سەبارەت بە فەتواکە

28/06/2020

عەزیز ڕەئووف

 کێشەی ئێمە زەمینیە، پەنابردن بۆ ئاسمان چارەی کێشەکانمان ناکا. کێشەی بندیوار و دوو موچە دروستکراوی دەستی ئەو سیستەمەن کە خۆیان دەزانن موسوڵمانی کورد پارەی بندیوار و دوو موچە بە لاستیکەوە لوش دەدەن و سەریش بەرز ناکەنەوە بۆ لای خودا. ئایین لەسەر پاداشت و سزا دامەزراوە. فتوا چارەسەری سیستەمی سیاسی ئێمە ناکا بەڵکو سزایەک پێویستە.

ئەو موسوڵمانە بندیوار و دوو موچەیەی کورد چەندین ساڵە پارەی حەرام دەخوات و بۆ چرکەیەکیش ویژدانی نەجوڵاوە ئێستا بە فەتوایەکی برادەران مێشیش میوانی نیە. دوای ڕاپەڕین زۆر شتمان دۆڕاند زۆر شت، نە موسوڵمانی ڕاستەقینە بووین، نە سیاسیەکی خاوەن ویژدان، نە کوردێکی دەست زبر و خاوەن شکۆی نێو چیاکان.

ئێستاش دۆخەکە فەتوانی ناوێ، موچەی ئەم مانگەی بندیویارەکان وەک خۆی دەدرێ، ئەگەر دەوێرن فەتوایەک دژ بە دەسەڵات دەربکەن کە بڕیاری دوو موچە و بندیواری دەرکردووە و بە یاسای کردووە.

برادەرێک دەناسم بندیوارە، یەک حەج و دوو عەمرەی کردووە. ئاسمان و زەمینیش بێدەنگە.