بەهەموو پێوەرەکان ئەم دۆخە تازەیەی بەسەر گۆڕان هاتووە شکست نیە، بەڵکو ڕوخان و پوکانەوەیە، ئەمە نە زمانی توانجە و نە سەرزەنیشتە بۆ کەس، بەقەد ئەوەی قسەکردنە لەواقیعێکی تاڵ، کە هۆکاری سەرەکی گوێنەگرتن و لاساری کۆمەڵێک دەستەو تاقم بوو، لەناوەوە و دەرەوەی گۆڕان، کە هەریەکەیان بەپێی ڕۆڵ و پێگەو کاریگەری خۆی، نەخشی هەیە لەم نائومێدیە گەورەیەدا.
ڕاستە ئەم دۆخە تازەیەی بەرۆکی گۆڕان گرتووە، دەرفەتێکی گەورەی ڕەخساندووە بۆ بەخۆدا چونەوە، بەڵام گرنگە وێستگەیەکیش بۆ دەستخستنەسەر برینەکان و دەستنیشانکردنی هۆکارەکان، لەپێناو دوبارەنەکردنەوەی هەڵەکانی ڕابردو.
دەبێت بەباشی لەوەتێبگەن، گۆڕان تەنها کورسی پەرلەمانیی لەدەست نەداوە، بەڵکو لەوە گرنگتر متمانەی جەماوەری لەدەستداوە، ئەو دەردەی تا گۆڕانی نەهێنایە سەر پلێت، زۆرێک لەوانەی گوێیان نەئەگرت و دابڕابون، بڕوایان پێنەهێنا، ڕەنگە بۆ ئەوان ئەم دۆخە تازەیە جۆرێک لە شۆکبونی دروستکردبێت، بەڵام لای خەڵکێکی زۆر، نەتیجەیەکی چاوەڕوانکراو و ئاساییە.
جێی داخە، ئەوەی تائێستا لەسێبەردا دەکەوێتە بەرچاومان و دەیبیستین، دوای ئەو کەوتنە بە ئازارەش، تاقمێک هێشتا خەیاڵاتی شۆ و عەرزی ناو سۆشیال میدیا بەرینەداون، لەبری سەرکردن بەیەکدا و بیرکردنەوە لەهۆکارەکانی ڕوخانی قەڵای گۆڕان و ئازادیخوازان و ئومێدی بێدەرتان و هەژاران، خەریکی خۆبە پاڵەوانکردن و نمایشی شەخسین.
دووبارەکردنەوەی هەڵەکانی ڕابردو و پڕکردنی سۆشیال میدیا لەبانگەشەی شەخسی، تاقیکردنەوەی شەڕێکە، کە گۆڕانی بە دۆخێک گەیاند کەس بەخیلی پێنەبات، بکەرەکانیشی لە لوتکەوە کرد بە ناخی زەویدا، پەند وەرگرتن لەو وانەیە باشە بۆ پیاوی ئاقڵ.
گۆڕان وەک و فیکرو نەخشە ڕێگا لەجێی خۆیەتی، ئەوەی کەوتوە، نەزانی و بێبەهرەیی تاقمێکە، تەکتول و جەمسەرەکانی بەرژوەندییە، دروستکردنی بازنەی بڕیاردانە لەدەروەی دامەزراوەکان، مەزاج و ڕقی شەخسیە.
قسەکردن لەسەر هەستانەوەی گۆڕان و گێڕانەوەی بۆ سەرسکەی خۆی لەوێوە دەستپێناکات، لەڕابردودا پشتیوانی بەهێزی تەوریسی سیاسی و ماڵیی گۆڕانتان کردبێ و، ئێستاش ئیدعای نەهێشتنی بکەنە مەرجی گەڕانەوە، ئەندازیاری هەموارکردنەوەی یاسای سەرۆکایەتی هەرێم و ڕێکەوتنی ژێر بەژێر بوبێتن لەگەڵ پارتی و دواتر پەلکێشکردنی گۆڕان بۆ ناو حکومەت، ئێستاش لەڕێی میدیاکانەوە کۆمەڵێک ناو ڕیزبکەن و هەموو ئۆباڵەکەی بخەنە ئەستۆی ئەوان، کە بێگومان ئەوانیش کەم تا زۆر پشکیان هەیە تێیدا.
ئەوانەی بەشێک بون لە ململانێ، بێجیاوازی، ئەگەر پەندیان لەڕابردو وەرگرتبێت، سیاسەتی ناشرینکردنی بەرامبەریان لەسەر حسابی جوانکردنی خۆیان تێپەڕاندبێ، ئەگەر عەقڵیەتی، گرنگ نیە گۆڕان چەند کورسە دێنێ گرنگە ئەوەیە خۆمان چین لەناویدا، یان ئینقیلابی سپیمان کردو گۆڕانمان پاککردەوە، تێپەڕاندبێ، ئەوا ئەکرێ هەمومان لەبەرخاتری گۆڕان بڵێین (عفی اللە عما سلف)، قسە لەئایندەیەکی جیاوازتری گۆڕان بکەین .
بێشک، هەنگاوەکانی داهاتو زۆر قورس و گرانن بۆ گۆڕان، بەڵام ئەستەم نین، ئەگەر ئیرادە هەبێت بۆ موناقەشەکردنی جدی لەسەر کۆمەڵێک پرسی گرنگ و حەیاتی تایبەت بە وجود و ماهیەتی گۆڕان، لەوانە، چارەنوسی گردی زەرگەتە، هاتنە دەرەوە لەحکومەت، بەڵام "نەکرێت بەکەرەستەی پاڵەوانبازی وەک ئەوەی ئێستا"، ڕێزگرتن لەدامەزراوە حزبیەکان و دروستنەکردنی بازنەی بڕیار لەدەرەوەیان، کۆتایهێنان بە تەکتول و نەهێشتنی سێبەری خێزانی سیاسی لەسەر گۆڕان، ئەوا بچن داوا لە کاک عوسمانی حاجی مەحمود بکەن ڕابەڕایەتی ئەم قۆناغە سەختە بکات، بە جارێک ڕازینەبو، دووجار بچن، ئەگەر خەمی گۆڕانتانە سەدجار بچن، کاک نەوشیروانی ڕەحمەتی چۆن قەناعەتی پێکرد، ئێوەش هەوڵبدەن، عەیبەی تیانیە، قۆناغی سەخت پیاوی گەورەو پەرێز پاک و ناوازەی گەرەکە، ئەوسا دەکرێت گەنجەکانیش هەریەکەو لای خۆیەوە شانبداتە بەرپرسیارێتیەک.
ئەم وتارە دەربڕی بۆچونی نووسەر خۆیەتی