دوای دواکەوتنی پێکهێنانی کابینەی(دە)ی حکومەتی هەرێمی کوردستان، پتر لەساڵێکە، هەردوو "مەکتەبی سیاسی پارتی و یەکێتی"
لە ١٦ی ئەو مانگە لە"پیرمام" کۆبوونەوەیەکیان ئەنجام دا، بێ ئەوەی پرێس کۆنفرانسێک
یاخود ڕاگەیەنراوێک لە نێوانیان ئەنجام بدرێت، لەوەش خراپتر لەڕاگەیاندنی هەردوو لادا،
بە دوو جۆر باس لە ناوەڕۆکی کۆبوونەوەکە دەکرێت "خراپ وئەرێنی نەبوو" و واش
مەزەندە دەکرێت، نەگەیشتبنە ئەنجامێکی ئەوتۆ و وەک ڕاگەیاندنی یەکێتی دەڵێت"بۆ
کاتێکی نادیار کۆبوونەوەکان هەڵپەسێردراون" .
هەرچەندە ئەو خۆگیڤکردنەوانەی هەر دوو لا، چەندە
گرژی لێ پەیدا بێت، بە گەفێکی ئەمریکی خاو دەبێتەوە، هەر واش مەزەندە دەکرێت، لەداهاتوویەکی
نزیکیدا بەیەکەوە دانیشنەوە، ئەو گرژییەی ئێستا لەنێوانیان دروستیان کردووە لە ڕیگەگرتنی یەکتر لە بازگەکان، کۆتایی پێ بهێنرێت .
هەواڵەکان وا ڕادەگەینن کە ئەمریکە داوای لێکردینە
"تا سەری ساڵ کۆتای بەو دەودەوانەی پێکهێنانی
کابینەی حکومەتی هەرێم، بهێنن"، چونکە لەچواردەی ئەو مانگەوە دادگەی فیدراڵی پشتڕاستی(تصدیق)ی
ئەنجامەکانی هەڵبژاردنی عێراقی کرد، دوای پازدە ڕۆژ لەو بڕیارە، پشت بە ماددەی ٥٤ لەدەستووری
عێراقی ٢٠٠٥سەرۆک کۆماری ئێستا، داوا لە بەرلەمانی تازە هەڵبژێردراو، دەکات لەماوەی
١٥ رۆژدا،کۆببنەوە. پشت بە ماددەی ٥٥یش دەبێ هەڵبژاردنی سەرۆک و هەردوو جێگرەکەی لەو
کۆبوونەوەیە ئەنجام بدرێت، واش دەردەکەوێت سوننەو شیعەکانی عارەبی لەسەری ئەو دەستەیە،
ڕێککەوتبن، هەر دوای سی ڕۆژ لە هەڵبژاردنی سەرۆکی بەرلەمان، بەپێی "ماددەی
٧٢/ دوو/ ب"،بە (دوو لەسەر سێی) دەنگی ئەندامانی بەرلەمان سەرۆکی کۆمار"بۆ
کورد کە تا ئێستا بەربژێریان نییە" دانراوە، بۆ ماوەی چوار ساڵ هەڵدەبژێرێت، دوای
سوێند خواردنی سەرۆک کۆمار، بە پێی ماددەی ٧٣ / ١ لە دەستوور دوای ١٥ڕۆژ لەهەڵبژاردنی،
داوا لە گەورەترین فراکسیۆنی نێو بەرلەمان "شیعە" دەکات بۆ دەستنیشانکردنی
سەرۆک وەزیرانی نوێ، کە دەبێت بە پێی ماددە ٧٣/ ٤ لە ماوەی سی ڕۆژدا ئەندامانی کابینەکەی
پێشکەش بە بەرلەمان بکات بۆ متمانە وەرگرتن.
ئەگەر پارتی یەکێتی لەو ماوەی داهاتووداکە لە
دوای هەڵبژاردنی سەرۆکایەتی بەرلەمان، نەیانتوانی بگەنە بەربژێرێکی هاوبەش بۆ سەرۆک کۆمار، ئەوا بەپێی ماددەی ٧٠ بڕگەی دوو،
هەڵبژاردنەکە دەکەوێتە کێبڕکێی بەربژێران لەنێو بەڕلەمان، ئەو کات "ریسەکە سەرلەنوێ دەبێتەوە خوری" .
کێشەکە لەوە دا نییە کە بەربژێریان نییە بۆ سەرۆک
کۆمار، لەوەدا دەبێ دابەشکردنی پۆستەکانی هەرێم وعێراق لەلایەن"یەکێتی و پارتی"یەک
پاکێجەو پەیوەندیان بە یەکەوە هەیە، پارتیش بە ئاشکرا لەنێو کۆبوونەوەکەی ئەوجارە،
رایگەیاندوە" لەدوای هەڵبژاردن دەبێ بگەڕێینەوە خاڵی سفر"، بەو مانایەی دەبێ
پێش هەڵبژاردن هەر کۆدەنگی و رێککەوتێکیان لەنێوانیاندا، هەبووبێت، ئیدی کاری پێ ناکرێت،
لێرەش ئەگەر یەکێتی سەرۆک کۆمار نەبات، ئەوا پۆستەکانی حکومەتی هەرێمیش هەمووی چاوی
پێ دەخشێنتەوە، ئەو کات ئەگەر ئەمریکە فشار نەکات، ئەوا هەرێم دەکەوێتە دووڕێیانێک
لە ئێستا زیاتریش دەبێتە ئەسیری دەستی ئێران و تورکیا. هەر دەبێ رێگەیەک هەڵبژێرن، دوو هەرێمی جوودا وەک بە"هەرێمی
سەوز و زەرد" ناوزەد کراوە، یاخۆد شەڕی ناوخۆیی وماڵوێرانی جارێکی دیکە ڕوو دەداتەوە.
ئەو بژاردانەش هەر دوو حیزبی دەسەڵات لێی ناگەڕێنەوە،
چونکە بەرژەوەندی حزبی لەسەرووی بەرژەوەندی گەلە. ئەگەر ئەمریکە فشاریان لەسەر نەکات
کە بە ئاشکرا دەمێکە پێیانی گوتییە "کوردستانێکی یەکگرتوو ئارام"م دەوێت،
لێرەدا هەڕوگیڤی هەر دوو لا دەچێتەوە چوارگۆشەی یەکەم و بەیەکەوە ڕێککەوتن لەسەر کابینەی
تازە دەکەن.
١٧ی کانوونی یەکەم
٢٠٢٥
ئەم وتارە دەربڕی بۆچونی نووسەر خۆیەتی