی (بەیار) بوو لەناو خوێندنگەکەی خۆیدا لە سلێمانی مامۆستا ئەمریکییەکەی
خۆی بەناوی (جێرمایا) دایە بەر فیشەک و کوشتی، هەر لەوێدا فیشەکێکی نا بەسەری خۆیەوە
و لە نزیک مامۆستاکەیدا تەرمی هەردووکیان ساردبوونەوە!
ئەو ڕووداوە لە کاتی خۆیدا دەنگدانەوەیەکی زۆر گەورەی هەبوو،
یەکەمجاربوو لە کوردستان خوێندکارێک لەناو مەکتەبی خۆی مامۆستاکەی بکوژێت جا مامۆستاکەش
بێگانەبێ!
ئەو کاتە لە میدیا شت زۆر بڵاوکرایەوە وەک ئەوەی کە خوێندکارەکە
خوشکەزای لاهوور شێخ جەنگییە وخاڵۆکانی بردوویانەتە ناو دژەتیرۆر و فێری تەقەکردنیان
کردووە!
سەرەڕای هەموو ئەو دەنگۆیانە، بەڵام هیچ کەس لە دایکو باوکی
خوێندکارەکە و خاڵۆکانی قسەیان بۆ میدیا نەکرد لەسەر ئەو کارەساتە.
من لەڕێی (سەبیحەخان) خێزانی جەبار فەرمان کە پەیوەندی باشمان
لەنێواندابوو، پەیوەندیمان بە باوکی خوێندکارەکەوە کرد تا قسەمان بۆ بکات. من ئەو کاتە
لە (ڕۆژنامەی ڕووداو) ئیشم دەکرد
دکتۆر سەروار باوکی خوێندکارەکە.. جا ئەو کاتە بە دکتۆر سەروەر
ناوی ڕۆشت، بەڵام خۆی پێیوتم سەروار نەک سەروەر... سەرەتا ڕازی نەبوو هیچ بڵێ، بەڵام
سەبیحەخان هانیدا قسەم بۆ بکات منیش کۆڵم نەدا و وتم ئێستا دێم بۆ ماڵتان.
لەناو قسەکانیدا زۆر ئارام و لەسەرخۆبوو، قسەکانی وەک ئەوەنەبوو
کارەساتێک ڕووی دابێ. کاتێک پرسیاری ئەوەم لێکرد خزمی مام جەلالیت و دەڵێن کوڕەکەت
لای خاڵوانی براوەتە ڕیزی دژەتیرۆر و فێری تەقەیانکردووە، بەم قسەیە تۆزێ توڕەبوو.
وتی: ڕاستە خێزانی من برازای مام جەلالە، بەلام من کەسایەتییەکم
خاوەن پرەنسیپ و کەسایەتیی خۆمم. پەروەردەی منداڵ و خێزانەکەم هەر لەژێر کۆنتڕۆڵی خۆم
و هاوسەرەکەمدایە. من خۆم بچووک ناکەمەوە لەناو بازنەیەکدا و خۆم هەڵواسم بە فڵانە
شەخس و فڵانە بنەماڵەدا. تکایە ئەم قسانە مەکەن چەند ساڵیش دەبێ مام جەلالم نەبینیوە
و پێویستیش نەکات ناچم بیبینم.
لەناو قسەکانیدا خۆکۆنتڕۆڵکردنێکی زۆرم بەدیکرد، لەگەڵ ئەوەشدا
باوەڕبەخۆبوونێکی تیابوو کە زۆر کەس کاتێک لەڕێی ژن و ژنخوازییەوە تێکەڵی بنەماڵە دەستڕۆشتوو
و دەوڵەمەندەکان دەبن، خۆیان بچووک دەکەنەوە لەوەدا کە زاوا یان خەزووری فڵانن. بەڵام دکتۆر سەروار بەبێ ئەوەی سڵ بکاتەوە، ئەوپەڕی
بێمننەتی خۆی نیشاندا.
کاتێک لەو ماڵەی مقابەلەکەمان کرد... وابزانم ماڵی پۆڵادی
شێخ جەنگی بوو.. هاتمەدەرەوە، نەمتوانی سەرسامی خۆم نیشان نەدەم بە شەخسیەتی دکتۆر
سەروار وەک باوکێکی جەرگسووتاو چەند ئارام بوو، وەک پیاوێک کە لەناو بنەماڵەیەکی دەستڕۆشتووی
خاوەن هێزدا، دەیەوێ سەربەخۆیی کەسایەتییەکەی بهێڵێتەوە.. کە من زۆر عاشقی کەسانی بەهێز
و بێمننەت و ئازام
هەرکە هاتمە دەرەوە
بە تەلەفۆن لەگەڵ ئاکۆ محەمەدی سەرنووسەری ڕووداو قسەم کرد و ئەو سەرسامییەی خۆم بە
دکتۆر سەروارم بۆ گێڕایەوە.
لە کاتی تەنگەژە و تەنگانەدا، لەناو ژینگە و کۆمەڵگەیەکدا
کە توندوتیژی زۆر باڵایە، خەڵکانی لێقەوماو و خاوەن قەزیە، ڕۆڵێکی گەورە دەبینن لە
کەمکردنەوەی توندوتیژیی و بیری تۆڵەکردنەوە. ئەوان کاتێک دەتوانن بە دەربڕینی تووڕەیی
و قسەی زبر ناخی پەنگخواردووی خۆیان دەربڕن، خەڵکێکی زۆر هەیە دەبێتە هاوسۆزیان و حەقیان
دەدەنێ چی خراپە بیڵێن، بەڵام ئەوان ئارامیی و لەسەرخۆیی هەڵدەبژێرن کە ڕۆڵی گەورەی
هەیە بۆ دامرکاندنەوەی ئاگری فیتنەیی و تووڕەیی خەڵکە زۆرەکەش.
ئەم نووسینەم هیچ بەرگرییەک یان هاوسۆزییەک نییە بۆ کوڕانی
شێخ جەنگی کە ئێستا بەزیوی ڕووداوێکن، تەنیا وەک شایەتیدانێک بۆ ژنومێردێک کەلەوپەڕی
تەنگانە و دڵشکاندا، توانیویانە خۆیان کۆنتڕۆڵ بکەن و لەڕێی ئەویشەوە هەزاران کەس تووڕەییەکانیان
دابمرکێتەوە.
ئەم وتارە دەربڕی بۆچونی نووسەر خۆیەتی