د. ئەمیر حسێن

   قورسترین نەهامەتی ڕوبەڕوی میللەتێک بێتەوە ، بە تاڵان بردنی سەروەت و سامانەکەی نیە لەلایەن دوژمنانەوە ، یان داگیرکردنی خاکەکەی لەلایەن داگیرکەرانەوە ، وەک چۆن تا ئێستا بیرمان لێ کردۆتەوە ، بەڵکو لەوانە خراپترو کارەساتبارتر ئەوەیە ، جڵەوی وڵات بکەوێتە دەستی کۆمەڵێک سیاسی هەلپەرست ، شایەنی ئەوە نەبن تەنانەت سێبەری خۆشیان شوێنیان بکەوێ .
    لێرەوە ئیتر وڵات دەچێتە نێو قۆناغی داڕمان و وێران بون :  قەڵەم دەکەوێتە دەستی گەمژەو نەفامەکان ، زمان لەبری ئەوەی ببێتە باڵاترین خەسڵەتی مرۆڤ ، وەک ڕەمزی باڵادەستی و لێک تێگەیشتن لەگەڵ ئەوانی تردا ، یان ئامرازی ساغکردنەوەی بڕیاری دروست و لۆژیکی ، دەگۆڕێ بۆ کەلاوەیەکی وێرانەی چۆڵ و جێهێڵراو . زانین لە خولیای پرسیارێکی ئەبەدیەوە ، وەک سێرەی سەرسنگی نەزانین و گەمژەیی ، دەگۆڕێت بۆ گەمەیەکی ئەکادیمی کۆمیدی ناو حەرەمی زانکۆکان ، هۆشیاری لە وزەی پاک وهاوڕێی ژینگە و خەونی داهێنان و پێشکەوتنی مرۆڤەوە ، دەبێتە دۆزەخی سروشت و لەسێدارەدانی جوانی ، بە بەر چاوی مێژو شارستانیەتەوە ، لە گەورەترین گۆڕەپانی شاردا . کاتێکیش بکوژ و تاوانبار ، بەپێی دەقی ڕوون و یاسایی ڕێگە پێدراو بێت ، چەک هەڵ گرێ و ڕوی بکاتە هاونیشتیمانیانی سڤیل ، ئیتر توندوتیژی و کوشتن دەبێتە پیشە ، لە پێناو بەدەستهێنانی بڕوانامەی پیشەگەری شارەزا ، وەک باشترین ، ناونیشانی وەزیفی ( بکوژی تۆقێنەر ) ، تا ئەزمون زیاتر کەڵەکە بکات ، ڕێزو سوپاسی زیاتر دەستەبەر دەکا ، بۆیە بەردەوام بکوژە ، لە ( ڕێکارەوە بۆ عیرفان ) ، لە ( لالەزارەوە بۆ لاجان ) ، فیشەک بە خەسار مەدە تکایە ، بینێ بە سەریانەوە ، سەری ئەمانە بەڵای ئەم نیشتیمانەیە  ، لێرەوە ئیتر ترس وەک چەمکێکی وجودی بەپێی دەق و لەچوارچێوەی دیباجەیەکی دەستوریدا ، جارێکیتر دادەڕێژرێتەوە ، بەڵام خوێن ، بەتایبەت خوێنێک لە سەرشەقام ڕژابێ ، لە وانەکانی پەروەردەی نیشتیمانی هەڵدەگیرێ ، بەڕێزەوە لەگەڵ وانەی ژینگە پارێزیدا تێکەڵی دەکەن و ، پێکەوە دەیان گوازنەوە بۆ کاتی زیادکراو .
   کاتێک دەسەڵات دەکەوێتە دەستی دەستەبژێرێکی بازرگانی چاوچنۆکەوە ، نیشتیمان وەک خوانێکی ڕازاوە ، لە دوتوێی نەخشەیەکی جوگرافیای ڕەنگاو ڕەنگ و ، لە سەر مێزی کۆمەڵێک عیفریت ڕادەخرێ ، کە بە ڕاستی ئیشتیها دەکاتەوە ، ئەوانیش لە گەڵ قوتدانی هەر پارویەکدا ، دەستێک بە سمێڵیاندا دێنن ، هێڵنجێک دێننەوە و لەبەر خۆیانەوە دەڵێن : خودایە نەیبڕی ، هەربژی ئەم نیشتیمانە . ئەگەرچی هەموان ئەم ڕستە وەک دروشم دەڵێنەوە ، بەڵام هەندێک لە نێو سەنگەرەکانی بەرگری و لە کاتی شکاندنی هێرشی دوژمنان و هەڵمەت بردندا ، هەندێکی تریش ، لە کاتی داستانی شکۆی دابەشکردنی کێکە حەیاتەکەدا . تەنها شوێنەکە جیاوازە دەنا دروشمەکە هەمان شتە ، لێرەوە پێویستی ناچارمان دەکات ، پەنا بۆ ئیدارەو بەڕێوەبردن بەرین ( دەوڵەتداری ) ، بۆ ئەوەی ئەم دوو شوێنە بخەینە ڕستەیەکی هاوسەنگەوە ، ڕستەیەک تەنها کردار ( فعل ) موبتەداو خەبەر نەبێت ، شوێنێک بکەینەوە بۆ( فاعل ) بکەری بزرو نادیاری ترسناک ، بەڵام گەندەڵی لە ساتە وەختێکی مێژویی ئاوا هەستیاردا ، قوت دەبێتەوەو ، هەموو پڕۆژە گرنگ و چارەنوس سازەکان ، بە تەونی بەرژەوەندیەکان دەسپێرێ ، نیشتیمان دەکەوێتە بەر کۆمەڵکوژی پارادۆکسی واتای ساختەو ڕاستەقینە . لە پێناو شاردنەوەی ئەم تاوانە ئابڕو بەرانەو، شوێنەواری گۆڕە بەکۆمەڵکاندا ، میدیا لە پشتەوە دوا چەقۆی نامەردی بە جەستەی حەقیقەتدا دەکا ، هەر لە پرسەکەشیدا دوای خوێندنی سورەتی الفاتیحا ، لوتف دەنوێنێ و بڕیار دەدات ، لە کەرەستەی درۆ سیمبولی قەدیسێک دابتاشێ ، هێندە جوان بیڕازێنێتەوە ، هەمومان بەشانازیەوە دو ڕکەعات نوێژ لە بەردەمیدا داببەستین .
   لە نیشتیمانێکی ئاوادا ، هیچ پێویست نیە لەوە زیاتر ، نازی ئەخلاق بەسەر شانمانەوە هەڵگرین ، یان خەمی ئەوەمان بێت ، تا لە باوەشمان دەری بێنن و بیفڕێنن ، نەکا بەبەرچاومانەوە ئەتکی بکەن ، چونکە ئێمە دەمێکە ، بە پێی ڕۆژژمێری کوردی خۆمان ، چوینەتە ناو سەردەمی بێ ئابڕویی   سیستەماتیک و ئەتکی بەکۆمەڵ ، ئەوەنیە ستەمکاران بە بۆنەو بێ بۆنە ، بانگهێشتمان دەکەن بۆ ڤیستیڤاڵی بێدەنگی ، مەدالیای ئاڵتون بەگەردنی باشترین بێدەنگەکاندا هەڵدەواسن ، لەژێر چاودێری کامیرا نهێنیەکان ، ئێمەش هەمو بە حەماسەتەوە فیکەوچەپڵەیان بۆ لێدەدەین !!.

ئەم وتارە دەربڕی بۆچونی نووسەر خۆیەتی