لەتیف فاتیح فەرەج

لە كاتی شەڕی ئێران ئەمەریكاو ئیسرائیل ، چ شەڕی دوازدە ڕۆژە ، چ شەڕی چل رۆژە ، حەشدی شەعبی بە گشتی و بەرەی مقاوەمەی ناو حەشدی شەعبی بە تایبەتی كەوتبوونە دۆخێكی خراپەوە ، سەرەڕای پەلامارەكانی سەر هەرێمی كوردستان و هەندێك جار سنوری كەركوكیش، بەڵام لە لایەكی دیكەوە هەرچۆنێكە خۆیان لە هەندێك شوێن دەكشاندەوەو شوێن و پەنای دیكەیان بۆ خۆیان دەدۆزیەوە ، لە سنوری كەركوك و خانەقین یان ئەوەتا دەكشانەوەو دەچونە شوێنی دیكە ، یان بەیداخ و ڕەنگ و ڕووی ناسینەوەی خۆیان دەشاردەوە، هێشتا شەڕ كۆتای نەهاتوەو نەئەمەریكاو نەئێرانیش نەك بیست و یەك سەعات بیست و یەك هەفتەش گفت و گۆ بكەن ئەو مەرجانەی یەكتر قەبوڵ ناكەن ، هەرچەند ئێران لە سەرو بەندی شەڕی دوازدە ڕۆژەدا زۆرێك لەو مەرجانەی قەبوڵ بوو، بەڵام ئەو هەموو كوشت و بڕەو لە پەل و پۆخستنی دەسەڵات لەتاران ئەوانی زیاتر ڕقئەستور تر كردو ئێستا نەك قالیباف یان بگرە موجتەباش ناتوانن مل بۆ داواكانی ئەمەریكا بدەن ، بە تایبەت كاتێك پاسدارو بەسیج گریان گرتبێت، كەواتە ئەوەی پێویستە بكرێت و سڵی لێنەكرێتەوە ڕێگرتنە لە گەڕانەوەی حەشد بۆ سنوری كەركوك و ناوچە دابڕێنراوەكان ، نەك ڕێگری لەو شوێنانە بگرە دەبێت لە زۆر شوێنی دیكەیش دور بخرێتەوە.
حەشدی شەعبی ڕاستەلەبەر دڵانی شیعەو یەكێك لەدیاریەكانی سیستانیە بۆ عێراقی سەردەمی شەڕی داعش ، بەڵام خۆ حەشد هەموو گروپەكانی كە زیاتر لە حەفتا گروپن وەك یەك بیر ناكەنەوەو وەكو یەكیش هەست و كەوت ناكەن ، هەندێكیان ڕاستەو خۆ بڕیار لە تاران و قوم وەردەگرن و تەنانەت لە پشتیانەوە ئەفسەرو پلە دارو بەرپرسی ئێرانیش هەن ، ئەمە نەك هەر بۆ مقاوەمەی عێراقی ، بۆ حوسی و حزبوڵای لوبنانی و شوێنگەلی دیكەش وەسایە، لە شەڕی چل رۆژەدا ئەم حەشدە ، واتە بەرەی بەرگری سەر بە ئێران نەك كۆی حەشد بێهۆیەكی ڕوون كەوتنە وێزەی هەرێمی كوردستان و هەرێمیان وەك دوژمنی خۆیان وێنا كرد، لە كاتێكا هەرێم ئەگەر بە پێوەری بەراورد تەماشا بكەیت لەو شەڕەدا زیاتر لایەنگری ئێران بوون تا ئەمەریكا ، لانی كەم لەوەدا كە ڕێگەیان نەدا سنوری هەرێم بۆ هەر كردەیەكی سەربازی بە كار بێت، ئەگەر لە سەر دیدی خۆمان سەبارەت بوونی حەشد لە كەركوك و گەرمە سێر بوەستین ، دەبێت ئەو ڕاستیە بڵێین كە حەشدی شەعبی بەرانبەر كوردی ناوچە دابڕێنراوەكانی كوردستان لە خانەقین ، كەركوك، خورماتوو، شوێنگەلی دیكە هەڵوێستێكی ئەرێنی و جوانی نەبووە و زۆر جار تەرەفی دژ بووە ، بۆیە لای كورد لە بەر دڵان نیە، یان باشترە بڵێین لای زۆرینەی كورد.
ئێستا كە بەشێك بنكەو بارەگاو شوێنگەیان جێهێشتوە هەق نیە هەر وا بە ئاسانی ڕێگە بە هاتنەوەیان بدرێت بۆ ئەو شوێنانە، بۆ ئەمەش دەبێت حكومەتی خۆجێی ئەو ناوچانەو حكومەتی عێراق و تەنانەت نوێنەرانی هەرێمیش لە بەغدا بە هێوری و دور لە هەڵچون و ڕق لەو بارەیەوە بگەنە ئەنجام ، ئێمە ئەو راستیەش دەزانین كەئەمەریكا حەشدی شەعبی بەو هێزو دەسەڵات و توانایەوە پێ‌ هەزم ناكرێت و دەیەوێت ئەو هێزە بخرێتە چوار چێوەی سوپاوە و ڕێكبخرێت ، ڕاستە ئەمەریكا بۆ ئەم كارە نایەوێت زۆر بە كار بێنێت ، بەڵام دەسبەرداری ئەو داوایەش نابێت، ئێ‌ لە كاتێكا ئەم هێزە لە لایەن ئەمەریكاوە داوای ئەوە بكرێت چارەسەر بكرێت و بە میلیشیای نەمێنێتەوە، هەڵبەت دەبێت خەڵكی كەركوك و خانەقینیش ئەو داوایە بكەن ، چونكە ماران گەستە ئەوانن نەك خەڵكی تر.
دەبێت ئەو ڕاستیە بزانین كە حكومەتی ئایندەی عێراق هەر كێ‌ سەرۆكی حكومەت بێت ناتوانێت بە هەمان شێوەی پێشتر مامەڵە لە گەڵ حەشد بكات ، دەبێت رێكیبخات و لە میلیشیای بخات ، ئەم ئەركە هەروا سوك و ئاسان نابێت ،  لە گەڵ ئەوەشدا چی تر لێناگەڕێن چارەنوس و ڕۆژگار ئەو بابەتە چارەسەر بكەن، دڵنیام مانگەكانی داهاتوو بەم جۆرەی ئێستا نابێت ، نەئەمەریكاو نەئیسرائیلیش لێدەگەڕێن ئەو هەموو میلیشیایە لەم ناوچەیە بمێنن، لە بەر ئەوەی ئەو میلیشیایە بەردەوام هەڕەشەن بۆ سەر ئیسرائیل و بنكەو باڵیۆزخانەكانی ئەمەریكا لەناوچەكە، نمونەی حزبوڵای لوبنانی و حوسی و توند ئاژۆكانی سوریاو عێراق ، هەرچەند لە سوریا ئەو بەشەی توند ئاژۆ بەتەواوی پاشەكشەی كردوە ، گەرچی بەشی دیكە ماون .

ئەم وتارە دەربڕی بۆچونی نووسەر خۆیەتی