ئەوە چەندین ساڵە هەرێمی کوردستان دووچاری چەندین هەڵەی جۆراوجۆر بۆتەوە کە ئەو قەوارەیەی ڕۆژ دوای ڕۆژ پێ لاوازکردووە ، لاوازیەکەی وایلێکردووە کە ئاسان بێت بۆ کۆسپ دروستکردنی سیاسی و ئابووری و سەربازی و تەکنیکی…تاد
لە لایەن مەرکەزێکی لاوازەوە بۆی و ، وڵاتانی ئیقلیمیش بە ئاسانی تەدەخول بکەن و بڕیارەکان بەسەر پایتەختەکانیان دابەش بکەن ، کە پێم وایە یەکێک لە هۆکارە سەرەکیەکانی ئەو لاوازیە لە ناوخۆیەتی بەتایبەتی لاوازی متمانەیە بە حزبەکان و دەسەڵات و خودی حزبەکانیش متمانەیان بە یەکتری نەماوە و هەڵەکانیش هەروا کەڵەکە دەبن کە دواجار ئەگەر وا بڕوات دەگەنە بنبەستێک مەحاڵە چارەسەر بکرێن ، کە هەمیشە ئەمانە هۆکاری سەرەکی داڕمانی ئیمپڕاتۆرەکان و وڵاتانن ، مەبەستم متمانە لەنێوان هاوڵاتی و دامەزراوە ، نێوان هاوڵاتی و دەسەڵات و حزبەکان ، ئەمانە بە گووتار بونیاتنانرێت ، بە یەک هەڵەکردنیش داناڕمێت ، لاوازی و نەمانی متمانە دەرئەنجامی ئەزموونی بچووکە کە لەسەریەک کەڵکە دەبێت ، بەڵێنێنێکە دەدرێت نایگاتێ ، بەمە هاوڵاتی ئەوە فێردەبێت کە ڕاستگۆیی دامەزراوە بەوەی دەیبینێت ، دەیپێوێت ، نەک بەوەی گوێی لێدەبێت ، ئەمە دەردە کوشندەکەی ناوخۆمانە نەک هۆکاری دەرەکی ، جا ئەوڕۆش دوای ڕۆیشتنی هێزی هاوپەیمانان ( بۆزانین ؛ سیستەمی بەرگری ئاسمانی و بەشێک لە مارێنزی ئەمەریکا لە هەولێر و بەغدا دەمێنن ) ، دوای ئەو ڕۆیشتنە هەرێمی کوردستان یان تاکە پارچە ئازادەکەی نیشتیمان ، فورسەتێکی مێژوویی لەبەردەمدایە بۆ بەخۆداچونەوە و ڕاستکردنەوەی هەڵەکان و گەڕاندنەوەی متمانە و هەڵسانەوە و کردنەوەی لاپەڕەیەکی نوێ و وەلانانی دووبەرەکی و بەرژەوەندی حزبی و سیاسی و کەسیی بۆئەوەی ببێتە هەرێمێکی بەهێز ، بڕوام وایە کە دوای ڕۆیشتنی هاوپەیمانان ، لەوانەیە بەروەڕووی تەحدیاتی ئەمنی و ، ئابووری و بەرهەمهێنانی مەرکەزیەتی نوێ بە ڕووخساری جیاواز ببینەوە ، کە من ئەوەندە ترسم لێی نیە ، چونکە ئەو مەرکەزیەتە لە عێراق تائێستا لاوازە ، ڕاستە بە ڕۆیشتنی هاوپەیمانان « ڕۆژی سەروەری عێڕاق » ڕاگەیەنرا ، بەڵام وێڕای بوونی میلیشیای چەکدار و بۆشایی ئەمنی و سیاسی ، ئەمە کەی سەروەریە کە تەواوی سەرچاوەکانی عێڕاق لەکن وەزیری خەزینەی ئەمەریکا بێت !! ئەوە ئەمەریکایەکانن دەستیان لەسەر پارەی نەفتی عێڕاقە ، پاشان وەزارەتی خەزینەی ئەمەریکا پارە بۆ ئەو پڕۆژانە تەرخاندەکات کە ئەولەویەتن لەکن واشنتۆن ، کەواتە ئێمە هێشتاش دەتوانین ئەو لاوازیەی هەرێمی کوردستان بیگۆڕین بۆ بەهێزی ، هەر لە ڕێکخستنەوەی نێو ماڵی کورد و چارەسەرکردنی برینەکانی ناوخۆ و تەنازولکردن بۆ یەکتری تا دەگاتە کاراکردنەوەی پەرلەمان و پێکهێنانی حکومەت و گەڕاندنەوەی متمانە ، واتە متمانە لەنێوان هاوڵاتی و دەسەڵات ، نێوان وەبەرهێن و دامەزراوەکان و ، متمانەی نێوان کۆمەڵگا و ئاییندەی ، خودی متمانە بۆتە یەکێک لە سەرمایە گرنگەکانی ئابووری مۆدێرن و ، پێناسەکردنەوەی هاوڵاتیبوون ( المواطنة ) و ، هەروەها بۆ بەهێزکردنەوەی ئەو کوردستانە نابێت دامەزراوەی سەر کاغەزت هەبێت و ، دامەزراوەکانی پەرلەمان و حکومەت و دادوەری نابێت ببنە پەیکەرێکی شکلی دوور لە سەربەخۆیی و لێپرسینەوە و ، پاشان کاتیەتی دەستوورێک دابنێین کە پێی پابەند بین.
لەگەڵ جەختکردنەوە لەسەر وەلانانی ئابووری لاواز و نادادپەروەری کۆمەڵایەتی و ، پێویستە ئابووریەکی هەمەچەشن و کراوە بەروەڕوەی جیهان بونیاتبنێین و هەموو ئاسانکاریەکیش بۆ وەبەرهێنی بیانی بکرێت بایەخێکی زۆر بە گەشتوگوزار بدرێت بەمە ئابووری دەبوژێتەوە و هەلی کار دەستەبەر دەبێت و ، لەهەمان کاتدا پەیوەندیەکی دۆستانە نەک پاشکۆیی لەگەڵ دراوسێکانمان و پردێکی پەیوەندی بەهێزیش لەگەڵ بەغدا بنوێنین ، ئەگەر دەتەوێت ئەم کشانەوەی هاوپەیمانان بۆ لەدایکبوونی هەرێمێکی نوێ و بەهێز بگۆڕێت ، دەبێت بڕیارەکانی نیشتیمانیی بن ، کە بڕیار نیشتیمانی بوو خۆشەویستی بۆ نیشتیمان دەگەڕێتەوە و زۆر ڕاستگۆیانە دەبێت ، کە پێم وایە هەستی نیشتیمانی تاکی کورد و ، هەر ڕاستگۆ بووە و ڕەگداکوتاوە ، ئەوە هەڵەی حزبەکانن دایانمرکاندووە ، نیشتیمان هەرتەنها بە قسە و دروشم ناپارێزرێت ، کاتێک بڕیارەکان دەبنە بەشێک لە بەرپرسیارێتی ، ئەوکات خەڵک نیشتیمان دەپارێزێت و بناغەی دادەنێت ، ڕاستگۆترین پێناسەی نیشتیمانپەروەری ئەوەیە کە پێش ئەوەی لە نیشتیمان بپرسیت ، لەخۆت بپرسە ، ئەوڕۆ ئەمن چیم کردووە ، بۆئەوەی ئەو نیشتیمانە هەندێک باش بێت و بەهێز بێت…..
بۆیە هەر دواخستنێک بۆ فورسەتی بەهێزکردنەوەی ئەو لاوازیەی هەرێمی کوردستان ، وادەکات دەستی ناحەزان واڵابکات کە بەکەیفی خۆیان و لەبەرژەوەندی خۆیان هەڵیسووڕێنن و لەدواجار دایبڕمێنن ، شەڕی دادێی ئێمە ئەوە نیە چ چەکێکمان پێیە بۆ پارێزگاریکردن لە سنوورەکان ، بەڵکو لەسەر ئەوەیە ، کە هاوڵاتی کێیە ؟ ئەو کوردستانە هی کێیە و چۆن وابکرێت کە دەسەڵات ملکەچی قانون بێت ؟! ئێمە تا ئێوارە باس لە سەربەخۆیی خۆمان بەرانبەر ئەوانی تر دەکەین ، بەڵام ئەگەر تۆ پشتت بە خۆراک و دەرمان و داهات و پارە و سیاسەتی ئەوانی تر بەست ، بە چ مانای ڕاستەقینە تۆ سەربەخۆی و سەروەریت هەیە !! جیهان لە ماوەی ئەم چەند دەیەی ڕابردوو زۆر گۆڕاوە ، چیتر هەرتەنها هێزی سەربازی سەرچاوەی نفوز نین ، بەڵکو توانای ئابووری و دارایی و تەکنۆلۆژیا و پشت بەخۆبەستن بونەتە بنچینە کە سەروەری ڕاستەقینەی لەسەر بونیاتدەنرێت ، کە هەرێمی کوردستان هەموو ئەو سەرچاوانەی هەیە ، ئێستاش خۆرهەڵاتی ناوەڕاست کە هەرێمی کوردستان بەشێکە لێی بە قۆناغێکی هەستیار و مەترسیداردا دەڕوات ، کە داواکراوین دەبێت هەموومان هاوکاری یەکتری بکەین و ، ئەمە دوا زەنگی مەترسیە کە دبێت خۆمان ڕێکخەینەوە و ئامادەبین بۆ ئەو قۆناغە گەرداوەی کە بەسەر ناوچەکە دێت !!
ئەم وتارە دەربڕی بۆچونی نووسەر خۆیەتی