حەسەن ڕەحمان پەناە

شکستی قورس و گەورەی کۆماریخوازان و سەرکەوتنی بەرچاوی دیموکراتەکان لە هەڵبژاردنە ناوەڕاستییەکانی هەردوو ئەنجومەنی ئەمریکا، پێویستە لە چوارچێوەیەکی فراوانترەوە هەڵبسەنگێندرێت وەک تەنها گۆڕانکارییەکی ئاسایی لە پەرلەمان و ملمەڵانێیەکی حیزبی چاوی لێنەکەرێت. ئەم هەڵبژاردنانە، لە ڕاستیدا، دەربڕی پاشەکشەی سیاسیی یەکێک لە توندوتیژترین و دواوەگراترین ڕەوتەکانی ڕاستی پانخواز و نئولیبڕاڵی هاوچەرخ و لێدانێکی جدی بوون لە پڕۆژەی سیاسیی دوناڵد ترامپ و بزوتنەوەی MAGA  .ئەو ڕەوتەی کە بە تێکەڵەیەک لە نێئۆفاشیزم، دژە ژن‌، دژایەتیی کۆچبەران، ڕەگەزپەرستی، دژایەتیی ڕەنگین‌پێستەکان، لۆمپەنیزمی سیاسی، فریوکاری جەماوەر و دەسەڵاتخوازی، نەک تەنها کۆمەڵگەی ئەمریکا، بەڵکو کەشی سیاسیی جیهانیشی تێکداوە و کاریگەریی لەسەر داناوە.
شکستی ترامپیسم، لاوازبوونی یەکێک لە گرنگترین دەرکەوتە هاوچەرخەکانی نێئۆفاشیزمی جیهانی و نیشانەیەکە لە خۆڕاگریی کۆمەڵایەتی بەرامبەر بە سیاسەتە جیاکاریخواز، دواوەگەرانە و دژەمرۆییەکانی ئەو ڕەوتە. لەگەڵ ئەوەشدا، نابێت لە هەڵسەنگاندنی ئەم سەرکەوتنەدا تووشی خوشباوەڕیی سادەنیگارانە ببین.
سەرکەوتنی دیموکراتەکان لەخۆیدا بە مانای سەرکەوتنی چەپ، بزوتنەوەی ئازادیخوازی و مرۆڤ‌دۆستی یان هێزە کۆمەڵایەتییە ڕزگاریکەرەکان نییە. حیزبی دیموکرات، سەرەڕای جیاوازییە سیاسی و کولتوورییەکانی لەگەڵ کۆماریخوازان و هەبوونی ئاراستەی جۆراوجۆرتر لەناو خۆیدا و ئاستی جیهانیش ، هێشتا بەشێکی دیکەی هەمان پێکهاتەی دەسەڵاتی سەرمایەداری و ئۆلیگارشیی ئابووری و سیاسیی زاڵ بەسەر ئەمریکا و جیهانە. حیزبی دیموکرات وەک باڵێک لە سەرماییەی جیهانی، هەندێک جار بە زمان و ئەدەبیاتێکی جیاواز، هەندێک جاریش بە داپۆشینی داواکارییە کۆمەڵایەتییەکان و بە کەڵکوەرگرتن لە پوپولیسمی لیبڕاڵی، هەوڵی پاراستن، بەرهەمهێنان و دووبارە بەرهەمهێنانەوەی پەیوەندییە ئابووری و سیاسییە زاڵەکانی سەرمایەداریی ئیمپریالیستی دەدات.
لەو ڕوانگەیەوە، نابێت شکستی ترامپ بە کۆتاییهاتنی ترامپیسم و سەرکەوتنی دیموکراتەکان بە بەدیهاتنی داواکارییە مێژووییەکانی جەماوەری کرێکار و زەحمەتکێش و ڕەنگین‌پێستەکانی ئەم وڵاتە بزانین. ترامپیسم تەنها تاکێک نییە، بەڵکو دیاردەیەکی سیاسی، کۆمەڵایەتی و ئایدیۆلۆژییە کە ڕەگ و ڕیشەی لە قەیرانە پێکهاتەییەکانی سەرمایەداری، قوڵبوونەوەی کێشمەکێشی چینایەتی، نایەکسانیی کۆمەڵایەتی و گەشەکردنی هێزەکانی ڕاستی ئەفڕاتی و ملمڵانێ جیهانییەکاندا هەیە. شکستی هەڵبژاردنی کۆماریخوازان لە هەڵبژاردنی ٣ی نوامبری ٢٠٢٦، لێدانێکی گرنگە لە کەسایەتیی ترامپ و حیزب و حکومەتی ژێر بەرپرسیارێتیی ئەو، بەڵام بە مانای کۆتاییهاتنی یەکجارەکیی بە دیاردەی ترامپیسم و نێئۆفاشیزمی ئەم سەردەمە نییە.
لەو نێوەندەدا ئەوەی شایانی باسوگاڵتە پێکردنە، دڵخۆشی و شادیی منداڵانەی کۆماری ئیسلامی وەک دەرکەوتەی ڕووتی فاشیزمی ئیسلامی لە شکستی ترامپ و حیزبەکەی، چیرۆکێکی دیکەیە! ڕژێمێک کە لە بواری ناوخۆییدا بە سەرکوتی خوێناویی ئازادییەکانی جەماوەر، جیاکاریی ڕەگەزی، لێسەندنەوەی مافە سەرەتایەکانی هاووڵاتیان لە ئێران، سەرکوتی توندوتیژی کەمینە نەتەوەیی و ئایینییەکان، سەرکوتی کرێکار و بزوتنەوە ناڕەزایەتییەکان و جێبەجێکردنی دیکتاتۆریی ئایینی ناسراوەو لە بواری نێودەوڵەتیشدا ناوەند و پاڵپشتی سەرەکیی هەناردەکردنی تیرۆریزمی جیهانی (شۆڕشی ئیسلامی)، ڕێکخستنی گرووپە پڕۆکسییەکان و نائارامکردنی وڵاتان و شەڕ و خوێنڕشتنە، ئێستا شکستی ترامپیسم جەژن دەگرێت. ئەم شادی و دڵخۆشییە نەک لە ڕوانگەی ئازادیخوازی، یەکسانیخوازی و دژایەتیی بنەڕەتی لەگەڵ فاشیزم و دژەئیمپریالیستیی ڕاستەقینەوەیە، بەڵکو لە ڕوانگەی ملمڵانێ و ناکۆکیی بەرژەوەندییە سیاسی و جیۆپۆلەتیکییەکانی خۆی و دەرکەوتەیەکی دیکەی فاشیزمی حکومەتی و ئایینییە کە ئەم ڕژێمە نوێنەری سەرەکیەتی لە ئاستی ناوچەیی و جیهانی.
گاڵتەجاڕیی تاڵی مێژوو لەوێدایە کە فاشیزمی ئیسلامیش لە ئاوێنەی شکستی فاشیزمی ئەمریکاییدا، دەرفەتی شادی و دەربڕینی بوونی خۆی دۆزیوەتەوە، بێ ئەوەی بچووکترین پەیوەندیی بە ئامانجەکانی ئازادی، یەکسانی، ڕزگاریی مرۆڤ و خەبات دژ بە ستەم و زۆردارییەوە هەبێت.
ڕەنگە گرنگترین وانەی ئەم هەڵبژاردنانە هەر ئەوە بێت کە شکستی هێزێکی کۆنەپارێز، بە مانای سەرکەوتنی هێزە پێشکەوتنخواز و نوێگەرەکان نییە. هەروەها، پاشەکشەی باڵێک لە چینی دەسەڵاتدار، بە مانای ڕزگاربوونی چینی هەژار و ستملێکراو لە ژێر دەسەڵاتی ئابووری و سیاسیی چینی دەسەڵاتدار و نوێنەرە بێ‌بەزەییەکەی نییە.
سەرکەوتنی ڕاستەقینە بۆ بێبەشانی کۆمەڵگە ئەو کاتە بەدی دێت کە چینی کرێکار، ژنان، گەنجان، کۆچبەران، ڕەنگین‌پێستەکان و هێزەکانی دیکەی ژێر ستەم و سەرکوت، نەک تەنها وەک دەنگدەر و ئامرازی ملمڵانێی حیزبە دەسەڵاتدارەکان، بەڵکو وەک هێزێکی سیاسی و کۆمەڵایەتیی سەربەخۆ، چارەنووسی خۆیان بەدەستەوە بگرن. ئەمەش پێویستی بە هۆشیاری، ڕێکخستن، یەکگرتوویی و خەبات بۆ ڕزگاری و کۆمەڵگەیەکی ئازاد و سۆسیالیستی هەیە.
٤ی نۆڤەمبەری ٢٠٢٦

ئەم وتارە دەربڕی بۆچونی نووسەر خۆیەتی