لەتیف فاتیح فەرەج

ئاپۆو دەمپارتی و پەكەكەو كورد بە داو دوودەسە دەیانەوێت توركیا دیموكراسی بكەن ، نابێت ، ڕۆژێك باخچەلی قسەیەك فڕێدەدات و ڕۆژێكی دی ڕەجەب تەیب ، بەڵام هێشتان دەڵێن توركیای بێتیرۆر لە كاتێكا دیرۆكی تیرۆر لە توركیا دیرۆكێكی توركیە نەك ئەرمەنی و كوردی و لازو چەركەسی ، ڕێك لەو كاتەدا كەباس باسی توركیای بێتیرۆرە و ئەردۆغان باسی گۆڕینی دەستور دەكات یەكدز جاكاری نوسەری كورد لە ئەڵمانیاوە دەیەوێت سەردانی توركیاو شوێنەزا ئامەد بكات پۆلیس دەیگرن ، هێشتا سەلاحەدین دەمیر تاشیش لە كونجی زینداندایە ، لە برۆكسل دۆستێكی كوردی باكوریان نیشان دام لە سەر كورد بوون نزیكەی چل ساڵ لە پشت شیشی زیندانەوە بوو، بە دەم پیاسەوە هەندێك قسەمان كرد هەستم كرد بە گێڕانەوەی چیرۆكی ئەو عومرە درێژە دەژاكا بۆیە لێگەڕاین ، توركیاو سیاسەتی توركی و ناسیونالیستی  تورك و فاشیزمی تورك نایانەوێ‌ كەمێك دابەزن ، هەر بەڕاست عەزیز نەسین گوتویەتی كە بە زۆر لە بری سزا هەر بەرەو سەری دەبەی ، بۆ دابەزینیش دەبێت بێژی " قوربان كەمێك دابەزە بۆ سەرەوە " .
قەندیل و دەمپارتی و ئیمرالی ئەوەی پێویست بووە كردویانە ، چی تر بكەن ، ئەی لە بەرانبەر ئەوەدا ئەردۆغان و باخچەلی و ئەستەنبوڵ و توركیا چەند هاتونەتە پێش ، خۆ ئەمە سەرنجی ئێستامان نیە ئێمە هەر سەرەتاش دەمانزانی تورك ماویانە ، ئەمەمان بە هەموو دۆستانیش گوت هێشتا كەمێك قورسە بە توركێك بڵێی بابە بەر لە هاتنی تۆ كورد لێرە بون ، دوای هاتنی تۆش ئەم وڵاتە زیاتر لەوەی هی تۆیە هی كوردێكیشە ، ئەم وڵاتە ئەگەر وڵاتی تۆیە و شانازی بەتوركیابونیەوە دەكەیت وێڕای ئەوەی هەڵەیەكی فاشیانە لە ناوەكەیدا هەیە ، لیپە لە كوردو ئەوانی تر، ئێ‌ سەرەتای ترین هەنگاوی تێكەڵبوونەوە ، یان تێكەڵكردنەوە داننانی توركە بە بوونی ئەوانی دیكەدا، میت داوای چەكدانان لە پەكەكە دەكات ، بەڵام نایەوێت خۆی ئەو عەقڵەی دوێنێی دابنێت ، عەقڵی سڕینەوەی ئەوی تر ، پڕۆژەكەی ئاپۆ پڕۆژەیەكی گەورەو مانادارە ، بەڵام خۆ ڕووی دەم لە كورد نیە ، ئێمە هێشتا دیوە هەرە ڕاستیەكەمان لێدیار نیە ، كێ‌ دەڵێت ئەوە ڕاستە كە دەگات بە ئێمە ، كورد بونێكی دیرۆكی و هەمیشەیی و بەردەوامە ، دەبێت لە هەر چوار پارچەی داگیر كراوی كوردستان بەو جۆرە مامەڵەی لە گەڵ بكرێت ، بۆ منێكی كورد هەرگیز سنەو ئامەد دوو شاری توركی و ئێرانی نین ، دوو شاری كوردستانین ، بەڵام ئەمە بۆ تاران و ئەستەنبوڵ ناڵێم دەبێت ئەوی تریش ئەم ڕاستیە بڵێت ، تێكەڵكردنەوە توانەوەو ونكردن نیە ، پێكەوە ژیان و ئاشتیە.
كورد نایەوێت دەست و پەنجە لە گەڵ فاشیزم نەرمكات ، ئەمە بۆچونێكی هەڵەیە كورد دەیەوێت فاشیزم بگۆڕێت ، ئەمەش كاری بێوچانی دەوێت ، سەت ساڵ خوێن سەت ساڵ گفت و گۆ ، بەڵام هەرگیز هیچ هەنگاوێك بێبەرهەم بێت ، ڕەخنەی ئاوەزی زۆر گرنگە ، بەڵام نائاوەزی جۆرێكە لە نەزانی مەرج نیە هەر دەستەیەك ، گروپێك ناوەندێك ، كەسێك ، حزبێك خەریك بن ، كێ‌ باشتری پێدەكرێت با دەستپێبكات ، لە گەڵ ئەوەشدا زۆر گرنگە ئاگاداری خزان و گلان بین ، ئاشتی قورسترە لە شەڕ ، لە گەڵ ئەوەشدا ڕێگە راستەكەیە ، ئەم ئاشتیە ئەگەر ئەنجامیشی نەبێت بۆ خەبەر كردنەوەی دیوی ناوەوەی توركە ، دیوی ناوەوە پێویستی بە كەمێك روناكیە ، مرۆڤ هەر كات دیوی دەرەوەی بە وێرانی بینی ، پێویستە هەوڵی گۆڕینی دیوی ناوەوە بدات ، ئەگەر بمانەوێت هیچ بەیانیەك لە بەیانی پێشتر ناچێت ، دەكرێت مناڵی كوردو تورك پێكەوە بە دوو زمانی جیاواز قسەبكەن و هەردوكیشیان لە یەكتر تێبگەن ، بە ڕاستی بڵێم شەرمە توركێك ئینگلیزی یان ئەڵمانی بزانێ‌ و كوردی نەزانێ‌ ، خۆی گرنگە ئەڵمانی و ئینگلیزی بزانێ‌ بەڵام كێماسیەكی گەورەیە كوردی نەزانێ‌ ، ئەوە پەتای نەخۆشی كوردی نەزانینە فاشیزم بە جۆرێك دەدێوێنێ‌ لە دەنگی ئەحمەد قایەش بترسێت .

ئەم وتارە دەربڕی بۆچونی نووسەر خۆیەتی