د. شێرکۆ جه‌بار

ئاراستەیەكی مەترسیدار لەگوتاری میدیایی، فەزای كاری ڕۆژنامەگەریی كوردیی خستوه‌تە ژێر تاقیكردنەوەیەكی سەخت‌و دژواردا، گوتارێكە لەبری پێشكەشكردنی شیكارییەكی عەقڵانی‌و ڕەخنەگرانە بۆ واقیع‌و پێشهاتەكان، وروژاندی هەست‌و سۆزی جەماوەری كردوە بەئەولەویەتی كارو پیشەی، لەبری پێشنیازی چارەسەریی‌و بابەتیانە بۆ قەیرانە سیاسیی‌و ئابوریی‌و كۆمەڵایەتییەكان، زمانی تەخوین‌و دروستكردنی دوژمن‌و تەوزیفكردنی هەستی ترس‌و هەڕەشە‌و دڵەڕاوكێی كردوە بەئەولەوییەتی ستراتیژو سیاسەتی هەواڵسازیی.

ئەمە لەپێناو چیە؟ تەنها لەپێناو كۆكردنەوەی جەماوەرو بەحەشاماتكردنی وەلائی حزبی‌و بەرژەوەندییە كەسییەکانی بەناو ئۆپۆزسیون!!. ئەمجۆرە زمان‌و گوتارانە (بێگومان جگە لەهەندێ دامەزراوەی میدیایی شیاوو موعتەبەر) تەنها لەسەر ئاستی دامەزراوەیی ڕەنگینەداوەتەوە، بەڵکو بوە بەپەتاو درمێكی كۆمەڵایەتی، تەنانەت هزرو بیرکردنەوەی هەندێک لەدەستەبژێرانی (بەناو سەربەخۆی سیاسیی‌و ڕۆشنبیریی‌و ئاینیی)ی نێو كۆمەڵگەی كوردی تەنیوە!.

بەرهەمهێنانی ئەمجۆرە لەپەیام‌و گوتارانە، جگە لەقووڵكردنەوەی دابەشکاریی كۆمەڵایەتی، لەژێر هەر پاساوێكدابێت، كاڵفامی‌و كەچ نەزەرییە بۆ هەر كەسێک‌و دامەزراوەیەك گەر پێیوابێت ئەمجۆرە زمان‌و گوتارانە بەرهەمهێنانی هۆشیاریی سیاسیی تاك‌و كۆمەڵە لەژێر چەتری پره‌نسیپەكانی ماف‌و ئازادی ڕۆژنامەگەریی‌و بیروڕادا، بگرە ئەم ئاراستەیە زیاتر دۆخی جەمسەرگەرایی تووند لەنێو كۆمەڵگەی كوردیدا دەخوڵقێنێ، بەتایبەتی لەنێو توێژێکی بەرفراوان‌و ئاکتیڤی گەنجاندا كە زیاتر بەركەوتەی گوتاری ڕقوكینەو چەواشەكارین لەڕێگەی پلاتفۆڕمە دیجیتاڵییەكاندا.

باوەڕ ناكەم هیچ میللەتێك بەقەد میللەتی كورد لەم قەوارە سیاسییە سەرگەردانەدا، لەدەرەنجامی كەڵەكەبونی قەیرانە سیاسیی‌و ئابوریی‌و كۆمەڵایەتییەكاندا لەدۆخێکی شەكەت‌و ماندوێتی دەرونیدا بژێت!، ئاخر چۆن هاوڵاتییەكی ئەم قەوارەیە، سەرباری شەكەت‌و ماندوێتی جەستەیی‌و نەهامەتی گوزەرانی، بێ هیوا نەبێت‌و بەردەوام لەدڵەڕوكێدا نەژێت، كە بەدرێژایی شەوو ڕۆژگار هەواڵی قەیران‌و ململانێ‌و تۆمەتهەڵبەستن‌و موئامەرات‌و كەڵكەڵەی شارچێتی دەرخوارد دەدرێت لەو كەناڵە ئاسمانییە هەرزەکارانەی ئەم زۆن‌و ئەو زۆن‌و هەندێ كارەكتەری پۆپۆلیستی هەڵتۆقیوی بەناو ئۆپۆزسیۆن لەپلاتفۆڕمە دیجیتاڵییە كۆمەڵایەتییەكاندا كە فەزای كراوەی ئەم ئامرازە تەكنۆلۆژییەیان كردوە بەگۆڕپانی واتەوات‌و پڕوپاگەندەی كەسیی‌و زانیاریی چەواشەكاریی، بێئەوەی تروسكاییەك لەچارەسەری راستەقینە بۆ هاوڵاتی ببەخشن!؟.

توێژەران‌و شارەزایانی دەرونناسی لەتوێژینەوەكانیاندا گەیشتون بەو دەرنجامەی كە بەكاربردن‌و بەركەوتنی چڕی رۆژانە بەناوەڕۆكی میدیای نەرێنی‌و بارگاویی بەقەیران‌و ململانێی سیاسیەکان، كاریگەریی دەرونی ئاشکرا لەسەر ڕەفتارو هەڵسوکەتی جەماوەر بەجێدەهێڵێت. وەكو: ڕاڕایی بەردەوام، هەستكردن بەبێتوانایی بیرکردنەوەو بڕیاردان، بێباكی سیاسیی لەپرسە چارەنوسسازەکاندا، نامۆبونی سیاسیی، تا ئەندازەی فەرامۆشكردن‌و بێباکی لەبەدواداچون بۆ هەواڵ‌و زانیارییە چەواشەكارییەكاندا.

لەم حاڵەتەدا، ئامرازەكانی میدیا لەبری ئەوەی ببن بەكەرەسەیەك بۆ هۆشیاریی سیاسیی، کەچی بەپێچەوانە، بون بەسەرچاوەیەك لەبەرهەمهێنانی دڵەڕاوكێی بەكۆمەڵ‌و حاڵەتی شڵەژان‌و فشاری دەروونی لای تاك‌و كۆمەڵ زیاتر دەكەن!.

لەئێستادا، جەماوەری ئێمە لەم قەوارەیەدا، هێندەی پێویستی بەمیدیایەكە واقیع‌و پێشهاتەكانی بابەتییانە بۆ ڕاڤە بكات، هیچ پێویستی بەململانێی كەناڵە ئاسمانییەكانی ئەم‌و ئەوی پارەدارو دەستڕۆیشتوەكانی کارەکتەرە سیاسیەکان نییە! جەماوەری ئێمە میدیایەكی پێویستە بوارێک بۆ دیالۆگی عەقڵانی بكاتەوە‌و یارمەتیدەربێت لەهێوركردنەوەی گرژیی دەرونی خەڵك، نەك قوڵكردنەوەی نەهامەتییەکانی.

هەموان پێویستە ئەو ڕاستییە بزانین كە ئایندەی میدیای كوردی بەستراوەتەوە بەتوانای خاوەن دامەزراوەكانی میدیا (بەجیاوازی جۆری ئامرازو خاوەندارێتیان) لەگەڕاندنەوەی بڕواو متمانەی جەماوەر، ئەو بڕواو متمانەیەش هەرگیز بەگوتاری پۆپۆلیستی‌و بەحەشاماتكردنی حزبی دروستنابێت، بەڵكو لەڕێگەی میدیایەكی پیشەییانە دروستدەبێت كە هاوڵاتی‌و پرسەكانی ڕۆژانەی لەسەروی ململانێ سیاسییەكانەوە بێت.

ئەم وتارە دەربڕی بۆچونی نووسەر خۆیەتی