کاتێك ئابوورییەکەت بەهێز بوو، هیچ لایەنێك ناتوانێت دەستوەردان لە بڕیارەکانتدا بکات، ئەم ئاراستەیەی نەخشە ڕێگەی ئێستای حکومەتی عیراق، ئومێدێکی گەورەیە، بۆ ڕاکێشانی متمانەی وەبەرهێنەرانی بیانی، چونکە هیچ کۆمپانیایەکی گەورە ئامادە نیە، لەوڵاتێکدا وەبەرهێنان بکات کە دەسەڵاتی چەك و میلیشیا بەسەریدا زاڵ بێت.
سەردانەکەی عەلی زەیدی سەرۆك وەزیر بۆ ئەمریکا، نەخشەڕێگەی سەردەمێکی نوێی عیراقیەکانەو پەیامێکیشە بۆ ناوەندەکانی بڕیار لەئەمریکا، کە ئێستا دەسەڵاتی گروپە گەنجەکەی عیراق، ووشەکانی(وەبەرهێنان و وزەو تەکنەلۆژیا) بەکاردەهێنێت، لە بری ووشەی(شەڕ و تیرۆر و هێڵی سووری میلیشیاکان) هەڵبەتە ئەمەش نیشانەی ئەوەیە کە سەرۆك وەزیرو گروپە گەنجەکەی دەسەڵاتی ئێستا، دەیانەوێت بەزمانی سامانی لەبن نەهاتووی عیراق و بازاڕو بازرگانیەوە لەگەڵ ئیدارەی ئەمریکا قسە بکەن، کە ئەمەش زمانێکی کاریگەرترە، لەگەڵ ئەو سەردەمەی ئێستا، کەبەرژەوەندی ئابوری لە پێشینەی هەموو کارەکاندایە.
دیدگای ئێستای حکومەتی عیراق، دیدگایەکی گەشبینانەو ژیرانەیە، هاوشانی ئەمانەش جێبەجێکردنی پرسی کۆنترۆڵکردنی چەك و سەروەری یاسا، تا ئێستا رووبەڕووی کۆسپێکی ئەوتۆ نەبۆتەوە بۆیە، نەخشەڕێگا یان ئیرادەی سیاسی ئێستا، لە دۆخێکی جێگیر دایه، هەوڵێکی زیرەکانەش لەئارادایە، بۆ سڕینەوەی وێنەی عیراق لەوڵاتێکی وێرانکراو بە جەنگ، بۆ وڵاتێکی پڕ لە دەرفەتی ئابووری و کارو وەبەرهێنان، کەئەمەش تاکە رێگایە بۆ دەربازبوون لەقەیرانە درێژخایەنەکان.
ئێستا "شۆڕشگێڕە کۆنەکان" و نەوەکانیشیان تا ڕادەیەك دەستبەرداربوونە لەبەڕێوەبردنی وڵات و بواریش ڕەخساوە بۆ گروپێکی گەنج، کە بەزمانی سەردەم و بەرژەوەندی ئابووری مامەڵە دەکەن.
هەنگاوە ئەرێنیەکان زۆر خێران، ئێستا بەبێ پەلاماردانی دژە تیرۆری عیراق و بەیاننامەی دادگایەکەی فایەق زێدان بۆ سەر دزو گەندەڵکارەکان، سامان و پارەو پولی دزراو (بەنهایەکی چواردە پیتی ئەبجەدی) میدیاکان دەگەڕێتەوە خەزێنەی دەوڵەت، ئەمەش ئەنجامی جێگۆڕکێی ئایدیۆلۆژیا کۆنەکانەو عیراقیش لە قەیرانەکانی دەستی کۆنەخوازەکانەوە پەڕیوەتەوە بۆ ئەوەی ئابووری و سامانەکەی لێرە بەدواوە بۆ گەلانی عیراق بێت، نەك موحاڕبینی قودەماو منداڵەکانیان.
خاڵی هەرە دیار لە پەیوەندی نێوان عیراق و ئەمریکا لە "هاوبەشییەکی ئەمنی و سەربازیەوە (کە بەردەوام بەهۆی قەیرانەکانەوە سەرقاڵ بووە) دەگوازرێتەوە بۆ "هاوبەشیەکی ئابووری و وەبەرهێنان ئەمە پەیامێکی ڕوونە، کە عیراق وەك وڵاتێکی خاوەن ئابووریەکی گەشەسەندوو مامەڵە لەگەڵ جیهاندا دەکات، نەك تەنیا وەك گۆڕەپانێکی ململانێی سەربازی.
ئێستا عیراق خاوەن سەروەرییەو دوور لە ململانێ ناوچەییەکان وەستاوەو خاوەن بڕیاری خۆیەتی و نابێتە بەشێك لەململانێی ئەمریکا لەگەڵ لایەنەکانی دیکەی ناوچەکە. دەسەڵاتدارانی ئێستای بەغداد، سەربەخۆیی بڕیاری سیاسی خۆیان دەپارێزن و گەلەکەیان ناکەنە قوربانی ململانێی هێزە ئیقلیمییەکان، ئەم هەنگاوەش لەڕەواییدانی زیاتر بەدەوڵەت، لە بەرامبەر بە "گروپە چەکدارەکان" داماڵینی چەکی میلیشیاکان و یەکخستنیان لەگەڵ دامەزراوەکانی دەوڵەت، پەیامێکی ناوخۆییە بۆ هەموو جیهان، لەپێناو بەهێزکردنی سەروەری عیراق و کۆتاییهاتنی دەوڵەتی سێبەر لەعیراقدا.
ئەم وتارە دەربڕی بۆچونی نووسەر خۆیەتی