موئمین زەڵمی

لە چەند دەیەی ڕابردوودا، هەرێمی کوردستان گۆڕانکاری جیاوازی بەخۆیەوە بینیوە لە زۆربەی بوارەکاندا، بەڵام دڕن و کەلێنێکی گەورە هێشتا لە بواری ڕاگەیاندنی پیشەیی و سەنگیندا بەدی دەکرێت. چونکە ئەمڕۆ، سەرەڕای بوونی دەیان کەناڵی میدیایی، زۆربەی هەرە زۆریان لە ژێر کاریگەری حیزب، ڕەوت یان کەسایەتییە سیاسییەکاندان، کە ئەمەش کاریگەرییەکی نەرێنی لەسەر متمانەی جەماوەر و ڕۆڵی ڕاستەقینەی میدیا دروست کردووە.

میدیای جیدی و پیشەیی یەکێکە لە گرنگترین سەرچاوەکانی باوەڕپێکردن لە هەر کۆمەڵگەیەکدا. کاتێک میدیا سەنگین و جیدی بێت، هەواڵ و ڕاپۆرت و شیکردنەوەکانی بە شێوەیەکی بابەتی و دوور لە هەڵچوون پێشکەش دەکات، کە لە ئەنجامدا خەڵک دەتوانن متمانەی پێ بکەن و وەک سەرچاوەیەکی باوەڕپێکراو سەیری بکەن.

میدیای جیدی ڕۆڵێکی بنەڕەتیشی هەیە لە هۆشیارکردنەوەی کۆمەڵگە سەبارەت بە مافەکانیان، ئەویش لە ڕێگەی ڕەخنەگرتن لە دەسەڵات و دەرخستنی کەموکوڕییەکان، بۆ ئەوەی ڕێگە بۆ گۆڕانکاری و چاکسازی خۆش بکات. بەڵام کاتێک میدیا دەکەوێتە ژێر کاریگەری ئاڕاستە سیاسییەکانەوە، ناتوانێت ڕاستییەکان وەک خۆی پیشان بدات و دەبێتە ئامڕازێک بۆ پەیڕەوکردنی بەرژەوەندی تایبەت.

لە هەرێمی کوردستان، زۆرێک لە پرسە نەتەوەییەکان، کۆمەڵایەتی و سیاسییەکان پێویستیان بە چارەسەری دروست هەیە، بۆیە پێویستە میدیای سەنگین و جیدی لە دەرەوەی ملمڵانێی سیاسی و حیزبی بیر لە بەهاکان و نەتەوە و بەرژەوەندییە باڵاکانی کۆمەڵگە بکاتەوە. هەروەک میدیای جیددی و پیشەیی دەتوانێت وەک سەکۆیەک بۆ گفتوگۆی پێشکەوتووانە، کۆمەڵگە ڕابهێنێت لەسەر گوێگرتن لە بیروڕای جیاواز و قبوڵکردنی پێکەوەژیان، کە ئەمەش بەرەو دەوڵەمەندکردنی ژیانی سیاسی و کۆمەڵایەتی هەنگاو دەنێت.

میدیای جیدی و پیشەیی، بێگومان یەکێکە لە کۆڵەکە گرنگەکانی دیموکراسی، چونکە دەبێتە چاودێری دەسەڵات و لە کاتی پێویستدا بە ڕەخنە و هەڵوێستی دروست، دەتوانێت کاریگەری ئەرێنی لەسەر بڕیاردان و ئاراستەکردنی کۆمەڵگە هەبێت. هاوکات، میدیای جیدی و سەنگین دەتوانێت وەک چەترێک کار بکات بۆ کۆکردنەوەی ڕۆشنبیران، ڕۆژنامەنووسان، لێکۆڵەرەوان و پسپۆڕانی بوارە جیاوازەکان لە دەوری یەکتر، بۆ دەوڵەمەندکردنی گوتاری کوردی و دروستکردنی بنچینەیەکی فیکری و هزری پتەو لە هەرێمی کوردستان.

هەرێمی کوردستان، وەک ناوچەیەکی هەستیار لە ڕۆژهەڵاتی ناوەڕاست، پێویستی بە میدیای سەنگین و جیدی هەیە، کە بتوانێت پرسە ناوخۆیی و نێودەوڵەتییەکان بە قووڵی و دوور لە هەڵچوون شیکار بکات، بەرژەوەندییە باڵاکانی نەتەوە و گەل لەبەرچاو بگرێت و ببێتە هۆکارێک بۆ پێشخستنی کۆمەڵگە. بەم شێوەیە، بۆشاییە گەورەکەی بواری میدیا لە کوردستان پڕ دەکرێتەوە و مێژووی ڕۆژنامەگەریی کوردی سپی دەکاتەوە.

ئەم وتارە دەربڕی بۆچونی نووسەر خۆیەتی