شارپرێس:

بافڵ تاڵەبانی ڕایدەگەیەنێت،" هەوڵەکانمان بۆ سەرخستنی پرۆسەی ئاشتی لە تورکیا چڕدەکەینەوە، چونکە ئەمە خزمەت بە بەرژەوەندییەکانی تەواوی گەلانی ناوچەکە دەکات ".

بافڵ تاڵەبانی، سەرۆکی یەکێتیی نیشتمانیی کوردستان لە بارەگای مەکتەبی سیاسی لە سلێمانی پێشوازی لە وەفدێکی باڵای پارتی یەکسانی و دیموکراتیی گەلان (دەم پارتی) کرد کە پێکهاتبوون لە تونجەر باکرهان، هاوسەرۆکی دەم پارتی، چیدەم کلچگون ئوچار، هاوسەرۆکی پارتی هەرێمە دیموکراتییەکان، جەنگیز چاندار و بەردان ئوزتورک، پەرلەمانتارانی دەم پارتی.

بەپێی ڕاگەیەنراوەکە، سەرۆکی یەکێتی وتویەتی،" ئێمە پابەندین بە رێبازی سەرۆک مام جەلال بۆ بەرەوپێشبردنی برایەتی و هەوڵەکانمان بۆ سەرخستنی ئەم پرۆسەیە چڕدەکەینەوە، چونکە ئەمە خزمەت بە بەرژەوەندییەکانی تەواوی گەلانی ناوچەکە دەکات ".


لەڕاگەیەنراوەکەدا ئەوەش هاتوە،" کردنەوەی فڕۆکەخانەی نێودەوڵەتیی سلێمانی تەوەرێکی دیکەی کۆبوونەوەکە بوو، وەفدی پارتی دەم هیوایان خواست لە زووترین کاتدا فڕۆکەخانەکە بکرێتەوە ".