بەردەوام سەرنج و ڕەخنەمان لەسەر پڕۆگرامی خوێندن و بابەتەكانی خوێندنی وەزارەتی پەروەردە هەبووە، بەڵام ئەوەمان لێگەڕاوە بۆ پسچۆڕانی ئەو بوارەو هەندێك دۆست لە ڕووی خەمخۆری و پەرۆشیەوە بە زنجیرەو بە وتاری جیا جیا قسەی خۆیان كردوە، من زۆربەی وتارە ڕەخنەییەكانی مامۆستا هەورامانی وریا قانعم خوێندوەتەوە، لە گەڵ ئەوەشدا هەمیشە بە ئومێدی ئەوە بووینە ساڵی دواتر باشتر بێت ، لە ڕابردودا ئەو وەزارەتە زیانی زۆری بە حكومەتی هەرێم و كەرتی پەروەردە گەیاندوە، بەوەی هەموو ساڵێك بە بیانوی جیا جیا سەدان هەزار كتێبی لە ناو داوە لە كاتێكالانی كەم دەبێت ئەو لیژنە پسپۆڕیەی بابەتەكە ئامادە دەكەن مەودای 10 بۆ 15 ساڵێك لە بەر چاو بگرن ، ئەگەر زیاتر نەبێت، هەروەها وەزارەتی پەروەردەش خۆی لە مەودای ئەو ماوەیەدا سەرنج و تێبینی كۆبكاتەوەو لە كاتی گۆڕیندا چارەسەری كێماسیەكان بكات .
من لەم نوسینە كورتەدا ناچمە ناو وردەكاری ئەو هەموو گۆڕین و دەسكاریە خێراوپڕزەرەرەی ساڵانە، لێرەدا قسە لە سەر زمانی دایك دەكەم لای وەزارەتی پەروەردە لەتەواوی ئەو فێرگەو قوتابخانەو دواوەندی و پەیمانگایانەی سەر بەو وەزارەتەن بە حكومی و ئەهلیەوە، هەرچەندە خەریكە خوێندنی ئەهلی لە زۆر بواردا جێ بە خوێندنی حكومی لێژدەكات، ئەوەی سەیرە لە هەموو دنیادا زمانی دایك زمانی یەكەمە لە زۆربەی بوارە جیاجیاكاندا، تەنانەت لە زانكۆ تایبەتمەندو پارانێلەكانیش زمانی دایك بەو ڕادەیە فەرامۆش ناكرێت كە ئێستا لە كوردستان دەكرێت، بۆنمونەناكرێت لە پەیمانگایەكی ئەهلی ، یان خوێندنگەیەكی ئەهلی لە كاتێكا هەموو گفت و گۆو هەست و كەوتی فێرخواز كوردی بێت و یەك فێرخوازی بیانی تیا نەبێت كەچی بۆ وانەی جگە لە زمانی ئینگلیزی ئەوانی دیكەش هەر دەبێت بە ئینگلیزی وەڵام بدرێتەوە، یانی لە پەیمانگایەكی ئەهلی مەرج ئەوەبێت توێژینەوەی فێر خواز بە ئینگلیزی بێت وەك ئەوەی لە بەریتانیا بخوێنن، ئەمە جگە لە سوكایەتی بە زمانی دایك هیچی تر نیە ، ئاخر توێژینەوەلە سەر كۆمپیوتەر، یان نەوت و گاز،یاخود بابەتێكی زانستی یان وێژەیی بۆ دەبێت هەر ئینگلیزی بێت ، نهێنی ئەم كارە چیە .
هەشتاكان بۆ ئەوەی فێرخواز لە بوارە زانستی و وێژەییەكاندا پەكی نەكەوێت بەشێك لە مامۆستا ڕۆشنبیرو خوێنەوارەكان لە ئەو بوارەی پسپۆڕبوون تێیدا فەرهەنگیان دادەنا ، فەرهەنگەكانی مامۆستا جەمال عەبدول كە من ئێستەش لە یادمن بەشێك بوون لەو كارەو بۆ ئەوە بوون فێرخوازی كورد هەست بە كەمی و بێبایەخی زمانەكەی خۆی نەكات ، هیچ بیانویەك نیە لە بەر ئەوەی چوار پێنج وشە بەرانبەرەكەی بە كوردی نیە دەبێت تەلەبە ناچار بكرێت بە ئینگلیزی وەڵام بداتەوە ئەمە جگە لە شكاندنی زمانی دایك هیچ شتێكی دیكە نیەو ناكرێت وەزارەتی پەروەردە ڕێگە بەوە بدات، دەربارەی نەبوونی زاراوەی كوردیش بۆ هەندێك مادەو كەرەسە، وەك چۆن كۆڕی زانیای كوردی هەبوو ، ئەكادیمیا هەیە، گوندوگوند نشین هەیە پسپۆڕو شارەزاو داهێنەرو وشە ساز هەیە كە دەكرێت هەموو ئەوان ڕۆڵیان هەبێت لە دەوڵەمەند كردنی زماندا.
بیرمە كاك ناسری ڕەزازی پێی وتم لە بری بایكۆت هەوڵبدەن داكێڵ بخەنە شوێنی كە وشەیەكی ڕەسەنی كوردیەو لە موكریان بۆ ملنەدان و یاخی بونی گا دێت لە كێڵان، جارێك بە دۆستێكم وت بۆ لە بری موەلیدە ناڵێن وزەدەر ، وشەیەكی زۆر جوانیشە لە بری موشەغیل موەلیدەش ، وزە كار بە كار بێنن، قسە لە سەر دەوڵەمەند كردنی زمانی دایك و بایەخپێدانێتی نەك شكاندن و پشتگوێ خستنی .
ئەم وتارە دەربڕی بۆچونی نووسەر خۆیەتی