هاوسەنگی لە هەمو بوارێکدا سەنگی مەحەکە بۆ مانەوە و گەشەکردن، هەر کاتێ تەرازوی هێز تێکچو، ئەوا کێشەی هەمەجۆر سەرهەڵئەدا و ئەو هێزەی سەرکەوتو نەبوە، یان دۆڕاوە یان پاشەکشەی کردوە، هەست بە زوڵملێکردن دەکاو هەمو کاتێک و بە زۆر شێوە هەوڵئەدا تەرازوی هێز راست بکاتەوە و خۆی بەهێزتر بکات یان وەک بەرامبەری لێبێت.
تێکچونی تەرازوی هێز بە هەڵوێستێک، یان بە هەڵبژاردنێک، یان بە شەڕێک دروست نابێتەوە، بەڵکو کاتی درێژی پێویستە و بە کۆمەڵێک پلانی درێژخایەن دروست دەبێت.
کاتێ نا هاوسەنگی دروست دەبێت، پاش ماویەک وەک کارێکی ئاسایی لێدێت و هێزە بچکۆلەکە، بارودۆخەکەی خۆی بە ئاسایی وەردەگرێت و ئەگاتە قەناعەتێک کە ئەو بارودۆخە بەو ناگۆرێت و کەمتر بیر لە گۆرینی دەکاتەوە.
هێزی دەسەڵاتداریش، بەو بارودۆخەی خۆی رازی نابێت و رۆژ بە رۆژ هەوڵئەدا جیاوازی هێز و ناهاوسەنگیەکە گەورەتر و فراونتر بکات بۆ ئەوەی هێزی بەرامبەری هیچ کاتێ بیر لە هاوسەنگی نەکاتەوە.
ساڵانێکی زۆرە کە نا هاوسەنگیەکی دیار و ئاشکرا و گەورە لە نێوان یەکێتی و پارتیدا دروست بوە، هەرچەندە لەو کاتانەشدا هەبو کە مام جەلال لە ژیاندا مابون، بەڵام نەک بەم شێوەییەی ئێستا، بە کۆچی دوایی مام جەلال و نەوشیروان مستەفا، واتا بە نەمانی سەرکردەیەکی کاریزمای دەسەڵاتدار جیاوازیەکان فراونتر و گەورەتر بو، پارتی نەمانی ئەوانی قۆستەوە و ئەو نا هاوسەنیگییەی کە لە کاتی ژیانی ئەواند هەبو، فراونتری کرد و کەس نەبو رێگری لە هەژمونی فرە رەنگی پارتی بگرێت، بەڵکو هەردولا کەوتنە داوی پلە و پۆست لە (حکومەتی پارتیدا).
ناهاوسەنگی لە کوردستان لە کوێدایە؟:
هەمو دەزگاکانی حکومەتی هەرێم لە هەولێرن، هەمو ناوچەکانی کوردستان بێبەشن لە ئیدارەی ناوەندی، هێزە کوردیەکان لە مێژە داوای سیستەمی لامەرکەزی دەکەن بۆ عێراق، بەڵام کوردستان بە سیستەمێکی مەرکەزی دەبرێت بەرێوە.
ناوەندی کاری دیپلۆماسی، دەزگا نێو دەوڵەتیەکان واتا زوربەی هەرە زۆری کۆنسولخانە و نوێنەرایەتی وڵاتان و پەیوەندیە نێودەوڵەتیەکان لە هەولێرن.
-ئوتێلی پێنج ئەستێرە و هوڵی گەورە و شوێنی گەشتیار و حەوانەوە، زیاتر لەوێ هەن وەک لە سلێمانی یان ناوچەکانی تر.
ئەو گەشەکردنە میعمارییەی لە شەقام و گۆرەپان و پرد و زۆر سیمای بیناسازی تری هاوچەرخن لە هەولێر دەبینرێت، شوێنەکانی تر، وەک سلێمانی هەڵەبجە، ئیدارەی گەرمیان و راپەرین هەتا دهۆک و زاخۆ خەوی پێوە دەبینن، ئەوە چەند ساڵێکە باسی تەوابونی شەقامی ١٠٠ مەتری ناو سلێمانی، رێگای دەربەندیخان و کەلار و رێگای دوکان و رانیە و پرۆژەی ئاوی چەمچەماڵ و گۆپتەپە، رێگاکانی ناو شارەکانی سلێمانی و قەزاو و ناحیە کان، کەچی جێگری سەرۆکی حکومەت لە دەربەندی بازیان لە ٢٦/٤/٢٠٢٥ دا دەڵی( سلێمانی بۆتە پێشەنگ لە ئاوەدانکردنەوە لە سەرتاپای عێراق).
هاوسەنگی کاتێ دروست دەبێت، کە هێزی یەکێتی و پارتی لە هەڵبژاردندا بەرامبەر بە یەک بن، یان نزیک بن لەیەکەوە، ناکرێت تۆ نزیک نیوە دەنگی پارتی بهێنێت ٣٨٪ و داوای هاوسەنگی بکەیت، بێگومان پەرلەمانی کوردستان لەم قۆناغەدا بێ یەکێتی دروست نابێت، بەڵام ئەمە مانای ئەوە نیە کە یەکێتی هێزی دوهەمە، لە زۆر وڵات هێزێکی بچوک کە دوسێ کورسی پەرلەمانی هەیە، ئەو بڕیار دەدا حکومەت چۆن دروست دەبێت و کێ برێوەی دەبات.
سیستەمی ئیداری حکومەتی هەرێم کە بە مەرکەزی دروست بوە، لە سودی پارتیە، بەوەی هەمو دەزگا سەرەکیەکانی حکومەت لە هەولێرن و ئەویش لەژێر هەژمونی پارتیدایە، وڵاتێکی فیدرالی وەک ئەڵمانی، هەمو دەزگا گرنگەکانی حکومەت لە بەرلینی پایتەخت نین، ٧ وەزارەت لە شاری (بۆن)نن کە جاران پایتەختی ئەڵمانیا بو، لەوانە وەزارەتەکانی ( بەرگری، تەندروستی، پەروەردە و خوێندنی باڵا، ژینگە، ئابوری ، کشتوکاڵ..) بارەگای دوهەمی سەرۆک کۆمار و سەرۆکی ئەنجومەنی وەزیران لە شاری بۆنن، هەروەها ٧١ دەزگای گرنگی حکومی کە هەندێکیان سەر بە وەزارەتەکانن و هەندێکیان سەربەخۆن،دابەشبون بەسەرجەم شار و شارۆچکەکانی ئەڵمانیاوە، بۆ ئەوەی قورسایی سیاسی و ئیداری لە شارێک یان ناوچەیەک قۆرخ نەکرێت و ناوچەکانی تریش فەرامۆش بکرێن..
چی دەبو ئەگەر وەزارەتی رۆشنبیری و ئاوەدانکردنەوە لە سلێمانی و شەهیدان لە هەڵەبجە و کشتوکاڵ لە ئیدارەی راپەرین و پێشمەرگە لە دهۆک و بەو شێوەیە بێت..
بێگومان نیمچە داخستنی فرۆکەخانەی سلێمانی، کاریگەری خراپی کردۆتە سەر سلێمانی وای کردوە کە زۆر لە کۆنگرە و کۆبونەوەی گەورە تەنها لە هەولێر ئەنجام بدرێت، چونکە ئەوێ هێڵی ئاسمانی راستەوخۆ بە چەندەها وڵاتی ترەوە دەبەستێتەوە..تۆ تەنها تورکیا بەرپرسبێت لەو کارە؟؟
بێگومان ئەوە باسی پەیوەندی دەرەوە ناکەین، بینیمان سەرۆکی هەرێم یان سەرۆکی ئەنجومەنی وەزیران، بە تەواوی دەستیان گرتوە بەسەر پەیوەندی دەرەوە لە بواری دبلۆماسی و سیاسیدا، خەریکە کلیلی پەیوەندی دەرەوەی کوردستان بە تەواوەتی دەکەوێتە دەستی پارتی و ماڵی بارزانی، هەر ئەمساڵ دو کۆنگرەی نێودەوڵەتی گیرا، یەکێکیان کۆربەندی ئابوری بو لە داڤوسی سویسرا لە ٢٠/١/٢٠٢٥ کە سەرۆکی حکومەتی هەرێم لەێ بو، ئەوەی تر لە ١٤/٢/٢٠٢٥ کۆنگرەی ئاسایشی میونخ کە سەرۆکی هەرێم لەێ بو، بینیمان ئەوان کێیان بینی و لەگەڵ کێدا کۆبونەوە و سەرۆکی یەکێتیش لەگەڵ کێدا!!
یەکێتی لە بواری پەیوەندی دەرەوەدا نە دەنگی هەیە نە رەنگ، رەنگە ئەو جۆرە پەیوەندیانە بە گرنگ نەزانێت، مادەم پەیوەندییان لەگەڵ ریان کلدانی زۆر باشە، ئیتر پەیوەندی تریان بۆ چیە؟
نوێنەرایەتی حکومەتی هەرێم لە دەرەوە، یان زوربەی زۆری لای پارتیە، یان گرنگترین و کاریگەرترین وڵات لای ئەوانە، خۆ باسی رێکخستنی حیزبی و چالاکی یەکێتی ناکەین لە دەرەوە کە لەبیرچۆتەوە..
ماوەیەکی زۆرە پارتی کار لەسەر ئەوە دەکات کە سەرۆکەکەی کردوە بە (مەرجەع)ی کوردی عێراق و لەو کارەشدا سەرکەوتو بوە..
واتا مەرجەعی کوردی عێراق، سەرۆکی هەرێم، سەرۆکی حکومەتی هەرێم، راوێژکاری ئەنجومەنی ئاسایشی هەرێم و وەزارەتی ناوخۆ و سەرۆکی زوربەی دەزگا گرنگەکانی حکومەتی هەرێم هەمو پارتین، یەکێتیەکان لە ناو حکومەت تەنها دەسەڵاتیان بەسەر نوسینگەی وەزیرەکەیاندا هەیە، ئەوانەی تر راستەوخۆ و ناراستەوخۆ سەربەپارتی و دەزگاکانی ئەوانن.
ئێ باشە، هاوسەنگی چۆن دروست دەبێت، ئەو نا یەکسانییە بە قسەی زبر و مایك شکاندن و بەڵێنی گەورە و قەبە دروست نابێت.
گەرانەوەی هاوسەنگی کاری جدی و خێرا و وردی دەوێت، تا ئەو کاتەی خۆت بە هێزێکی گەورە بزانیت و ئەمەش حاڵت بێت، ئەوە بەدڵنییایەوە، بێهێزتر و لاوازتر و کەم کاریگەرتر دەبێت.
ئەبێ یەکێتی بگاتە ئەو برواییەی کە بناغەی هاوسەنگی، تەنها لە بە‌هێزی خۆیەوە دەستپێدەکات، کە ئەویش کاتێ روئەدات کە بتوانێت جەماوەر ئاشتبکاتەوە، ئەویش تەنها لەو رێگایەوە دەبێت کە یەکێتی دەستنەخاتە ناو کاروباری فەرمانگا حکومیەکان، دادگا بە تەواوی سەروەر بێت و واز لە قۆرخکردنی بازار بهێنێت و قاچاخچێتی سەر دەروازە سنورەکان رابگرێت و ئازادی رۆژنامەگەری و ڕادەربرین مسۆگەر بکات، سنورێک بۆ چاویلکە رەشەکان و پاسەوانە بێناونیشان و دەسەڵاتدارەکان دابنێت، ئەگەر وا بکات ئەو بێگومان جیاوازی لە نێوان هەولێر و سلێمانی کەمتر دەبێتەوە و خەڵکی ئەم دەڤەرە خۆیان بەرگری لە یەکێتی دەکەن و بە (عەشقەوە) دەچن بۆ هەڵبژاردن و ئاوو هاوای حەفتاو و هەشتاکانی سەردەمی شاخ دەگەرێتەوە بۆ ئەم ناوچەیە، تا ئەو هانگاوانە نەنرێت ئەوا ئەبێت خەو بە هاوسەنگیەوە ببینرێت.
ئەم وتارە دەربڕی بۆچونی نووسەر خۆیەتی