لەتیف فاتیح فەرەج

من پەكەكە نیم ، قەتیش نەبوومە ، تازەش پێموایە كاتی بوون نەماوە ، لەبەر ئەوەی  ئێستا لەنێو پرۆسەی خۆ هەڵوەشانەوەدایە، لە زۆر بارو دۆخیشدا ڕووبەڕوو ڕەخنەم لێگرتون و پێمووتون لەو شوێنەدا من لە تەكتانا ناكۆكم ، بە نووسینیش ڕەخنەم لێیان هەیە ، ئاپۆچیش نیم ، بەڵام وا ئاپۆ دەبینم كە بیرمەندێكی ئاشتیخوازەو دەیەوێت لەنگیەكی دیرۆكی ڕاستبكاتەوە ، لە ناو ئەو هەموو تاریكی و وێرانەییەی دنیادا ، لە ناو ئەو هەموو شەقاوە سیاسیەی كە ئێستا دنیا بەڕێوە دەبەن كەسێك دێت باسی ئاشتی و پێكەوە ژیانی ئاشتیانە دەكات ، ئەو كەسەش سەر بەنەتەوەیەكی ستەملێكراوی دیرۆكەو نەتەوەكەی سەت ساڵ زیاترە لەبەردەم سڕینەوەو جینۆسایدایە، ئەمە دەبێت نەتەوەكەی شانازی پێوە بكەن نەك تانەو تەشەر ی لێبدەن ، من لەو پەیامدان و هەنگاوانەدا ڕەخنەم تەنها لەوەیە دەبێت بەرتاقای هەنگاوەكانی قوربانی ستەمكاریش بۆ ئاشتی بێتە پێشەوە ، ئەمەشم نەشاردوەتەوەو لە شوێنی خۆی ووتومە ، هەمیشە لە شەڕی نێوان جەلادو قوربانیدا دەبێت جەلاد وێڕای هاتنە پێشەوە بۆ ئاشتی داوای لێبوردنیش لە قوربانی بكات ، ئەمە سەرنج و دیدی منەو دەشێت كەسێكی تر جۆرێكی دیكە بڵێت ، لە گەڵ ئەوەشدا من باوەڕم وایە لە نێوان تورك و كورد ، عەرەب و كورد ، فارس و كورد یان پێكەوە ژیانی ئاشتیانە كە بە مانایەك " تێكەڵبوون و ئاشتبونەوە " دەگەیەنێت ، یان دراوسێیەتیە ، ئەویش  دراوسێیەتی باش و بێشەڕ، لەم دوو ڕێگەیە زیاتر نیە ، خۆ كەسانێك كە قسە نامێنێت نەیكەن بڕواناكەم هیچ ڕێگەیەكی تر شك بەرن .
من دەزانم ئاوەزی توركی ، عەرەبی ، فارسی ، ئاوەزی نەتەوەی زاڵ و سواغدراو بە ناسیونالیستی ئەوی تر نەبین و جۆرێك لە فاشیەتە، بەڵام ئاشتی دەرچەو دەرفەتە، لە دەرەوەی ئەمەشدا كورد بۆ ئەم قۆناغە دەبێت یان شەڕ بكات یان ئاشتی ، فەلەستین بەو هەموو پاڵًپشتیە عەرەبی و ئیسلامیەوە بەو دیرۆكەوە كە لە بواری دیبلۆماسیەت و پەیوەندیدا هەیەتی لە غەزە لە پەل و پۆ خرا ، كەس بە یەحیا سینواری نەوت خیانەتی كرد، ئەم پەندە بۆ كورد گرنگە كورد كام دۆستی هەیە لە عەرەب و ئیسلام بە ڕاستی لە گەڵیدا بێت ، من دەپرسم ئەگەر سبەی كورد داوای نوێنەری چاودێر بكات لە نەتەوە یەكگرتوەكان" كە بە نیازە بیكات"  چەند دەوڵەت پشتگیری دەكات ، فەلەستین لە یەكەم هەنگاودا ساڵی 1974 ،  پەنجاو پێنج دەوڵەت  واژوی پێشنیازەكەی بۆ كردو لە یەكەم دەنگدانیشدا بۆ وەرگرتنی نوێنەرەكەی 95 دەوڵەت بە بەڵێ‌ دەنگیانداو تەنها 17 دەوڵەت وتیان نەخێر ، بێگومان هەموو دەوڵەتە عەرەبی و ئیسلامیەكان بە بەڵێ‌ دەنگیان دا ، ئەی كورد تۆ بڵێی دەوڵەتە عەرەبی و ئیسلامیەكان هەمان هەڵًوێستیان هەبێت و كەمێك ئاكاری دینی و ئینسانی بیانجوڵێنێت!!.
لە داهاتودا ئەوە دەبینین و ئەوەش دەزانین كە دەبێت لە بری ئومێد هەڵچنین لە سەر عەرەب و ئیسلام دەبێ‌ چاومان لە هەڵوێستی فەڕەنساو ئیتالیاو باشوری ئەفریقیاو پیرۆو لۆكسەمبۆرگ بێت ، دەی كەواتە لە ناو ئەم بارو دۆخەدا جگە لە ئاشتی  چی تر ، هەڵبەت بۆ كوردیش جگە لە یان شەڕ یان ئاشتی بژاردەیە تر نیەو ئەمەبە فشەو فاڵ و خۆ بادان و قسەی زل نابێت،  ئەوانەی تێكەڵ بوونەوە یان تێكەڵكردنەوە كە من لام وایە دەبوو لە گەڵیدا پێكهاتنەوەو ئاشتبوونەوەش بهاتایە وەك ڕادەستبوون و ملدان دەبینن و دەڵێن ئاشبەتاڵ یان ئەوەتا بە چاویلكەی ڕەشەوە لە وڵاتانی ئەوروپی ئەو هەموو پێكەوەییە نابینن، یان ئەوەتا داڵدە دانی بەعسی و عەرەب لە هەرێمی كوردستان نادیدە دەكەن ، لە داهاتودا دەردەكەوێت زۆرێك داعشیش لە هەرێم بوونەو شاهانە ژیاون ، دەبێت هەندێك ئاوەزیانە شیكاری ئەو دۆخەو ئەو هەنگاوانە بكەین و هەر لە خۆوە نەكەوینە ناو.
ڕێگەی پڕ كەندو لەندی ئاشتی ئەگەر خوێنی تێدا نەڕژێت و كەسی تێدا نەبێتە قوربانی زۆر لە ڕێگەی شەڕو وێرانی باشترە لە گەڵ ئەوەشدا لە بری دژایەتی و تانەو تەشەر دەكرێت بە ڕەخنەو سەرنج و پاڵپشتی كردن لە پرۆسەكە بگەینە جێیەكی دیكە ، من ئێستاش دەڵێم لانی كەم ئەوە زۆرە كە نزیكەی ساڵ و نیوێكە درۆنی توركی و چەكی ناتۆ لە باشوری كوردستان و لەو شاخانە كیژو كوڕی كوردیان شەهید نەكردووە

ئەم وتارە دەربڕی بۆچونی نووسەر خۆیەتی