شارپرێس:

تونجەر باقرخان، هاوسەرۆکی دەم پارتی لە سلێمانی ڕایگەیاند، دەیان هەزار سیاسیی کورد، تەنیا بەهۆی ئەوەی بەرگرییان لە مافی گەلەکەیان کردوە و خەباتیان بۆ زمان و ناسنامەی کورد کردوە، لە زینداندان، دەشڵێت ئەگەر پڕۆسەی ئاشتی سەربگرێت سیاسەتی نکۆڵیکردن کۆتایی دێت و زیندانیکراوان ئازاد دەبن.

تونجەر باقرخان، هاوسەرۆکی گشتیی دەم پارتی لەمیانی پانێڵێکدا لە کۆنفرانسی هاوپەیمانیی سۆشیاڵ دیموکراتی وڵاتانی عەرەبی لە سلێمانی ڕایگەیاند، “ماوەی ١٠٠ ساڵە گەلانی ڕۆژهەڵاتی ناوەڕاست دەچەوسێندرێنەوە، بەڵام ئێستا لە قۆناغێکی نوێداین، کە گەلانی ناوچەکە دەیانەوێت بە ئازادی و یەکسانیی بژین”.

وتیشی: “لە تورکیا بە بانگەوازەکەی ئۆجەلان پڕۆسەی چارەسەریی دەستیپێکردووە، ئێمە دەمانەوێت کۆتایی بە سیاسەتی نکۆڵیکردنی ١٠٠ ساڵە بێت و کۆمارێکی دیموکرات بونیادبنرێت، ئەگەر ئەم پڕۆسەیە سەربگرێت، سیاسەتی نکۆڵیکردن کۆتایی دێت، کارە نایاساییەکانی لەدژی ئۆپۆزسیۆن و کورد کۆتاییان دێت و زیندانیکراوان بە ئازادیی خۆیان شاد دەبنەوە.”