گومان دەكەم یادی هەڵەبجەو ئەنفال بكرێتەوە، گازبارانی هەڵەبجە ئەگەر بۆكورد ئازاربوایە دەبوو بیرێك لە سارێژكردنیشی بكرایەتەوە.
یادەوەری ئەگەر نەبووە هەوێنی دادپەروەری و شكۆی مرۆڤ، دەبێتە سوكایەتی و درۆیەكی گەورە كە هێندەی ١٦ی ئازارو ١٤ی نیسان بە ئازاربێت .
ئەگەر لە رۆژانی یادەوەری تاوانەگەورەكاندا، هەر كەسەو لەئاستی خۆیەوە تەنها یەك درۆی لە خۆی دابماڵیایە، ئێستا دەبووینە راستگۆترین نەتەوەی سەرزەمین .
بەڵام ئەفسوس ! یادی ئەنفال وهەڵەبجە زۆرترین درۆی تێدا دەكرێت، هەربەڵێنەو دەدرێ وئیدی بەهایەك بۆ قسەو بەڵێن نامێنێتەوە .
كۆمەڵەو رێكخراوەكانی تایبەت بە دۆسێی ئەنفال وهەڵەبجە ئەگەر خۆیان بەشێك نەبن لە بەڵێندەران ئەوا لەهەمووان بێ باكترن لەوهەموو بێ بەڵێنییە.
سەیرە ! ئەو رێكخراوانە بێباكن لەو حەشرەی راگەیاندن بە دۆسێكەو بەقوربانیەكانی دەكات ؟
بێباكن لەو گۆڤارو رۆژنامەو كتێبانەی پڕن لە دزی وفزی و گزی و پەرەگرافی ناراست و چەواشەكار !
وەرن با یاد بكەینەوە، نەك بە درۆوە وای نیشان بدەین كە خەمبارین .
وەرن با ئیدی هەرهیچ نەبێت لەو رۆژانەدا مرۆڤی بەمۆراڵ وبە ویژدان بین.
عومەر محەمەد
ئەم وتارە دەربڕی بۆچونی نووسەر خۆیەتی