شارپرێس:

دادگای سلێمانی لەڕونکردنەوەیەکدا دەڵێت، کەسێک بەناوی سامان سەید عەتار خۆی وەک دادوەر دەناسێنێت و لە دەزگا میدیاییەکان وەک دادوەر لێدوان دەدات، بەڵام ئەو کەسە  دادوەر نییە و سەربە هیچ دامودەزگایەكی دادوەری نییە.

 سەرۆكایەتی دادگای تێهەڵچونەوەی ناوچەی سلێمانیی باسی لەوەکردوە،" لەهەندێك تەلەفزیۆن و دەزگای میدیایی چاوپێكەوتن و لێدوانی كەسێك بڵاودەكرێتەوە بەناوی (سامان سەید عەتار) كە گوایە دادوەرە و وەكو دادوەر لێدوان دەدات، لە شوێنانی تریش خۆی بە دادوەر ناساندوە و ئەو سیفەتەی بۆ بەرژەوەندی تایبەتی خۆی بەكارهێناوە ".

 ئەوەشیخستەڕوو،" ئاگاداری هەموو لایەك دەكەینەوە كە ئەو كەسە دادوەر نییە و سەربە هیچ دامودەزگایەكی دادوەری نییە، نە ئێستا و نە لە ڕابردووش دادوەر نەبووە، بۆیە قبوڵكراو نییە هیچ دەزگایەكی میدیایی وەكو دادوەر بیناسێنێت ".

سەرۆکایەتی دادگای سلێمانی ئاماژەی بەوەشکردوە،" سكاڵای یاسایی لەسەر كەسی ناوهاتوو و هەركەسێكی هاوشێوە تۆمار دەكەین بەتۆمەتی بەكارهێنانی نازناوی دادوەر بەشێوەیەكی ناڕاست ".