ئەگەر ڕۆحییەتی قوربانیدانت نەبێت، خۆت مەکە بەپێشەنگ؛ هەرکارێکی مەدەنی و سیاسی بۆ گەشتن بە ئامانجێک بێگومان خەبات و ئیرادەیەکی دەوێت کە ڕەنگە لەبری دەستکەوت لە نزیک مەودادا لەبەرژەوەندی ڕێکخەران و باوەڕدارانی ئەوپرسە نەبێت! بۆیە سەرەتای هەر بزووتنەویەک گەرمی و حەماسەت باڵ دەکێشێت بەسەر ئەو بارودۆخەدا، بۆیە گرنگە ڕێکخستن لە کارە هەرە پێشینەکانی ڕێکخەرانی ئەو بزافانەدابن، چۆن دەبێت دەرک بکەیت ئەوەی دەگوزەرێ گەمەیەکی کاتی نییە و دەرهاوێشتەی سیاسی و کۆمەڵایەتی دەبێت، کاتێک مامۆستا یان هەر توێژێک دێتە مەیدان بۆ ماف و داخوازیەکانی، پێش هەر شتێک ئەوە بخاتە بیرکردنەوەی خۆی ئەو لەناو فەزایەکی سیاسی و حوکمڕانیدان کە لە ناو نادادی و نا یەکسانیدا بە شەرعیەتێکی پەرلەمانی حوکمی تۆ دەکەن بەواتایەکی تۆ ئەو مافەی تۆ بەداویدا دەگەڕێێت و جەخت لەگەڕانەوەی دەکەیت لای حکومەتێکە کە ئەو پێچەوانەی بیرکردنەوەی تۆ کار بۆ نا ڕەوایەتی بزافەکەت دەکات. ئینجا ئەو دەیان کەرەستەی هەڵوەشاندنەوی هەنگاوەکانی تۆی لایە لە ڕاگەیاندن و پڕوپاگەندەو پاساو هێنانەوە بۆ هۆکارەکانی بەنموونە نەدانی مووچە، بۆیە گرنگە تۆش کار بۆ وەستانەوە و ڕوبەڕوبونەوەی کەرەستەکانی گەوجاندنی خەڵک لەلایەن دەسەڵااتەوە ببیتەوە، ئەوەش تەنها لەکاتێکدا ناڕازییەکان دەتوانن
سەرکەوتوبن کەبزانن ئەو ئامانجە هاتونەتە مەیدان بۆی بەنموونە ( موچە و پلە بەرزکردنەوە و دامەزراندنی وانەبێژان) هۆکار نیە بەڵکو دەرەنجامی سیستەمێکی خراپ و نادیموکراسی و نادادپەروەرە، ئەم خەسڵەتانەی باسمکرد لە لەدایکبووی ئەوساتە نییە کە مووچەکەت بڕاوە، بەڵکو زوتر لە دەیان کایەیی سیاسی و خزمەتگوزاری بەهەموو سەکتەرەکانیەوە بونی هەبووە، بەڵام لەبەرئەوەی ڕاستەوخۆ قەیران و ئارێشەکان لەدڵی خۆتی نەداوە وات وێنا کردوە کە بۆردومانی ئێران و تورکیا و هەڕەشەی میلیشیایەکی حەشد و تیرۆری داعش خۆت نەگرێتەوە چکارەی پێی، بۆیە لە هەلومەرجێکی لەمجۆرەدا دەبێت کار بۆ ئایندەی بزافە سیاسی و پیشەییەکان بکەین بەجۆرێک خەمی گشتی و چاکەی گشتی ناوەندی خەبات و سەرشەقاممان بێت و ڕێکخەرانی هەربزافێکی لەوجۆرە دەبێت کاری پێکەوەی و حسابکردنی هەبێت بۆ هەر ئەگەرێک
بەنموونە لەئێستادا دەسەڵات لەبری ئەوەی بیر لەچارەسەری داواکانی مامۆستایان بکاتەوە دەرکی بەشتێک کردووە ئەویش ( ترس) کە وادیارە کلیلی کردنەوەی دەرگایەکی دەستکەوتووە بۆ تێکدانی یەکڕیزی مامۆستایان، بۆیە گرنگە مامۆستایان لەم ساتەوەختە گرنگ و هەستیارە بۆ پرسەکەیان ئەوەندەی مەشغولی لێدوانی لابەلان کۆنگرەیەکی فراوانی مامۆستاین ڕیکبخەن و ڕاوێژ لەگەڵ چەندین کەسایەتی یاسایی بە ئەزمون و بەئەخڵاق و کەسایەتی سیاسی دڵسۆز و تەنانەت چەند کونسڵ و یۆنامی بکەن، بۆ بڕیاردان لە چارەنوسی ئەم بزافە مەدەنیە پڕ بەهایەیی مامۆستایان و دەبێت هەر کەس بەرپرسیارێتی هەڵبگرێ لە دەرەنجامەکانی، چونکە دەسەڵات ویستی ئەوەی هەیە لە کۆتایهێنا بە بایکۆت پەیامێک بدات بەخەڵک ئیتر چاوەڕوانی گۆڕانکاری مەبن هیچ هێزو لایەن و گروپێک ناتوانێ هێندەی هێزی مامۆستایان بێتە شەقام و بەو فراوانیە بڵێ بەڵێ بۆ ماف. نا بۆ نادادت ئیدی ئەم ئەزموونەش. چەندین قۆناغ دوامان دەخات لەگۆڕانکاری ڕیشەی و دۆزینەوەی هۆکاری ستەمکاری و گەندەڵی و حوکمی کلیپتۆکراسی خزمخوا.
ئەم وتارە دەربڕی بۆچونی نووسەر خۆیەتی