یەکێتی چۆن بێت
وەڵامێک بۆ چی دەگوزەرێ میرم؟

29/09/2020

سامان سنجاوی

ساڵانێک بوو، بەڵێ، بەهیوای گەڕانەوەی پێگەو سەنگی یەکێتی بوین، لەکۆنگرەیەکدا یەکێتی سەرلەبەر رێکبخرێتەوە، پەێرەوو پرۆگرام بکرێتە، بنەمای کار، چونکە کێشەی سەرەکی یەکێتی، بەدرێژایی مێژوو کەمترین کاری بە پەیڕەوو پرۆگرام کردوە، لەدوای راپەرینیشەوە، یەکێتی لەناوخۆیی و لە حوکمڕانیدا، بەدەگمەن ئاورو کاری بە تێزەکانی سۆسیال دیموکرات، کردوە. حزبێک لەمێژوویدا بە قۆناغ بیری لەخۆیی داماڵی بێت، دەرئەنجامەکەی تەنها مانەوەی مێژوویەکەیێتی لە شۆڕش و قارەمانێتی پێشمەرگە و شەهیدانی، دیارە حوکمی مێژوو بۆ ئایندە لە مێژوودا دەمێنێتەوە. 

لێرەدا، کێن ئەوانەی کەپێت وایە هەموو لەگەڵ ئەودا بوین جەنگاوەرانی شاخ پشویەک بدەن، ئەو هەموە کێن؟ چۆن تۆ پێتوایە نەک هەموو پێی وابێت، سەرخەوێک بشکێ، ئەو سەرخەوە ساڵێک کشا نازاندرێت کەی دەشکێت! کەی ئەم نوێ نوێ بونەوەیە خەباتی مەدەنی دەستپێدەکات؟ پێت وایە خەباتی مەدەنی بەبێ بیرو فەلسەفەی سیاسی بەڕێوە دەچێت؟ سەرکردایەتی یەکێتی لەکام قۆڵەوە بەسەر شاڕێی خەباتی مەدەنی لەڕێگادان؟ چونکە خەباتی مەدەنی بەکردەوە، وورد ورد هاوڕا و هاوبەش لەگەڵ چین و توێژەکان، لەگەڵ رێکخراوە پیشەیی، جەماوەری، مەدەنی، و ناحکومییەکان، وردتریش لەکاری رێکخراوەیی ngo  کان،  کارکردنە لەسەر گروپ، خێزان و تاک، کە خواستەکان خۆیان لە کەپینگ و کاری کورت مەدوا، لەناو هەناوی روانگەی ستراتیژی یەکێتی، بۆ گەشەپێدانی مەدەنیەت و پرۆسەی دیموکراسی دەبینێتەوە، کە یەکێتی لە پێڕەوو پڕۆگرام چەسپاندویەتی. هەر بۆیە دەبێ بپرسین جەنگاوەرانی شاخ هەر بەتەنها شەڕکەر بون، چونکە چەمکی جەنگاوەر هەر بۆ شەڕە، یان شۆڕشگێر و خاوەن روانین و روانگەی سیاسی یەکێتی بون، ئەی زۆربەی ناکۆکییەکانی کۆمەڵە رەنجدەران لەناوخۆیدا و لەگەڵ یەکێتی و یەکێتی لەگەڵ بزوتنەوەی سۆسیالست و کۆمەڵەی رەنجدەران و بزوتنەوەی سۆسیالست، لەناو یەکێتیدا لەسەر فکرو ئاراستەی سیاسی نەبون، ئەی کەوایە بۆ دەبێت، ئەم خەباتگێڕانە هەر بەتەنها جەنگاوەر بوو بن؟

ئەی کۆنگرەی یەکێتی ئەو هیوایەی لەپاڵ ئەو درەختە مەزنە رەگ و ریشاڵی قوڵە، هیوا نەبوو بۆ نەمامێکی نوێ ئەی ئەو نەمامە چۆن داچێندرا؟ کۆنفڕانسی کۆمیتەکان، مەڵبەندەکان، مەکتەبەکان، چۆن بەڕێوە چوو، ئەندامانی کۆنفڕانس و کۆنگرە لەسەر بنەمای کادری پێگەیشتوو چالاک و خورەوشت بەرز و دەستپاک و خۆشناوی ناو جەماوەر هاتنە پێشەوە، یان لیست و لیستکاری و پاڵپێوەنان و دوورخستنەوە، پابەندی کەسی.. هتد.
ئەی کۆنگرە کە ئەو هیوا گەورەیە بوو، چەند رۆژی بۆ  بەرنامەو سیاسەتی حوکمڕانی، بۆ بیرو بنەماکان و پەێڕەوپڕۆگرام، بۆ پەیوەندییەکان، ئۆرگانەکان..هتد تەرخان کرد، نوێ نوێبونەوە، ئەو هیوا پیرۆزە، هەر بۆ گۆڕینی کەسەکان، و لیستی دەرچوان و تەکەتول بوو، یان دەبوو یەکێتی پاک پاک بکاتەوە لە بێبەرنامەیی و تەکەتول و هەڵەکانی رابردوو.. هەر ئەو کۆنفڕانسانە بوو سەدان کادری هەناسە سارد کرد، هەر ئەو کۆنگرەیەبوولە لیستگەراییدا من و سەدان کادری هەناسە سارد کرد، بێگوێدانە هەستی هەڤاڵێتی، سەرکەوتوانی لیست نەک توانای خۆیان لەدەرەوەی کۆنگرە تەپڵ و زوڕان و دەهۆڵ دڵیان دەردەهێناین!  

هاوڕێم سەمەد زەنگنە، من و سەدان کادر بێدەنگ بوین، چونکە یەکێتیمان لەدڵماندا هەڵگرتوە، بەڵام، ئێستاش سیاسەتی دەهۆڵ بەردەوامە، هەر ئەم سیاسەتە، بەداخەوە وای لە سەرکردایەتی یەکێتی کردووە، لەجەماوەر داببڕێت، چونکە زۆرینەی سەرکردایەتی پێیان وایە جەماوەری یەکێتی لە هەڵکشانە، هەمدیس بەداخەوە وانیە ئەم هەڤاڵە بەڕێزانە لە خەیاڵێکی خۆشدا دەژین، جەماوەر لەناخ و سەردەمی کۆچڕەو دایە، هەڤاڵانیش بەهاریان هێناوەتە چۆکان! بۆیە ئەو بەهارە بەردەوامیکردن بۆسەر ئەو بڕوایە، هەتا گەیاندیانە کۆنفڕانسی مەکتەبەکان بۆ  هەڵبژاردن و دیاریکردنی ئەندامانی مەکتەبەکان، ئەمەش دیار بوو چۆن بەڕێوە چوو، کێ خەمی خەباتی مەدەنی و گەشەکردنی یەکێتی و کێش خەمی دەرچونی ئەندامانی لیست بوو؛ چونکە هەمدیس تەکەتول و لیست، دڵی سەدان کادیر چزواند، وای بۆ کۆنفڕانسی مەڵبەندەکان! تێناگەم، بەم تەکەتول و لیستکارییە ئەم سەرکردایەتییە چیان لە کادران و یەکێتی دەوێت؟!

بەڕێز سەمەد زەنگنە، هەڤاڵانی مەکتەبی سیاسی کۆن، بێکێشە، هاتنە کۆنگرە، لەکۆنگرەشدا کاردانەوەی خراپمان لە هیچ هەڤاڵێک نەبینی، بەڵکو بەپێچەوانەوە کەشێکی تاڕادەیەک ئارام لە کۆنگرەدا هەبوو،  ئەمە سەرەڕای ئەوەی کە ئێستا زۆرینەیان ئەندامانی ئەنجومەنی باڵای سیاسی و بەرژەوەندی یەکێتین، ئەوەی لە زۆرینەیانم بیستوە، ئومێدی سەرکەوتن بۆ هاوسەرۆک و سەرکردایەتی نوێی یەکێتی دەخوازن، لەکوێدا هەتا ئێستا کێشە بۆ ئەم نوێ نوێبونەوەیە دروستکراوە؟

بمبورە هەڤاڵ سەمەد، وتارەکانت، وەک چیرۆک بە جیاوازی یەکێتی بونت لە وتارەکانی رێبوار کەریم وەلی، دەچێت، هەتا ئێستا چەند وتارت لەسەر سەرۆک و  ئەندامانی ئەنجومەنی باڵا  بەتایبەت لەسەر بەڕێز مەلابەختیار، نوسیوە، هەمیشە خۆت وادەردەخەیت، لەباری هاوڕێیدا دەنوسیت،هاوڕێی لەوتاردا جیاوازە لە زندەگی بینین، ئەگەر هاوڕێیە مرۆ  رێزی گەورەو وەفای بۆ هاوڕێ دەبێ هەبێت، نەک لەناو هێناندا بنوسیت ( مەلا ) ئەگەر هاوڕێشتەو رەخنەت لێی هەیە، هەر دەبێت بە بەڕێزەوە ناو بهێندرێت،یا ناوەکە هەر وەک خۆی،  ئەگەریش لە خانەی حزبیدا بێت بێگومان هەڤاڵ لەپێشگری ناودا دێت، ئەوسا خوێنەرانت، بە سەنگەوە، لە دیدوو بۆچونەکانت دەڕوانن. چ جای ئەوەی کاک کۆسرەت هەر کاک کۆسرەت و کاک مەلابەختیاریش هەر کاک مەلابەختیارە، نە قارەمانێتی و خۆڕاگری و خەباتگێڕی رابردوویان دەسڕێتەوە، نە  ئێستاو ئاییندەش، مێژوو هەروەک خۆی چۆنە دەنوسرێتەوە.

باقی دوا وتارەکەیشت کە نوسیوتە جۆرێکیتر ڤایرۆسی تەکەتول وا خەریکە سەرەتاکانی دەردەکەوێت، پێم وایە مەشخەڵی تەکەتول نەکوژاوەتەوە و بەردەوامە وەک یاری پێشبڕکێی ئۆڵۆمپیات، ئاگرەکە دەستاو دەست دەکات. منیش ئەوەی لەسەر ، کۆڕۆنا و لەسەر لێبڕینی موچە بۆ یەک مانگ، قەیران، هەڵوێست، چاکسازی..هتد،خستۆتە باسەوە، دەڵێم، جەماوەری یەکێتی وەڵامەکەیان لەسەرکردایەتی نوێی یەکێتی وەرگرتوە.