بەهرۆز ڕەئوف

دەسەڵات لەهەرێمی کوردستان،هەموو ڕێکارێک دەگرێتەبەر بۆئەوەی بتوانێت زیاتر کۆنترۆڵی تاک بەتاکی کۆمەڵگە بکات،لەپێناو ئامانج و ئەجێندا دەسەڵاتییە بنەماڵەییەکەیدا،بەتایبەت لەئێستاداکە زیاتر لەسێ دەیەیە،ئەزموونی حوکمڕانی خۆیان بەسەر خەڵکی کوردستاندا تاقیکردۆتەوە و ڕۆژبەڕۆژیش خەڵک لێیان دوور دەکەوێتەوە،بەڵام ئەوان لەم سەدەی پێشکەوتندا جارێکی تر،بۆئەوەی بتوانن کۆنترۆڵی کۆمەڵگە لەدەست نەدەن،بەردەوام لەڕێی سەرۆک خێڵ و پیاوانی دیاری نێو کۆمەڵگە،هانا بۆ فیستیڤاڵی خێڵ و ڕۆژی گوند دەبەن هەتا بتوانن لەڕێی یەک کەسەوە،ئاراستەی تاکەکان بەناوی عەشیرەت و ناوی جیاجیاوە،بەرەو لای خۆیان ئاراستەب بکەن.

ئەوەی مایەی هەڵوێستە لەسەرکردنە،لەم چەند ڕۆژەی ڕابردوودا،لەسلێمانی بەئامادەبوونی بەشێک لەبەرپرسانی یەکەمی ئیداری شارەکەش،لە وێنەیەکی جیاواز بەڵام خزمەت بەهەمان ئامانج کەوتونەتە خۆ و لەژێر ناوی خانەوادە دێرینەکانی شارەوە خۆیان لە یەک ملیۆن خەڵکی تری شار جیاکردۆتەوە و ئاهەنگ و کۆبوونەوە و خوان ڕێکدەخەن و چەند دەزگایەکی ڕاگەیاندنیش کەمتەرخەمیان نەکردووە لەگواستنەوەی ئاهەنگە تایبەت و جیاکارییەکانیان!

لەهەموو دونیادا کلتور و ڕەنگ و نەتەوە جیاوازەکان تێکەڵ بەیەکتری دەکرێن و فیستیڤاڵیان بۆ ڕێکدەخرێت هەتا خزمەت بەمرۆڤایەتیی بکەن لەڕێی ئاڵوگۆڕی وێنە جیاوازەکانی تایبەت بەو نەتەوانە،بەڵام تازە بەتازە و لەم سەردەمی دونیا بچوکبۆوە دێن و لەشارێکی وەک سلێمانی،سلێمانی دەکەن بەموڵکی چەند خانەوادەیەک و ئەویتریش دەبێت سەیریان بکات،هەتا بزانن بۆچی ئەمان بەخاوەنکردنی شار نیشاندەدرێن !

ئەم  جیاوازی و درز دروستکردنە لەنێوان پێودانگی ڕەسەن و،ناڕەسەندا بەدانیشتوانی شارێک هۆکارێک دەبێت بۆ دروستکردنی ڕق و جیاوازی لەنێوان دوبەرەی دێرن و نوێی شارەکەو جۆرێک وێنەی جیاواز بەپێکهاتەی تازەی شار دەبەخشێت،بۆیە هەرچی زووە دەبێت ئەم جۆرە لەئاهەنگ و فیستیڤاڵ کۆتاییان پێ بێت و ئەمیش ڕێگەیەک نەبێت بۆ درز خستن و ناکۆکی  نێو دانیشتووی شارێک و  چینێک خۆی پێ خاوەن ماڵ و ئەویتر بەمیوان.

ئەم وتارە دەربڕی بۆچونی نووسەر خۆیەتی