شەم شەمەیی ساڵح

من وەک ڕۆژنامەنووسێک، وەک کوردێک‌و وەک مرۆڤێک ئەمە دەنووسم، من بۆ تۆمەتبارکردن نانووسم، بەڵکو بۆ ئەوەی داوای لێبوردن بکەم، نەک پەنجە ڕابکێشیت، بەڵکو داوای سەرکردایەتی بکەیت، لەڕۆژاڤاو کۆبانێ لەئێستادا خەڵک لەژێر هەڕەشەی بەردەوامدا دەژین، خەڵکی مەدەنی، ژن، منداڵ، بەساڵاچوو، ناچاردەکرێن هەڵبێن، برینداردەبن‌و شه‌هید ده‌كرێن، تەواوی خه‌ڵكى لەترسدا دەژین، منداڵان بەشەڕ وەک شتێکی ئاسایی گەورە دەبن، ئەمە شتێک نییە کە بتوانرێت دوابخرێت بۆ کۆبوونەوەی دیپلۆماسی داهاتوو.

ئێستا ئەمە ڕوودەدات، ئەمانە هەمان ئەو شوێنانەن کە سەردەمانێک قورسایی دونیایان لەسەر شان هەڵگرتبوو، هەمان ئەو پێکهاتە کوردانەی کە لەپێشەنگی شەڕی داعش وەستابوون کاتێک ئەوانی دیکە دوودڵ بوون، هەمان ئەو ژن‌و پیاوانەی کە گیانیان بەختکرد بۆ وەستاندنی حوکمڕانییەکی تیرۆر کە هەڕەشەی لەهەموو مرۆڤایەتی دەکرد.

ئەوان تەنها بۆ خۆیان ئەوکارەیان نەکردووە، بۆ هەموومان ئەوکارەیان کرد، خیانەت لەجیهانی دەرەوە ڕوونەو شەرمەزارییە، سوید، ئەمریکا، بەریتانیاو فەرەنسا، هاوکاری هێزە کوردییەکانیان کرد دژی داعش، ستایشی بوێری خۆیان کرد، باسیان لەبەهاکان‌و مافەکانی مرۆڤ کرد، بەڵام کاتێک کورد جارێکی تر کەوتە بەر هێرش، هەمان دەنگەکان بێدەنگبوون.

سوید درێژە بەئیمتیازاتی سیاسی خۆی دەدات، ئەمریکا بەپێچەوانەوە دەڕوانێت، لەندەن‌و پاریس بێدەنگن، ئه‌مه‌ش خیانەته‌و شەرمەزارییە، بەڵام هەربۆیە لەپلەی یەکەمدا ڕوویان لێناکەم‌و ڕوو لەتۆى تاك دەکەم، بانگەوازم بۆ مەسعود بارزانی‌و بافڵ تاڵەبانی هه‌یه‌، دەزانم بەرپرسیارێتییەکی قورس هەڵدەگرن، دەزانم سەرکردایەتی لەهەرێمەکەماندا هەرگیز ئاسان نییە، بەڵام ئەوەش دەزانم کە ئێوە شتێکتان هەیە کە ڕۆژاڤاو کۆبانێ لەهەموو شتێک زیاتر پێویستیان پێیەتی لەئێستادا: شەرعیەت‌و کاریگەریی‌و دەنگ.

بانگەواز بۆ:پاڵپشتی ڕوون‌و گشتی بۆ هاوڵاتیانی سڤیل لەڕۆژاڤاو کۆبانێ
فشاری سیاسیی‌و دیپلۆماسی بۆ پاراستن‌و دەستڕاگەیشتن بەمرۆیی
دەنگێکی یەکگرتووی کورد کە دەڵێت: گەلەکەمان تەنها نییە
کاتی ئەوەهاتووە لەگەڵ خوشک‌و براکانمان پێکەوە خەبات بۆ کوردستان بکەین

کاتێک سەرکردایەتی کورد بەیەکگرتوویی وەستاوە، جیهان گوێدەگرێت، کاتێک بێدەنگ بێت، دونیا بەقبوڵکردن لێکیدەداتەوە، ئەمە ساتێکە پێناسەمان دەکات، بەدرێژایی مێژوو زۆرجار کورد بەتەنها جێهێڵراوە، زۆرجار بووینەتە تێبینییەکی ژێرەوە لەبەرژەوەندی ئەوانی تردا، بەڵام ئێمە جاروباریش نیشانمانداوە کە ئێمە وەستاوین بۆ یەکترو بۆ بەها مرۆییەکان.

ڕۆژاڤاو کۆبانێ تەنها شوێنی جوگرافی نین، هێمای بەرخۆدان، یەکسانی، هیوان. یارمەتیدانیان لەئێستادا تەنها کردەوەیەکی سیاسی نییە، بەرپرسیارێتییەکی ئەخلاقییە، ئەمە دەنووسم چونکە باوەڕم بەسەرکردایەتی کورد هەیە، من ئەمە دەنووسم چونکە باوەڕم وایە دەتوانن گۆڕانکاری دروستبکەن، ئەمە دەنووسم، چونکە خوشک‌و براکانمان کاتیان نییە چاوەڕێبکەن.

ڕۆژنامەنوسی کوردی ـ سویدی

ئەم وتارە دەربڕی بۆچونی نووسەر خۆیەتی