قادر حسێن صالح

 (خواستی گەورە نەبوون و مانەوە لە دۆخی منداڵیدا)      
گرێی پیتەربان یاخود وەک هەندێک کاتی تر بە سیندرۆمی پیتەربان ناو دەبرێت، بریتییە لەو دۆخ و ئارەزووەی لای هەندێک کەس لە قۆناغەکانی گەنجی و پێگەیشتن و قۆناغه‌كانی دواتردا دەردەکەوێت، کەسەکە سەرەڕای بەجێهێشتنی قۆناغی منداڵی ئارەزووی زۆری بۆ مانەوە لەو قۆناغەدا دەبێت و نایەوێت دۆخی منداڵی تێپەڕێنێت، ئەو کەسانەی ئەم گرێیەیان هەیە لە ڕووی جەستەییەوە گەورە دەبن بەڵام منداڵەکەی ناخیان لە ڕووی هەڵسوکەوت و گەشەی عەقڵ و بیرکردنەوە و رەفتارەوە وەک خۆی دەمێنێتەوە، ئەمانە بە جەستە مرۆڤێکی پێگەیشتو و تەواون، بەڵام بە هەڵسوکەوت و ئەتوار منداڵن بە پلەی ئیمتیاز، لە دنیای واقیع دوردەکەونەوە و لە دنیای خەون و خەیاڵدا دەژین، هەڵەشەن و بڕیاری سەرپێی و خێرا دەدەن، ئالۆزن و خۆشیان نازانن چیان لە دەوروبەر دەوێت، ناتوانن بە ڕوونی گوزارشت لە خۆیان و خواست و داواکانیان بکەن، خۆپەرست و لەخۆبایین، گەورەترین سیفەتی ئەو کەسانەی ئەم گرێیەیان هەیە، ڕاکردنیانە لە بەرپرسیارێتی و شاندانەبەر ئەرک و فەرمانەکانی گەورەبوون، ئەوان سەرەڕای گەورەبونیان ناتوانن پشت بەخۆیان ببەستن و زۆرکات لە سایە و سێبەری ئەوانیتردا دەژین، گەر چی پێدەچێت خۆیان باوک بن بەڵام ناتوانن بێباوک بژین، گەورەن بەڵام خۆیان لە دنیای گەورەکان کە پڕە لە ئەرک و پابەندبون و به‌رپرسیارێتی و بەرگەگرتنی ناخۆشی و ناڕەحەتی دەدزنەوە.
بەکورتییەکەی، ئەوان سی و چوار ساڵە حکومەتن(گەر سەردەمی شۆڕش و شاخیشیان بۆ ئەژمار نەکەیت)، کەچی بەوە بەلەسە و قوشقی دەبن داوای موچە و کارەبا و ئاو و چارسەری کێشەیان لێ بکەیت، عومرێکە لە سیاسەتدان کەچی سوکناییان بەوە دێت کە بەخۆیان بڵێن خاوەن ئەزمونی ساواین و زۆر لە حکومەتە ساواکەتان چاوەڕێ مەکەن، تەمەنی سێ نەوە و جیلیان فەوتان کەچی تازە دەڵێن ئەزمونی حکومەتداری کوردی لە دوای شەڕی داعشەوە دەست پێ دەکات و بە حیسابی ئەوان هێشتا قۆناغی پێگرتن و گڕوگاڵی بەجێنەهێشتووە، ئاخر ئەو گرێیە هێندە لای دەسەڵاتدارانی کورد گەورەیە هەر کە چاوێکیان لەملا و لەو لاوە لێ سوردەکرێتەوە لەجیاتی پشت بەخۆبەستن یەکسەر پەنا بۆ ئەمریکا و ئەم وڵات و ئەو وڵات دەبەن تا وەک باوک ویصایەت و ویلایەتیان بکەن و لە دەستی دوژمن بیانپارێزن، باسی هەموو شتێکیان لا بکە بەرپرسیارێتی نەبێت، ئه‌وان به‌ خه‌یاڵ وه‌ك پیته‌ربان به‌ ئاسماندا ده‌فڕن و ده‌گه‌نه‌ دورترین دورگه‌ی خه‌ونه‌كان، كه‌چی به‌ كرده‌وه‌ و له‌ واقیعدا له‌ جێگه‌ی خۆیان نه‌جوڵاون، ئه‌وان ئه‌گه‌رچی بانگه‌شه‌ی باوكایه‌تی ده‌كه‌ن و خۆیان وه‌ك باوك وسه‌ركرده‌ ده‌ناسێنن، كه‌چی هێشتا له‌و قۆناغه‌ی منداڵیدا ماونه‌ته‌وه‌ كه‌ هه‌ر وه‌رگرتن و ماشینه‌وه‌ و چڵێسی  ده‌زانن و له‌ مانای به‌خشین تێناگه‌ن، تا ئێستا لای ئه‌وان جگه‌ له‌ ماف وه‌رگرتن، ئه‌رك و پابه‌ندبوون و به‌رپرسیارێتیان به‌رانبه‌ر كه‌سانیتر  له‌ فه‌رهه‌نگدا نییه‌، ئه‌وان ئێستا و له‌ بیسته‌كانی سه‌ده‌ی بیست و یه‌كدا ڕدێنی سپییان لێ به‌رداوه‌ته‌وه‌، كه‌چی به‌ بیركردنه‌وه‌ و تێزی شه‌سته‌كانی سه‌ده‌ی بیست كار ده‌كه‌ن و سه‌رده‌می منداڵی و هه‌رزه‌كاری شۆڕشیان تێنه‌په‌ڕاندووه‌، كاتێك داوای مووچه‌ و ڕۆژانه‌یان لێده‌كه‌یت ڕووبه‌ڕووی به‌غدای باوكت ده‌كه‌نه‌وه‌، كه‌چی له‌ وه‌رگرتنی باج و داهات و پاره‌ی نه‌وتدا كه‌س به‌ میلله‌ته‌كه‌ی خۆشیانه‌وه‌ به‌ هاوبه‌ش نازانن.
............................
تێبینی:
•سێندرۆمی پیتەربان، بۆ یەکەم جار لەلایەن(دان کیلی)ەوە بەکار هاتووە.
•ئەم دەستەواژەیە زیاتر لە دوای بڵاوبونەوەی ڕۆمانی (پیتەربان)ی نوسەری سکۆتلەندی(جەیمس باری)یەوە تەشەنەی کرد و دواتریش کرایە فیلم و فیلم کارتۆن.

ئەم وتارە دەربڕی بۆچونی نووسەر خۆیەتی