فەیلەسوفی ئینگلیز تۆماس هۆبز (دەڵێت نەخۆشیی ناوخۆیی و ململانێی تائیفی و حزبی زیاتر لە هەر دوژمنێکی دەرەکی پێکهاتە سیاسییەکان بەرەو داڕمان دەبات ،کاتێک عەقڵیەتێک تەسکی حیزبی هەبێت بەرژەوەندی کاتیی خۆی بخاتە پێش بەرژەوەندی گشتی ئەوا بێگومان مانەوەی گشتی کۆڵەکەکانی دەوڵەتداری لەرزۆک دەبن )
سەردانی تۆم باراک نوێنەری تایبەتی سەرۆکی ئەمریکا بۆ هەولێر و زنجیرە کۆبوونەوە چاوەڕوانکراوەکانی لەگەڵ
سەرۆ بارزانی و سەرۆکی هەرێم،حکومەت، و جەمسەرە سیاسییە سەرەکییەکانی پارتی و یەکێتی لە چوارچێوەی پرۆتۆکۆلێکی دیپلۆماسی ئاساییدا کورت نابێتەوە
ئەم سەردانە ئەگەرچی بۆ تاوتوێکردنی پەیوەندییەکانی هەولێر و بەغدا و دۆزینەوەی میکانیزمێکە بۆ چارەسەرکردنی کێشە هەڵپەسێردراوەکانی نێوان هەولێرو بەغداد بەڵام لە ناوەرۆکدا خوێندنەوەیەکی وردی واشنتۆنە بۆ دۆخی سیاسی ناوخۆی هەرێمی کوردستان و کێشانی هێڵە نوێیەکانی ئەمریکایە لە ناوچەکەدا ، لەڕاستیدا هەرێمی کوردستان لە نێوان دوو بەرداشدایە فشاری دەرەکیی داڕێژراو لە کە بۆ بچووککردنەوەی قەوارەکەیەتی ، وە داڕمانی ناوخۆیی بەهۆی پەکخستنی دیموکراسی و شەرعیەتی دامەزراوەکانەوە
تایبەت بە دۆخی عێراق و هەڵوەشانەوەی گروپەکانی بەرەی مقاوەمە وەک چۆن مەکیاڤێلی دەڵێت (سیاسەتمەدارەکان هەمیشە ڕووکەشێک دەدەنە پڕۆسەکان بۆ شاردنەوەی جەوهەرە ڕاستەقینەکەی) پڕۆسەی ئێستای توانەوە یان تێکەڵکردنی گروپە چەکدارەکانی بەرەی مقاوەمەی شیعە و حەشدی شەعبی لەناو سوپای عێراقدا کە بە فشاری ڕاستەوخۆی ئەمریکا دەستی پێکردووە تەنها مانۆڕێکی تاکتیکی و کاتییەو هێزە نایاساییەکانی بەغدا دەیانەوێت لەم ڕێگەیەوە خۆیان لە سزاکانی ئەمریکا بپارێزن و ناسنامەیەکی یاسایی بەسەر خۆیاندا بپۆشن ، لە کاتێکدا لە بنەڕەتدا هێشتا دڵسۆزییان بۆ دەرەوەی چەمکی دەوڵەتی عێراقە،
مەترسییەکە لەوەدایە کە ناوەندە میدیایی و سۆشیاڵ میدیاییەکانی سەر بەو بەرەیە خەریکی جووڵاندنی شەپۆلێکی چەواشەکارانەن و دەیانەوێت جۆرێک وێکچوون لەنێوان خۆیان و هێزی پێشمەرگەی کوردستان دروستبکەن
دەیانەوێت پرسیار بخەنە سەر هێزی پێشمەرگەی کوردستان و بڵێن ئەگەر حەشد کۆتایی پێبێت دەبێت پێشمەرگەش هاوشێوەی ئەوان مامەڵەی لەگەڵدا بکرێت
ئەم تێڕوانینە غەدرێکی مێژوویی و دەستوورییەو بەراوردێکی زۆر نادروست و نامەنتیقانەیە چونکە
پێشمەرگە ناسنامەی نەتەوەییەکە نەک هێزێکی دروستکراو بەفتوایەکی کاتی ، پێشمەرگە دامەزراوەیەکە خاوەن مێژوویەکی درێژخایەنی بزاوتە ڕزگاریخوازییەکانە هێزێکە بۆ بەرگریکردن لە خاک و ناسنامە دروستبووە نەک گروپێکی چەکداری ئایدۆلۆژی یان مەزهەبی کە لە بۆشاییەکی ئەمنیدا سەری هەڵدابێت،
جگەلەوەش بەپێی ماددەی (١٢١) لە دەستووری هەمیشەیی عێراق (کە زۆرینەی گەلانی عێراق دەنگیان پێداوە)، هێزی پێشمەرگە وەک پاسەوانی هەرێم ناسێندراوە و بە فەرمی بەشێکە لە دامەزراوەی بەرگریی عێراق، لێرەوە چواندنی پێشمەرگە بە حەشد یان بە گروپە چەکدارەکانی دەرەوەی یاسا ، هەم پێشێلکردنی دەستوورە و هەم چەواشەکارییەکی مەبەستدارە و ڕیگاخۆشکردنە بۆئەوەی ڕۆژێک عێراق دەست بۆ ئەو بابەتەش بەرێت
بۆ تێگەشتن لە بەبارودۆخی ناخۆی هەرێمی کوردستان دەبێت تەماشیی بۆچوونی فەیلەسوفی ناوداری یۆنانی ئەفلاتۆن بکەین کە لە کتێبی کۆماردا ئاماژە بەوە دەکات
(کاتێک هێزە سیاسییەکان یاسا و ڕێساکانی دەوڵەتداری پێشێل دەکەن بۆ بەرژەوەندی حزبی، ئەوا ئیتر دیموکراسی دەگۆڕێت بۆ گێژاو )
ئەوەی ئەمڕۆ لە هەرێمی کوردستان دەگوزەرێت، سەلمێنەری ئەم تێزە مێژووییەیە ،ئێستا ماوەی ١٨ مانگ بەسەر پرۆسەی هەڵبژاردنەکانی پەرلەمانی کوردستاندا تێپەڕیوە، کەچی هێشتا کابینەی دەیەمی حکومەتی هەرێم پێکنەهاتووەو پەڕلەمان کارا نیە ئەم چەقبەستووییە حکومەتی هەرێمی کوردستانی کردوە بە حکومەتێکی کاربەڕێکەر کە بەشێک لە دەسەڵاتەکانی لێسەندوەتەوەو وەک پێوویست ناتوانێت دەست بۆ خزمەتکردنێکی زیاتر بەرێت لەسەر ئاستی دەرەوەش گەورەترین گورزی لە شەرعیەتی یاسایی و سیاسی دەسەڵاتی هەرێم داوە ،
لەسەر ئاستی نێودەوڵەتی دۆستە دێرینەکانی هەرێم بە تایبەتی ئەمریکا و وڵاتانی ئەوروپا ئێستا بە گومان و نیگەرانییەوە سەیری قەوارەیەک دەکەن کە ناتوانێت پاش ساڵێک و نیو لە هەڵبژاردن حکومەتێکی نوێ پێکبهێنێت!
ئەگەرچی لە ڕوانگەیەکی گشتییەوە هەمووان بەرپرسیارن لە پاراستنی سەقامگیری بەڵام ناکرێت چاو لە ڕاستییە حاشاهەڵنەگرەکان دابخرێت ئەو چەقبەستووییەی هەیە بەرهەمی ڕاستەوخۆی ئەو عەقڵییەتە سیاسییەیە کە بەردەوام بە نەفەسی هەڵمەتی هەڵبژاردنەوە سیاسەت دەکات و لە هەڵمەتەکانی هەڵبژاردنیش دیار بوو کام هێزی سیاسی بوو وتی ناهێڵین کابینەی دەیەم پێکبهێنرێت ئەگەر داواکاریە حیزبیەکانمان وەک ئێمەدەمانەوێت جێبەجێ نەکرێت
لەڕاستیدا ئەم تێڕونینە نادیموکراسی و بڕێکیش مەترسیدارە و ناکرێت ئایندەی ئەم هەرێمە بەم کێشانەوە بخەینە بەردەم مەترسی جدیەوە لەبری بەرەو پێشووچون بگەڕێینەوە
بۆ زیندەکردنەوەی پەیڕەوی کلتوری (٥٠ بە ٥٠)و پاشەکشە بکەین لە چەمکی دەوڵەتداری و دیموکراسی و لەبری هەنگاونان بۆ ئامانجی گەورەتر بێینەوە بۆ سەردەمی دابەشکاریی لۆکاڵی بەبێ گوێدانە ئەوەی ئەم هەرێمە ژیلەمۆی هەموو کوردێکەو سەدساڵە خوێن و خەباتی بۆ دەکرێت
هەرجۆرە فەرامۆشکردنێکی ژمارەی کورسی و دەنگی زۆرینەو کەمینە ئەوە سزادانی دەنگدەرو پشتگوێخستنی سندوقەکانی دەنگدان و حساب نەکردنە بۆ کورسییەکانی پەرلەمان، بێڕێزییەکی گەورەشە بە ئیرادەی هاووڵاتیانی کوردستان ئەمە پەیامێکی نەرێنییە کە دەڵێت دەنگدان چۆن دەبێت گرنگ نییە ،بەڵکوو ئێمە بە هێزی چەک و جوگرافیا پشکمان دەوێت نەک بە ژمارەی کورسی ئەم گۆتربازاڕە هەنگاوێکی هەڵەیەو گەڕانەوەیە بۆ چوارگۆشەی یەکەم،
وێڕایی لاوازکردنی پێگەی کورد لە دەرەوەو لەسەر ئاستی عێراقیش کاتێک ناوخۆی هەرێم پەرتەوازە بێت بێشک لە دانوستانەکانی بەرامبەر بە بەغداد کورد دەبێتە لایەنێکی لاواز و بێ بڕیار، ئەمەش ڕێگە خۆش دەکات کە مافە دارایی و دەستوورییەکانی هەرێم ئاسانتر پێشێل بکەن و چۆنیان بوێت وا مامەڵەبکەن
سەردانەکەی تۆم باراک لەم کاتەدا، زەنگێکی ئاگادارکردنەوەیە بۆ سەرکردایەتی سیاسیی کورد. پەیامی ڕوونی واشنتۆن ئەوەیە ئەمریکا ناتوانێت بەرگری لە قەوارەیەک بکات کە شەرعیەتی دەستووریی خۆی لە ناوەوە لەدەست بدات بەمجۆرەی ئێستا ناتوانرێت هاوکاریی سەربازی و دارایی پێشمەرگە بەردەوام بێت کاتێک ململانێی حزبی خەریکە دامەزراوەی نیشتمانی لەناو دەبات ناتوانرێت چاوپۆشی لەوە بکرێت کە حزب بۆ دەستکەوتی سیاسی کاتی چارەنووسی گەلێک بەبارمتە بگرێت ،کاتی ئەوە هاتووە کە لایەنە سیاسیەکان بە تایبەتی ئەوانەی تەنها لە ڕوانگەی بەرژەوەندیی تەسکەوە سەیری هاوکێشەکە دەکەن تێبگەن کە یارییەکە گەیشتووەتە قۆناغێکی مەترسیدارو
چارەسەری ئەم چەقبەستووییە تەنها یەک ڕێگای هەیە ئەویش ملکەچبوونە بۆ ئەنجامەکانی هەڵبژاردن و ڕێزگرتنی دەنگی دەنگدەران و بەهێزکردنی دامەزراوەکان و قوڵکردنەوەی ڕۆحیەتی دیموکراسی و تێپەڕاندنی عەقڵییەتی پشککاریی کۆن، و پێکهێنانی بەپەلەی کابینەی دەیەم، تەنها لەم ڕێگەیەوە هەرێمی کوردستان دەتوانێت بە یەکگرتوویی و بە هێزێکی دامەزراوەییەوە ڕووبەڕووی ئەو گۆڕانکاری و ئاڵنگارییە سیاسییانە ببێتەوە کە ناوچەکەی گرتووەتەوە ،لەدەرەوەی ئەمە هەر هەنگاوێکی دیکە موجازەفەیە بە ئایندەی گەلێکەوە کە سەدساڵە خەبات دەکات و خوێن دەبەخشێت بۆ گەشتن بە ئازادی یەکجارەکی.
ئەم وتارە دەربڕی بۆچونی نووسەر خۆیەتی