رەحمان غەریب

بە جوانی بیرم نایەت، بەڵام باوكم بۆم دەگێڕێتەوە: كۆتایی حەفتاكان، كاتێك كە لە قەزای شەترە سەر بە پارێزگای ناسرییەوە گەڕاینەوە، نەیانهێشت بارهەڵگرە گەورەكە لە كەركوك بوەستێ و بگەڕێینەوە شارەكەمان.
بارهەڵگر جوڵا  تا لە باخچەی چەمچەماڵ وەستا، یەڵا داببەزن، چەند خێزانێك بووین بە پێداویستی كەمەوە، چەند رۆژێكمان لەو باخچەیە بەرێ كرد.
بەهۆی بیڕوڕای سیاسی سەرۆكی خێزانەكان كە وەك سزای سیاسی راگوێزرابوون، ترس هەبوو لەوەی كە خەڵكی چەمچەماڵ بەهۆی هاوكاریكردنی ئێمە سزا بدرێن، بەڵام هەر هاوكاریان دەكردین، ئێستاش دیمەنی باوەشە نانی دایك و باوكم بیرناچێ كە لە نانەواخانەی تەنیشت باخەكەوە بۆیان دەهێناین.
كە بەردەوامیی هاودەنگی و پشتیوانی كۆمەڵایەتی ئەم رۆژانە و بە دەنگەوە هاتنی چین و توێژەكانی فراوانی كۆمەڵگەی كوردستان لەم كارەساتەدا دەبینم، ئەو رۆژانەم بیر دەكەوێتەوە و دڵخۆشم بە كەمپینەكان.
كۆكردنەوەی پێداویستی هاوڵاتیانی لێقەوماو لە كاتی كارەساتەكاندا پابەندبوونی ئەخلاقی و زیندووی ئەم كۆمەڵگایەمان پیشان دەدات، كە لە كاتی پێویستی و هەرەشەی هاوبەش لە دەوری یەكتر كۆدەبنەوە، هاوپشتییەك كە جارێ سیاسەت پەی بە رووحی یەكگرتوویان نەبردووە و دابەش و وردوخاشی نەكردوون بەسەر (2) دوو دا.
كەسایەتی خێرخواز و خانەداری كەریمی عەلەكە لە یاد ناچێ و نەوە دوای نەوە بۆ یەكتری دەگێڕینەوە، ئێستا دەیان خانەوادەی عەلەكە هەن، وەك لە كەمپینە گەورەكەی (بەرنامەی لەگەڵ رەنج)ی كەناڵی رووداو دەركەوت.
ئەم كێبڕكێیەی هاوڵاتیانی شارەكانی هەرێمی كوردستان، دەوڵەمەند و فەقیر، رێكخراوەكان، میدیای بەرپرسیار، ساتەوەختی مێژووی بوو بۆ پرسی  پشتیوانی و بەهاناوەچوونی لیقەومانان لە سەردەمی خۆپەرستی، وێڵبوون بەدوای پارە و قازانج و بەسیاسیكردنی سنوری ناوچەكان.
ئەمەی دەیبینین چیرۆكی سەركەوتنی كۆمەڵگەی كوردستانییە، بەسەر فەرهەنگی شەڕە گەڕەك و شارچێتی و زۆنی سیاسییەكان، ئەمە تەحەدایەكی  ئەخلاقی گەورە بوو، تاقیكردنەوەیەك بوو بۆ هەمووان، بە ئایدیا و میدیا و ناوچە و نەتەوە و ئاینی جیاوازی كوردستان.
بۆ ئەوەی ئەم بەهایانە ڕیشەی قووڵتر كاتەوە لە ویژدانی تاك و كۆمەڵگەی كوردستانی، پێویستمان بە هەڵسەنگانی گوتاری میدیای سیاسی هەیە ئەوەی ئاراستەكرا و قورمیشكراوە بۆ سلێمانی، یان قورمیشكراو و ئاراستەكراوە بۆ هەولێر كە بوون بە سەكۆی رقی سیاسی و شەرمیان تیا نەهێشتەوە.
میدیایان بۆ شەڕی سیاسی دامەزراندووە، بۆ شەڕی شكاندنی ركابەرەكان، بۆ شەڕی تۆخكردنی زۆنچێتی و كۆنەقین، شەڕی شێواندنی راستی و تێكشاندنی رۆحی پێكەوەیی، هاوكات كەشێكی گوتارییان رەخساند كە پرۆسەی سیاسی زەرەرمەند بێت و ركابەری و دوژمنایەتیت بۆ جیانەكرێتەوە، سیاسەتی میدیایش بۆ هونەری ریسواكردن كورتدەكرایەوە.
خێرا و توندكردنی دیمەنەكانی هەولێر، نەرم و خاوكردنی دیمەنەكانی سلێمانی، یان خێرا و توندكردنی دیمەنەكانی سلێمانی، نەرم و خاوكردنی دیمەنەكانی هەولێر، هاوڵاتیان دابەش دەكات و برەو بە دوو بەرەكی و ناوچەگەری دەدات.
ئەوەی دەیەوێت بەردەوام بێت، كەوتنێك دەكەوێت تەپوتۆزی داڕمانەكەی لە جەوڵ حەمرینەوە دەبێنرێت.
كۆتایی: میدیا مەدەنە دەستی كۆنەقین، چەكیش رادەستی مناڵ مەكەن

ئەم وتارە دەربڕی بۆچونی نووسەر خۆیەتی